Ащи примеркс лиятненди

Од кизонь карша Атюрьевскяй райононь Перевесье велень основной общеобразовательнай школаса полафтсь директорсь. ответственнай тя вастти путозь мокшавать С.Н.Руськинать. Тя школаса сон работай комозьда лама киза. Тевонц кельгсы. Оцю авторитетоц райононь учительхнень, велеряйхнень и тонафнихнень ёткса. Ломанць ответственнай, трудонь и дисциплинань кельги.

Шачсь-кассь Светлана Николаевна Кяшал велеса. Тядяц, Валентина Ивановна, педагогическяй трудонь ветеран. Сембе эряфонц лемдезе Кяшал велень средняй общеобразовательнай школати. Работась начальнай класснень мархта. Аляц, Николай Николаевич, трудендакшнесь совхозса. Главнай инженероль, фермань заведующаель. Трудонь кельги кафта ня ломаттне касфтсть ниле итть. Фкя цёрасна, Сергей Николаевич, аделазе М.Е.Евсевьевонь лемса МГПИ-нь физико-математическяй факультетть. Контрактс коре служась армияса. Российскяй армиянь капитан. Андрей Николаевич экономист. Покоди Москуса связень салонца управляющайкс. Анна Николаевна эряй Саранскяйса, бухгалтер.
Сембоса примеркс ащи акасна, Светлана Николаевна. Сон фалу лезнесь ёмлатненди уроконь тиемста, лия тевса.
—Родителеньке пяк заняф ломаттельхть,—корхтай Светлана Николаевна.—Стятама шобдава, алязе ни работаса, маттама сон нинге ашезь са. Тядязевок то урокс аноклай, то тетратть проверяй. А кудонь тевда мзяроль. Фкя-фкянди лездозь и касоме, араме аф кальдяв ломанькс.
И тя виде. Кяшалса аш стама ломань, кона азоль кальдяв вал Руськиттнень идьснон, семьяснон колга. Светлана Николаевна «ветес» тонафнесь школаса. Тячемс аньцек шнамань валса лятфнесыне Л.М.Руськинать, З.Ф.Поршинать, Л.А.Малютинать, И.Г.Руськинонь и лиятнень. Синь эздост и сявондсь кепотькс сай пингонь учительсь.
Светлана Руськина зрнянь медальса аделазе Кяшал велень средняй общеобразовательнай школать. Тонафнесь Н.П.Огарёвонь лемса Мордовскяй госуниверситетонь филологическяй факультетонь национальнай отделенияса. Якстерь дипломса аделазе вузть. Киза заочна тонафнесь аспирантураса. Но савсь кадомс, сяс мес учителень тевсь вешсь лама пингта, трудта. Работама сась Перевесье велень средняй общеобразовательнай школав. Вятсь мокшень кялень и мокшэрзянь литературань, рузонь кялень и литературань урокт. Васенце кизотнень вятсь историянь, немецкяй кялень урокт. Тяда башка, школаса профкомонь председатель. Кизонда лагерень начальник. И аш стама тев, кона улель теенза аф вийс коре. Эрь максф тевть пяшкотькшнесы совестьс коре.
Сон примси участия райононь и республиканскяй пялькстоматнень эса. Учитель ялганзонды няфни мастер-класст, ётафни панжада урокт. А учениконза лисендихть сяськикс региональнай олимпиадатнень, пялькстоматнень эса. Кепотьксонди, Жанна Пантелейкина занязе васенце вастть творческяй секцияса, Света Мелишева—мокшень кяльса. Татьяна Карпушкина, Ксения Мелишева арасть призёркс. А райононь пялькстоматнень, олимпиадатнень эса эрь кизоня учениконза сявондьсазь васенце васттнень. Аф стак Мордовия Республикань Образованиянь министерствась казезе сонь лац покодеманкса Почётнай грамотаса.
Мзярда-бди Перевесье велень школась пяк оцюволь. Ульсь сон средняйкс. Мекольдень пингть арась основной общеобразовательнайкс. И содамошит тяни тяса кочкси 24 ученик. Омбоце класса ученикт аш. Кой-кона класснень эса тифтень-кафтонь идь. Но шабатне пяк активнайхть. Няфнихть цебярь содамошит аф аньцек предметтнень коряс, но и якайхть районнай олимпиадав. Сяськихне аралакшнесазь районть честенц республиканскяй олимпиадатнень эса. Содамошинь киге-янга шабатнень вятнесазь тевонь содай учительсна. Светлана Николаевна аньцек шнамань валса лятфтазень учебно-воспитательнай работать коряс завучть Н.М.Шибайкинать, воспитаниянь кизефкснень коряс директорть советниконц Т.М.Степановать, библиотекарть, учительть Т.В.Паркинать, ламотнень лиятнень.
С.Н.Руськина—кельгома и павазу тядя. Стирец, Ксения Николаевна, зрнянь медальса аделазе Кяшалонь средняй общеобразовательнай школать, якстерь дипломса шумордазе В.Я.Кикотянь лемса Москувонь юридическяй университетть. Тяни работай следователькс.
С.Н.Руськина илештень кятть кярьмодсь директоронь тевти. Тевда афкукс пяк лама. Эрь илать, тевть эшксса лама трудта. А кода содаф, директорфтома фкявок тев аф тиеви. Сяс Светлана Николаевна старандай, путнесыне сембе виензон сянкса, штоба школась районца улель инголи молихнень ёткса. И ламось теенза тя тевса удалси.
И.ВЕШКИН.
Снимкаса: С.Н.Руськина.

Последние новости

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть...

«Варяг» крейсерть подвигоц

9 февральсь—Россиять военнай историясонза мяляфтови дата. Тя шиня 1904...

Мазыхть мокшень стиреньке

Кельгома морафтыеньке! 2025 кизоня «Мокшень правда» газетась сяда тов...

Рославльскяй Краснознамённай 326-це стрелковай дивизиясь пуроптфоль Саранскяйса

Тядде васьфтьсаськ оцюдонга оцю илать—Великай Сяськомать 80 кизонь топодеманц....

Эрявикс кизефксненди—башка мяль

Ётай недялять Саранскяйса, Республикань Кудса, ётафтовсь Мордовия Республикань сисемце...

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя Администрации Главы Республики Мордовия и Правительства Республики Мордовия – руководителя Пресс-службы Главы Республики Мордовия Елены...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть эзга 4№ полициянь отделу пшкядсь ошень 65 кизоса авась, кона пачфтсь вете тёжяньда лама цалковаенц...