Атерь велень 2№ средняй общеобразовательнай школась тядде отмечасы 50 кизонь юбилеенц. Тонафнихненди эсь кенкшензон сон панжезень 1974 кизонь васенце сентябрьста. Идьта эста ламоль, классне оцюфтольхть. Шабатне тонафнесть кафта сменаса. Васенце директоркс ульсь Мордовскяй АССР-нь Заслуженнай учительсь, «Знак Почёта» орденонь кавалерсь А.Д.Аверина. Мархтонза трудендама састь брадоц А.Д.Фёдоров, рьванц, Мария Сергеевнань мархта. Тяка школаса лама киза работась Аверинать стирец, тяни педагогическяй трудонь ветеранць Л.И.Тишкина.
Анна Дмитриевнада меле школать лама киза вятезь В.П.Мустайкин, В.Н.Верясов, Н.К.Байкова, О.С.Козяйкина. Школаса завучекс трудендакшнесь Мордовскяй АССР-нь Заслуженнай учительсь А.Е.Шляпникова. Тяса начальнай классонь учителькс покодсь стирец, Г.В.Понимаскина, овоц, Яков Яковлевич. Лама вий макссь завучсь Т.С.Шукшина. Тяни Татьяна Степановна педагогическяй трудонь ветеран, почётнай пенсионер. Тевонц сяда тов вятьсы тонафниец Н.Г.Васина. Наталья Григорьевна тяни тиендьсыне и директоронь тефнень. Лама киза школати макссь Мордовскяй АССР-нь Заслуженнай учительсь П.П.Шишканова.
Школась фалу козяль асу ученикса. Тянемс гордостекс и прянь шнафтома вастокс ащихть П.И.Кижапкина, И.М.Ларькин, А.П.Резина, В.В.Зеленова, А.С.Панфилова, А.Н.Неяскина, В.Ф.Резепов и ламотне лиятне.
Тячи школаса тонафни 163 ученик. Ётай тонафнема кизоть синь эздост ульсь 170, васенце класса—кемгафтува шабаль. Тядде—аньцек кафкса. Атерень школав содамошинь пуропнема автобусса пачфневихть шабат Чудинкаста, Усть-Рахмановкаста, Дмитриево-Усадста, Сире Шуструйста, Рузонь Велязьмаста, Каменкаста, Оцядуста, Перевесьяста.
Школаса покодихть 21 учитель, кота воспитательхть, администрациянь колма работникт. Тяда башка, трудендайхть техническяй кемонь работникт. Комозьда-колмогемоньда ламонь киза учителень тевснон тиендьсазь Н.Г.Васина, О.А.Цымдянкина, С.А.Шапошникова, О.В.Телякова, лиятне.
Школаса трудендайхть Мордовия Республикань кафта Заслуженнай учительхть Н.К.Байкова, Н.Е.Канина. Васенцесь лама киза ульсь школань директоркс, омбоцесь—аф класснай работать коряс завучекс. Тя тонафнема кизоть оцю казнеса казьфтольхть В.В.Лобанова и И.В.Сяткина. Васенцесь—химиянь и биологиянь учитель, примась участия «Кизонь инь цебярь учительсь» пялькстомаса и занязе васенце вастть. Валентина Васильевна казьф Мордовия Республикань Оцюнять Благодарностенц мархта. Омбоцесь—начальнай классонь учитель. Тядде примазе васенце классть. Ирина Викторовна казьф МР-нь Образованиянь министерствать Почётнай грамотанц мархта.
Школаса оцю мяль шарфневи спортти. Пцтай эрь шиня ётафневихть спортивнай пялькстомат. Тянкса аф кржа тиендихть физвоспитаниянь учительхне, педагогическяй трудонь ветераттне А.С.Кашаев, Г.К.Савкин. Синь учениксна лисендихть сяськикс районнай и республиканскяй пялькстоматнень эса. Школать фойеса лама кубкада, грамотада, дипломда, медальда, спортивнай сувенирда, лия казнеда. Эрть эшксса тонафтыхнень и тонафнихнень оцю трудсна.
Школась маряй гордость эсь выпускниконзон инкса. Атерь велень 2№ средняй общеобразовательнай школать аделазе полициянь генерал-майорсь, МР-нь Оцюнять Советникоц С.Д.Неяскин. Тяса тонафнесть Афганскяй войнань и Чеченскяй операциянь ветераттне В.Н.Радин, Н.Д.Девятаев, С.С.Костькин, С.В.Акашкин, А.Н.Дебайкин, лиятне. Тяни школань выпускникне примайхть участия СВО-са. Ужяль, бойса шавовсть Павел Васькин, Виктор Голышев, Виктор Татаров. Россиянь Президентть В.В.Путинонь Указонц мархта синь казьфт Мужествань орденца (куломдост меле). Школань коллективсь оцю лезкс максси спецоперациянь участникненди. Кочксихть и прважсихть гуманитарнай лезкс, котцихть маскировочнай сетьть. Н.В.Беляйкина сонць сташенды снайперскяй костюпт, нашлемникт.
Тяниень выпускникневок сембоса няфнихть пример. 2024 кизоня средняй образованиять колга аттестатт получасть 8 ломатть. Синь аф кальдявста максозь ЕГЭ-тнень. Кототне поступасть вузу, кафттне—колледжу.
Районца, республикаса аш стама пялькстома, ила, коса школань тонафнихне афольхть прима участия, афольхть сата призовой вастт.
Кепотьксонди, аф кунара Артекста мрдасть школань инь цебярь тонафнихне Татьяна Попова, Виктория Артёмова, Марина Татарова. Синь лиссть сяськикс республиканскяй пялькстомаса. «Образование» национальнай проектть коряс панчфт «Точка роста» кабинетт. Школать ваксса тиф тренажёр мархта од спортивнай площадка, коса уленди лама шабада. Тя тонафнема кизоть школьнай программати сувафтф од предмет—«Основы безопасности и защита Родины».
Сатфкснень мархта ряцок улихть и прябалат. Кода азоськ, школась панжезень кенкшензон 1974 кизоня и ся пингста сявомок вестевок апак тиколь капитальнай ремонт. Одкстопневсть кой-кона классне, пингть вешфксонзон коряс тифтольхть спортзалсь, столовайсь. А вов оцю ремонт школась коль учи.
Эрь шиня тонафнемань тя кудса лаказь-лакай эряфсь. Урокта башка тяса ётафневи лама аф фкя лацонь мероприятия. Аф кунара, кепотьксонди, школав тернезь педагогическяй трудонь ветераттнень. Иттне, школань дирекциясь анокласть теест аф аньцек цебярь казнет, но и мялень салай концерт. Тя илась лемтьфоль школать 50 кизонь юбилеенцты и эряфкшу ломанень ковти.
3 ноябрьста Атюрьевскяй районць примай участия «Шумбрат, Мордовия!» Народнай творчествань республиканскяй конкурсса-фестивальса. Эздонза шири аф лядыхть школаса тонафнихневок, учительхне. Ня тефнень инкса отвечай школань тевонь содай педагогсь О.В.Телякова.
Илья ВЕШКИН.
Фототне авторть.