Тячи, 15 августста, шачема шинц-юбилеенц васьфтьсы Атюрьевскяй райононь Вирень Кярьгоня велеса шачф-касф мокшалясь Иван Стёпушкин. Вов ни несколька кемотть киза Иван Александрович эряй Зубова Поляна посёлкаса, кунара тяса арась эсь ломанькс. Мокшалять лац содасазь марнек районца.
Газетать тячиень номерсонза оцю мяльса пачфттяма мокшалять-юбилярть колга.
Шачсь Иван Стёпушкин 1954 кизоня Вирень Кярьгоняса Стёпушкиттнень лама идень семьяса. Александр Дмитриевичень и Пелагея Серафимовнань ульсть сисем идьсна. Колма цёратнень и ниле стирьхнень ёткста Иван сембода оцюсель.
Вов мезе сон лятфни эстонь кизотнень колга: «Алязе, Александр Дмитриевич, вирень керыель, меле—вирень азороль. Тядязе, Пелагея Серафимовна, кудазораваль, сяс мес касфтсь лама шаба. Сембе иттнень (монь, дуганнень Николаень, Александронь, сазорнень Надеждань, Лидиянь, Раисань, Валентинань) ульсть синцень тевсна: кие урятцесь и тиендсь аруши кудса, кие керсь пенгат, кие якась веденкса или аннезень-симнезень жувататнень, потьнезе траксть, урятцезе и усксезе назёмть. Да кали кржа велень кудса и пирьфса тевда? Шачфтыне-касфтыне касфтомазь трудонь кельги, лама тевса машты ломанькс. Кизонда семьянь келеса заняфтолеме перень тефнень мархта, лядендеме тише. Мзярда минь, шабатне, касоме, якаме вири, коса лезнеме оцюфненди пенгянь керомаса. Тядязе и алязе сидеста корхнесть, штоба фалу оцю мяль шарфнелеме эряфкшу ломаттнень лангс. Кда эряви—лезнелеме теест».
Но аф аньцек трудть кельгома, лиятненди лездома тонафтозь Стёпушкиттне шабаснон. Александр Дмитриевич и Пелагея Серафимовна мярьгондсть теест лац тонафнемс школаса, штоба шумордамдонза меле улель кода касфнемс содамошиснон сяда тов. Инголенди азсаськ, што нилетнень высшай образованиясна, колмотнень—специальнай.
Иван Стёпушкин 1969 кизоня шумордазе 8 классонь школать, а 9-це классу сась тонафнема Стрельниковскяй средняй школав. 1971 кизоня аделазе сонь пцтай аньцек ветес, фкя ниле мархта.
Фкя киза алянц мархта работась вирьса. 1972 кизоня поступась Зубово-Полянскяй педагогическяй училищав.
«Мзярда сань Зубова Полянав, сяда содафтонь районть мархта, пяк тусть мялезон сонь мазы вастонза, перьфпялец»,—сяда тов лятфни мокшалясь. Эста нинге ашезе сода, што судьбась кемоста и сембе пингс сотсы сонь Зубова Полянать мархта.
Педагогическяй училищав Иван Александрович поступась 10-це классть шумордамдонза меле, а 1972 кизонь 29 октябрьста сявозь армияв. Служась мокшень цёрась ичкозе, пограничниколь мянь Дальняй Востокса. Куду мрдась старшинакс. Сон тянемс (!) ванфтсы военнай форманц. Пограничниконь шись эстоньбере арась теенза оцю илакс—28 майста тарксесы шкафста форманц, няфнесы ялганзонды, конат сашендыхть ширезонза.
Иван Александровичень валонзон коряс, тяни сон инь эряфкшу пограничниксь Зубово-Полянскяй районца, а цёрац—подполковник, офицер-пограничник.
Армияда меле Иван Стёпушкин мрдась Зубова Полянав, поладозе тонафнеманц. Аньцек шумордазе педагогическяй училищать, сонь кочказь тяниень Аграрнай техникумть—эстонь СПТУ-ть ВЛКСМ-нь
месткомонцты освобождённай секретарькс. Мокшалясь вятсь историянь, географиянь, физкультурань урокт. А нинге поступась Н.П.Огарёвонь лемса Мордовскяй государственнай университетонь историческяй факультету и шумордазе сонь 1983 кизоня.
Самай эста сон путфоль тя училищань директорти учебно-воспитательнай тевть коряс заместителькс. Тевонц мольфтезе виень аф ужяльдезь, фалу ащесь вешендемань киса и семботь тиендезе арьсефть сатоманкса. Училищаса Иван Стёпушкин работась 1987 кизоти молемс.
Педагогическяй училищать шумордамдонза меле содафокс арась сай пингонь рьванц, Надежда Владимировнань мархта. Кода корхни сонць Иван Александрович, «эряфонь кибрясон васьфтине райононь инь мазы и удалаф стирть». Од ломаттне рьвяясть, пуроптсть семья. Шачсть стирьсна Олеся и цёрасна Тарас. Олеся шумордазе школать зрнянь, Тарас—сиянь медальса.
