Молихть илас

«Ялгат» Севастопольскяй мокшэрзянь национально-культурнай обществати сувси 200 ломань. Вятьсы сонь Н.Н.Балашов. Шачемас коре сон Атюрьевскяй райононь Кяшал велень. Хуш марнек эряфонц ётафтозе Севастопольса, но Кяшалть мархта кирди кеме соткст. Тясот сонь раднянза, кельгома тонафтыец Ф.А.Богданова. Мзярда сашенды вели, вестевок аф ётни Фаина Алексеевнань кудонц вакска. Седикс-ваймокс корхнихть эряфть-ащефть, Кяшалть колга. Николай Николаевич лувондсыне мокшень, рузонь кяльса эсь стихонзон.
Ня шитнень Севастополи мокшэрзянь крайста моли Мокшэрзянь народть межрегиональнай общественнай организациять вятиенц Ю.А.Миишанинонь мархта оцю делегация. Эзонза сувасть Мокшэрзянь народть межрегиональнай общественнай организациять исполкомонц председателец Т.И.Ларина, Н.П.Огарёвонь лемса МГУ-нь содаф учёнайсь Ю.Н.Сушкова, Мордовия Республикань Заслуженнай артистсь Н.В.Спиркина, «Арьсема» группась. Кармайхть «круглай шрат», лия васьфтемат «Ялгат» Севастополень национально-культурнай обществать мархта. Артисттне няфтьсазь мокшэрзянь культурать разнай площадкава. Севастопольса ётафтови «Шумбрат» национальнай фольклорнай илась.
—Минь фалу кенярттяма Мордовияста саф инжихненди,—корхтай Н.Н.Балашов.—Кармайхть мялень салай васьфтемат, концертт, лия илат. Севастополень эряйхненди эряви азонкшнемс, няфнемс мокшэрзянь культурась.
Илья Вешкин.