МР-нь Оцюнясь Артём Здунов 1 сентябрьста сашендсь Саранск ошень 5№ школать торжественнай линейказонза. Республикаса 12 школать ёткста тя фкясь, кона тонафнемань од кизоти капитальнайста петьфоль.
5№ школась—Саранскяйса фкя инь сиретнень ёткста, работай 1964 кизоста сявомок. Капитальнайста петемада меле сон одкстомсь, няеви сембе ширде мазыста. Петеманкса нолдафоль 99 миллионда лама цалковай. Полафтфтольхть аф аньцек теплоснабжениянь и канализациянь сетьтне, а стане жа мебельсь и оборудованиясь.
Тядде марнек странать келес торжественнай линейкатне панжевсть Россиянь Государственнай флагть кеподеманц и гимнать мораманц эзда. Тяфта тифоль и 5№ школаса.
Мордовиянь Оцюнясь поздравляндазень линейкань сембе участникнень тонафнемань од кизоть мархта.
«Минь сембе таколдозь васьфнесаськ тя илать,—мярьгсь сон.—Арьсян, штоба тинь ётафтолесть тонафнемань од кизоть мяль вельде. Тонафнемс, мушендомс ялгат, кельгомс учительхнень—тя инь главнайсь. Тя кизоста ушедомок школатнень эса кармайхть ётафневома башка, аф эсь лацонь урокт—«Корхнемат важнайть колга». Ня урокненди карматама тернема теенть интереснай ломатть—спортсметт, политикт, учёнайхть—кинь мяленте. Максседа теест кизефкст. Инь главнайсь—штоба тинь касоледе афкуксонь личностекс, Россияти эрявихть вии ломатть!»
Республикань Оцюнясь ванозе од школать, корхнесь педагокнень и родительхнень мархта.
Тяфта жа Мордовиянь руководительсь иттнень и учительхнень мархта примась участия школатнень всероссийскяй панжемаса—сон ётафтовсь видеоконференция лаца вице-премьерть Татьяна Голиковать и странань просвещениянь министрть Сергей Кравцовонь председательстваснон ала. Российскяй кота региоттне лиссть связти, тяконь лувксса и Мордовия Республикась, 5№ школась.