Мокшавась Нина Куркина—Рузаевскяй райононь Мокшень Пишля велень васенце ветеринарнай врачсь
Кельгома морафтыеньке! Тячи оцю мяльса содафттядязь шачф-удалаф мокшавать, Рузаевскяй райононь Мокшень Пишля велень эряйть Нина Куркинать мархта. Нина Николаевна вов ни несколька кемотть киза сёрматфнесы «Мокшень правда» газетать. А тяда инголе лувондозе сонь нинге шабакс и школаса тонафнемста.
Шачсь-кассь Нина Николаевна Мокшень Пишляса Захарофнень лама идень семьяса. Аляц, Николай Николаевич, зрнянь кядь ломанель, маштсь лама тевса. И кутт путнесь-шапондсь, и шири покодема якась. Пишляйка ляйть трваса, Байкузовонь ульцяса, Николай Захаров войнада меле шапсь куд и эсь семьянцты. Покодсь Монголияса, коста Великай Отечественнай войнать ушедомдонза меле тусь аеркс врагть тапама. Куду мрдась II группань инвалидкс. Работась велень школаса, вятсь трудонь урокт, ашезь явонда плотниконь тевонц мархта. Ужяленди, лама идень алясь эрясь аф куватьс. Тусь эряфста, мзярда стирец Нина тонафнесь школаса 8-це класса.
Нина Захаровать тядяц, Дарья Александровна, шачемас коре Сузгярьге велень. Мокшень Пишляв сявфоль рьвянякс.
Аф ваномок шабатнень мархта сотф тефнень лангс, Дарья Захаровась эряфоньберьф покодсь совхозса—якась вазнятнень мельге.
Лувксс коре кафксоце идьсна, Нина, лац тонафнесь Мокшень Пишлянь средняй школаса, фалу примсесь участия химиять, математикать, лия предметтнень коряс олимпиадатнень эса. Учительсь Владимир Савельев, кона вятезень алгебрань урокнень, мярьгондсь Нина Захаровати сотомс эряфонц учителень тевть мархта. Владимир Алексеевич аноколь и направлениявок максомс, но мокшень стирсь кочкась лия ки. 1976 кизоня, 10-це классть шумордамдонза меле, тусь Казани, коса направленияс коре поступась Н.Э.Бауманонь лемса ветеринарнай медицинань Казанскяй государственнай академияв. Эста ни тя высшай учебнай заведенияти топодсь 100 киза и сон сувсесь (тянивок сувси) странаньконь инь содаф вузонзон ёткс. Вете кизот тонафнесь Нина Николаевна ветеринарнай врачекс. Куду сашендсь каникулас или оцю илатнень пингста. Казаньца эрясь общежитияса. Ульсть и лия студентт Мордовияста, тяконь лувксса и Рузаевскяй районцта. Тянемс мокшавась кирди кеме соткст кой-конатнень мархта, якай выпускниконь васедемас Татарстанть столицазонза.
Нина Захаровась Мокшень Пишляса васенце ломанць, кона арась высшай образования мархта ветеринарнай врачекс. Велеса ульсть жуватань пчкафнихть, но синь ширде сафтольхть.
Ветеринарнай врачень дипломть получамдонза меле мрдась Мокшень Пишляв и 1981 кизонь августста ушедсь работама А.П.Байкузовонь лемса совхозса. Тяда инголе, нилеце курсса, тяса ётазе практикать. Тевонц ушедозе старшай ветеринарнай врачста. Несколька ковда меле Саранскяйста «Плодопром» трестста сась главнай врачсь и ванозе, кода работай ветеринарнай од врачсь. А меле мярьгсь, што Нина Николаевна тяни кармай улема совхозонь главнай ветеринарнай врачекс.
