Вов ни несколька ков мельцек Саранск ошень аэропорту и спортонь ведень видонь Дворецу сувайхнень васьфнесазь Рузаевка ошса шачфть-касфть, Мордовияса и лама лия вастова содаф художникть Юлия Станиславовна Бакаевать работанза—мазы картинанза, конатнень эзда сельмоце аф явфтови, ванондолеть и ванондолеть лангозост.
Юлия Станиславовна рисовандаманц пяк кельгозе нинге шабакс. Тя и вятезе сонь художественнай школав, а меле—Ф.В.Сычковонь лемса художественнай училищав, коса тонафнесь оцю мяльса оформительскяй отделенияса. Шумордамдонза меле од художниксь ушедсь работама школаса дополнительнай образованиянь педагогокс. Мялецоль тонафнемс, касфнемс содамошинзон сяда тов, но тянди ёфси ашезь ляткшне пингоц. И самай эста Юлия Станиславовнань шачсь цёрац. Иденц шачемдонза меле Ю.С.Бакаева ашезь мрда школав. Ялганц, художникть Оксана Егоровать мархта ушедсть якама этюдонь тиема. Рузаевкань Выставочнай залса няфнезь эсь работаснон, Художниконь союзть вельде сотцесть региональнай и российскяй выставкатнень колга, конатнень пингста стане жа няфнезь картинаснон.
Ся пингста сявомок ётась аф кржа киза. Тяни Ю.С.Бакаева—ошень, республиканскяй и всероссийскяй выставкатнень и фестивальхнень участницасна. 2014 и 2019 кизотнень ульсть персональнай выставканза Рузаевкаса. Мекольдень кизотнень примсесь участия Красные Ворота (2014, 2016, 2018 кизотне), Большая Волга (2018 кизось) межрегиональнай и зональнай выставкатнень эса.
Красные Ворота выставкась уленди кафта кизоти весть. Тядде Москуса тя выставкаса теенза максфоль Ф.В.Сычковонь лемса премиясь. Сондедонза башка, республикастонк премиять получазь нинге колма ломатть. Тя выставкати Юлия Станиславовна макссезе «Археологические раскопки» картинанц, конань сёрмадозе кизода инголе.
Художникнень Профессиональнай союзснон членоц, Россиянь Художникнень Всероссийскяй союзснон членоц Юлия Станиславовна Бакаева работай живописьса и графикаса. Сёрмады жанровай портретт, пейзашт, натюрмортт. Кельгсыне козя история и архитектура мархта ошнень. Синь макссихть теенза творческяй од мяльхть-арьсемат. Валонзон коряс, эрь портретоц, натюрмортоц, пейзажец—бта идец.
Сон аф весть улендсь пленэрхнень эса. Пингстост можна ваномс лия художникнень работаснон, козякофтомс эсь опытцень.
Юлия Станиславовна азозе, што сон ламоти тонадсь содаф художникнень И.Сидельниковонь, М.Ямбушевонь, В.Бобриконь эзда.
Сидеста лятфнесы 2014 кизоть, мзярда делегация мархта якась пленэрс Вирь алдонь Тавла вели. Ю.С.Бакаева и лия художникне эрясть В.И.Ромашкинонь лемса «Этно-кудо» музейса. Сяшкава лац, кле, васьфтемазь-примамазь тоса, анокласть и няфтсть тейнек концерт.
2017 кизоня сон примафоль Мордовиянь Художниконь союзу. Тяда меле работанза ушедсть няфневома Большая Волга выставкаса.
Творчествасонза сатомшка мяль шарфни национальнай ширети. Лувиеньконь несколька кизода инголе содафнеськ «Мокшанка», «Эрзянка», «Перед выступлением» и лия работанзон мархта.
Жанровай картинатнень колга корхтамста художниксь мярьгсь, што пяк кельгсы сюжетнай картинань сёрмадоманц, лац-ряц арьси интерьеронь, щамонь, мазоптомань детальхнень лангса.
Этюдонь сёрмадомста сидеста нолясыне тевс веленятнень и велетнень. Васенцетнень эса кой-коста и лядсь кафта-колма кудня, сятка дачанди. Кепотьксонди, тяфта эвондасть Рузаевскяй райононь Мордовские Полянки, Танеевка велетнень колга картинанза-этюдонза.
Юлия Станиславовнань колга ламотне корхнихть, кле, сон шачсь художникокс. Да и ульсь кинь эзда теенза поладомс тя асушить и мольфтемс сонь сяда тов. Атяц, Василий Сергеевич Морозкин, эсь пингстонза Рузаевкаса Ухтомскяень лемса клубть видеса пуроптозе художественнай студиять, тянь мархта лихтезень творческяй кис машина ки ошень ламоц художникнень.
Ю.С.Бакаева лувондсы эсь прянц павазу ломанькс. Пцтай эрь шиня уленди заняф кельгома тевса. Художниконь асушиц теенза—инь оцю козяшись.
Т.Альшина.