Тяни синь оцюфт, синцень семьясна. Иван Александровичень и Надежда Владимировнань вете уноксна: 2 цёранят и 3 стирнят. Школаса сембе тонафнихть аньцек ветес.
Инь оцю уноксна, Егор, аньцек ветес шумордазе М.В.Ломоносовонь лемса Московскяй государственнай университетонь юридическяй факультетть. Тяни служай армияса.
Мокшалять 1987 кизоня райкомсь путозе Зубово-Полянскяй РОНО-нь заведующайкс. И ответственнай тя вастса Иван Александрович работась пцтай 31 киза, 2017 кизоть самс.
«Зубово-Полянскяй районць оцю. Эста ульсь 100-да лама школа и идень сад. Лама вастова эрявсть цебярь кадрат—директорхт, учительхть, воспитательхть. И тя тевсь тифоль! Тяда башка, эрявсть валда и оцю класст, мастерскойхть, школатнень пирьфса участкат. Школатненди колхозть ярмаконзон лангс рамсемс компьютерхт. Котельнайхнень тиеськ газовай отопления мархта»,—азозе Иван Стёпушкин.
Но аф аньцек тя тифоль и сатфоль. Строяфоль 51 од котельнай. Инголи райононь школатне и идень саттне ушневсть пенгаса или угольса. Эрь кизоня усксефоль и плхнефоль сисем тёжятть тонна уголь, кемгафтува тёжянь кубическяй метра пенгя. А газть ётафтомдонза меле арась сяда тёждя.
Самай сонь пингстонза тонафнемань тевти сувафтфтоль единай государственнай экзаменць. Тя одняське ашезь ара стакакс-сталмокс кода РОНО-нь заведующайти, стане и учительхненди, ученикненди. Районнай образованиясь ульсь оцю серьса и ЕГЭ-сь тянь няфтезе нинге весть.
Вал тага макстама Иван Александровиченди: «2002 кизоня ушедсь ётафневома единай государственнай экзаменть мархта сотф эксперимент. Мордовияса тя тевонди кочкафтольхть вете райотт, тяконь лувксса и Зубово-Полянскяйсь. И минь няфтеме пяк цебярь результатт. Мзярда эряфозонк ушедсть сувсема компьютерхне, ашеме ляда ширеса. Эрявсть тянь мархта сотф од кадрат. Сембонь тонафтоськ работама компьютерса».
Тячиень материалоньконь героец сидеста лятфнесыне сятнень, кит лезнесть теенза, кинь эзда тонафнесь. Ётксост Виктор Пинясов, Михаил Степашкин, Анатолий Пестов, Виктор Филичкин, Тамара Митрейкина и ламотне лиятне.
Мокшалять лятфнеманзон аньцек кулхцондолить! Машты азондома ётаф кизотнень колга. Тяда башка, Иван Стёпушкин—мокшэрзянь краень афкуксонь патриот. Шачсь Атюрьевскяй районца, но эряфонь сюрекиц пачфтезе Зубова Полянав, конань сон пяк кельгсы.
«Эряфозень ламошкац ётась Зубово-Полянскяй районца. Самай тяса арань, кода корхнихть мокшетне, содаф ломанькс. Тяса тяни эряйхть дуганне и сазорне, шачсть-кассть идне, лама ялгадон. Маряса прязень павазукс, сяс мес тейне удалась кой-мезе тиемс районти. Спасиба сятненди, кит лезнесть тейне, кирнезь ширезень!»
Мзярдовок аф юксни ёмла родинанц—Атюрьевскяй райононь Вирень Кярьгонять колга. Тяни тя велесь аш, но квалманза лятфнематне фалу эжнихть седи.
Газетаньконь корреспондентонцты сон мярьгсь тяфта: «Кельгса эсь шачема вастозень, Россиять, Мордовиять, Атюрьевскяй и Зубово-Полянскяй райоттнень, ломаттнень, конат эряйхть тяса».
Тяни Иван Стёпушкин пенсияса. Сон—трудонь ветеран, Российскяй Федерациянь просвещениянь отличник, Мордовия Республикань образованиянь Заслуженнай работник. Казьф МЧС-ть лемста «Содружество во имя спасения» медальса, Россиянь Государственнай Думать «За патриотическое воспитание молодёжи» медаленц мархта, «200 лет Российскому образованию» памятнай медальса, Мордовия Республикань Госсобраниять, Мордовия Республикань Правительствать Почётнай грамотаснон мархта… Но инь оцю казнекс лувондсы сянь, што ломаттне мяляфтсазь сонь тевонзон, кирдихть мархтонза соткст. Сяда лама, кле, аф эряви.
Тя афкукс тяфта. Иван Александрович эрь иланя, тяконь лувксса и 1 сентябрьста, Учителень шиста получси пяк лама поздравления.
Тячи мокшалять шачема шиц—юбилеец. Арьсетяма Иван Александровиченди кеме шумбраши, паваз, сембе цебярть!
Татьяна АЛЬШИНА.