Кемзисемге киза сон пчкафнезень совхозонь, велень эряйхнень жуватаснон. Хозяйствась оцюволь, да и эрь пирьфса эста ульсть кафтонь-колмонь тракс, лия жуватат. Мокшавась кенерькшнесь. Сидеста ширезонза лезксонкса сашендсть веть, ваймама шитнень. И сон вестевок киндивок ашезь атказакшне. Мес лоткась работамда? 1998 кизоня срадсь-каладсь А.П.Байкузовонь лемса совхозсь, мезсь и арась туфталкс.
Но асу, тевонь содай специалистсь тевфтома ашезь ляда. Ветеринарнай врачсь путфоль ся участкань заведующайкс, коза сувсесть Мокшень Пишлянь фермерскяй хозяйстватне, а нинге—Пайгарма, Тепловка, Булгаки, Мордовская Полянка, Татаронь Пишля велетне, Пишля, Пайгарма разъезттне. И населённай сембе пункттненди жуватань пчкафтысь якась ялга, аньцек Татаронь Пишляв—автобусса. Ашезь эвфне мокшавать аф ловонь фальхне, аф сёксень кельме пизепне, аф аера варматне… Тяфта и ётась кемгафтува киза. Нина Николаевна вестевок ашезь каенда, мес кочказе ветеринарнай врачень тевть.
Сяда тов сонь ётафтозь Рузаевскяй ветстанциянь ведущай врачекс-эпизоотологокс, коса работась 2021 кизоть самс. Ветеринаронь тевти макссь 40 киза!
Нина Николаевна—трудонь ветеран, казьф Мордовиянь Госсобраниять Почётнай грамотанц, Мордовиянь Велень хозяйствань и продовольствиянь министерствать, Российскяй Федерациянь Велень хозяйствань министерствать Почётнай грамотаснон мархта.
Мокшавась—кельгома рьвя, тядя, щава. Мирдец—эсь велень мокшень алясь Юрий Куркин. Юрий Евгеньевичень мархта касфтсть кафта стирьхть. Синь шумордазь школать медаль мархта. Оцюсь сатозе сияннеть, ёмлась—зрняннеть. Акатне-сазорхне Куркинатне якстерь дипломса аделазь Н.П.Огарёвонь лемса Мордовскяй государственнай университетть: Светлана Юрьевна—Национальнай культурань институтть, Татьяна Юрьевна—филологическяй факультетть.
Светлана Юрьевна семьянц мархта эряй Саранскяйса, цёрац Дима тонафни 6-це класса, мирдец Алексей Рузаевкань.
Татьяна Юрьевна эряй и работай Москуса.
Сонць Нина Николаевна колмоце кизось аф работай, пенсияса. Но тевфтома аф ащекшни мзярдовок. Тянивок теенза пшкятькшнихть лезксонкса кода ветвраченди. И сембось уленди, кода и инголи: веть стяфтк—аф атказай.
Мокшавась—велень клубонь художественнай самодеятельностень участница. Мокшень щамса наряжафста лисенди морама «Лихтибряня» коллективть мархта. Кельгсыне мокшэрзянь кунардонь, тяниень пингонь моротнень.
А нинге сон—«Шумбрат, Мордовия!» Народнай творчествань республиканскяй фестивальть сембе отчётнай концертонзон и выставканзон ванондысна! Сашенды Саранскяи и рамси билетт сембе райоттненди. Азсь спасиба «Мокшень правдати» графикть печатламанкса. Керыне, кле, газетаста и путыне кошелёкозон. Фалу содасы, кодама райоттне кштийхть-морайхть маластонь ваймама шитнень. Уленди и «Морак, гармония!» фестивальть концертонзон эса.
Тяддень августсь Мокшень Пишлянь шнама мокшавати юбилейнаель. Сон кульсь лама лямбе вал. Поздравляндазь Нина Николаевнань кода мала ломаненза, раднянза, стане и сят, кинь мархта тонафнесь Казаньца. Шачсь сон 1959 кизоня.
Миньге арьсетяма теенза кеме шумбраши и сембе цебярть!
Татьяна Альшина.