Белозерьяса панчф од школа

Мордовияса, кода и марнек Россияса, 2 сентябрьста ушедсь тонафнемань од кизось и кайгсть школьнай пайгонятне. Ромодановскяй райононь Белозерье велеса оцю класснень эса тонафнихне ушедозь тонафнемать школань од корпусть зданиясонза. Основной зданиясь строяфоль нинге 1978 кизоня и тонафнемань условиятне тяса ульсть аф сяшкава тяниень пингоннет. Сяс эряйхне пшкятькшнесть дополнительнай зданиять строяманц колга эняльдема мархта, и республикань руководствась кирдезе синь ширеснон.
«Развитие образования» госпрограммать коряс строяфоль 165 вастонди од корпус (тя тевонди и од оборудованиянь рамамс нолдафоль пцтай 433 миллион цалковай). И вов корпуссь панжезень эсь кенкшензон.
Белозерьевскяй школав торжественнай линейкати сашендсь Мордовиянь Оцюнясь Артём Здунов.
«Пяк цебярь ши, мялень кеподи события тячи—панчтама Белозерьяса од школа Президентоньконь проектонц коряс. Оцю спасиба государствань руководительти ширеньконь кирдеманкса—эрь кизоня республикаса панчсетяма образовательнай од учрежденият, тиенттяма ремонт ламоц школатненди и идень саттненди»,—азсь приветствиянь валхт школаса пуромф тонафнихненди, тядятненди-алятненди и педагокненди республикань руководительсь.
Белозерьяста тядятне-алятне азсть благодарностень валхт школать од корпусонц инкса—сон арась афкуксонь казнекс иттненди.
Белозерьевскяй школать директороц Эльвира Киреева азсь благодарностень валхт Мордовиянь Оцюняти тяниень пингонь од корпусть строяманкса и тядятненди-алятненди, конат стане жа тисть оцю путкс тя тевти.
Од корпусть эзда панжемать школать директоронцты Эльвира Киреевати максозе «Новотэк» подряднай организациять руководителец Алексей Иванов.
Республикань Оцюнясь ванозе од корпусть. Школаса 17 тонафнемань кабинет, 140 вастонди актовай зал, медицинскяй кабинет, тяниень пингонь столовай и пищеблок. Техникать мекольце «валонц» коряс тиф охранань комнатась.
Спортивнай инфраструктурась корпусса—спортивнай оцю зал, футболонь пакся, волейбольно-баскетбольнай площадка. Школась работай «пяшксе шинь» режимса—ладяф кружокнень и секциятнень работасна.
Географиянь кабинетса Артём Здунов повсь «Важнайть колга корхнемат» урокс. Педагогсь пачфтезе, што азонды иттненди сянь колга, кода эрти эздост вийс коре мезевок тиемс странанц вандыень шинц инкса. «Вандыень шить инкса мезевок тиеви, кда улихть цебярь содамошитне и образованияце»,—шарфтсь мяль Артём Здунов.