Учительхть… Тядятне-алятне надияфнесазь теест сембода питнить, мезе ули эряфсост—кельгома идьснон. Учительть тевонь вятеманц эзда ащи ся, кода шабатне кармайхть тонафнема школаса, муйхть-аф марстонь кяль фкя-фкянь мархта и кодама ки синь кочкайхть эстеест сяда тов.
Ковылкинскяй райононь Сире Драка велень школаса работай лама ёню, асу учитель. Эрть колга ули кода азондомс аньцек шназь. Но тячи мяленьке содафтомс лувиеньконь учительхнень Вишнякофнень-Кудашофнень династияснон мархта, кона марса макссь тонафтыень тевти пцтай 170 киза.
Династиять ушедозе Агриппина Степановна Вишнякова, кона покодсь школаса нильгемонь кафксува киза. Сон вятезень химиянь и биологиянь урокнень, конат фалу ётнесть мялень салайста. Содаф, химиясь и биологиясь фкя инь стака предметтне, но Агриппина Степановна маштсь тёждяста и шарьхкодевиста пачфтемс шабатненди тонафневи материалть, сяс уроконза и кельговсть стирнятненди-цёранятненди. Урокта башка мокшавась вятсь учебно-воспитательнай работа, ульсь директорти заместителькс. Нильгемонь кафксува кизоста Агриппина Степановна Вишнякова касфтсь-воспитандась аф фкя тёжянь шаба. Мирдец, Фёдор Максимович, вятсь географиянь урокт и пцтай кемонь кизот ульсь школань директоркс. Тяни миртть-рьват Вишнякофне туфт эряфста, но учениксна най лятфнесазь синь пара валса.
Тядянь-алянь киге аськоляйхть Вишнякофнень идьсна: стирьсна, Мария Фёдоровна, и цёрасна, Михаил Фёдорович, кафцьке учительхть. Михаил Фёдорович аделазе М.Е.Евсевьевонь лемса педагогическяй институтонь (тяни университет) химиянь и биологиянь факультетть и мрдась шачема велезонза, лиссь работама тястонь школав. Шабатне най эряскодсть урокозонза, вдь синь ётнесть эсь лацоннекс, опыттнень-меснень тевс нолязь. А пингта меле эсь тевонь лац вяти учительсь путфоль школань директоркс. Михаил Фёдоровичень пингста ушедовсь школать од зданиянц строямац. Сонь пяк мялецоль, штоба велень шабатне сяда курокста ётальхть тонафнема тяниень пингонь, эрявикс од оборудованияса козякофтф школав, коса сембе уликссь лезнель сатнемс од сатфкст. И путозень тянкса сембе виензон.
А тяни пачкодеме главнай героеньконди—Николай Кузьмич и Мария Фёдоровна Кудашофненди, конат марса макссть школати пцтай сяда киза.
Николай Кузьмич мрдась Сире Драка шачема велень школазонза Зубово-Полянскяй педучилищать, а сяльде Н.П.Огарёвонь лемса Мордовскяй государственнай университетть шумордамдост меле географиянь учителькс. Од цёрась эстокиге шоворсь педагогическяй коллективти и лац примавсь ученикнень мархта. Тя и шарьхкотьф, вдь Николай Кузьмич маштсь и содазе кода саламс шабатнень мяльснон. Картать мархта работамась, викторинатне, стенгазетатне, кроссворттне—сембось тя нолявсь тевс уроконзон пингста. Сон сидеста сявондезень учениконзон экскурсияс. Улендсть Ульяновскяйса, Москуса, Киевса и лия ошнень эса.
Кемонь кизот Николай Кузьмич вятезе школаса аф класснай работать. Мокшалясь пяк лац морай баянца. Соньфтемонза ашезь ётне фкявок ила, мероприятия, фалу лисендсь сценать лангс иттнень мархта.
Николай Кузьмичень архивса лама школьнай эряфть колга фотографияда. Учениконзон мархта снимкатне учительти пяк питнихть, ванфнесыне оцю козяши лаца. Сидеста тарксесыне синь, лятфнесыне эсь выпускниконзон, конатнень тячемс сембонь мяляфтсыне лемснон. Эряви азомс, Николай Кузьмич тонафтсь-воспитандась достойнай ломатть, конат тячи трудендайхть ошева и велеса, улихть ётксост врачт, учительхть, военнайхть, строительхть и лия профессиянь представительхть.
Лама киза седикс-ваймокс покодеманкса Николай Кузьмич казьф оцю казнеса—Российскяй Федерациянь и Мордовия Республикань Образованиянь министерстватнень, Ковылкинскяй муниципальнай райононь оцюнять и районнай администрациянь образованиянь отделть Почётнай грамотаснон мархта. Тяни Николай Кузьмич аф работай, пенсияса, но школать, конанди сон максозе пяле веконь эряфонц, мзярдовок аф юкснесы.
Учителень тевти лемдезе эряфонц Николай Кузьмичень рьвац, Мария Фёдоровна. Сире Дракань школав сон сась М.Е.Евсевьевонь лемса Мордовскяй педагогическяй институтонь (тяни университет) филологическяй факультетть аделамдонза меле. Мокшавась тячемс мяляфтсы, кода васенцеда од учителькс аськолдась школать порогонц туркс.
—Тейне максозь вятемс ветеце класснень эса рузонь кяльть и литературать. Классне эста оцюфтольхть. Сувань и таколдома сявомань—лангозон надиязь ванць колмогемонь шаба. Эстокиге прясон ушедсть шарома мяльхне: кода иттне кармайхть вятема пряснон, и кода тейне вятема прязе мархтост? Карматама-аф фкя-фкянь шарьхкодема?—лятфнесы мокшавась.
Но таколдоманза шавотольхть, иттне пяк лац примазь од тонафтыть, сон арась теест аф аньцек учителькс, но и цебярь ялгакс.
Педагогонь профессиять колга Мария Фёдоровна арьсекшнесь ёт шабакс. Кельгозе «школаса» налхксеманц, а сонць най ванць и тонафнесь тядянц, Агриппина Степановнань, эзда, мялецоль улемс сонь лацонза.
—Эрь ломанть ули сонцень учителец, наставникоц, кона ащи кепотьксокс и кинь лангс ванозь минь кочксесаськ эряфонь киньконь. Тейне тяфтама ломанькс ульсь тядязе. А сяльде, мзярда сань ни школав работама, сембоса кепотьксонь сявома вастокс тейне арасть рузонь кялень учительхне Н.К.Родькина и В.М.Кузнецова, синь пяк ламоса тейне лездсть трудовой кизень ушедомста,—азозе Мария Фёдоровна.
Ся пингста ётась ни нильгемонь кафксува киза. Мария Фёдоровна Кудашовать мархта корхнемста няеви, конашкава сон кельгсы эсь тевонц и шабатнень, конатнень тонафнезень мзярда-бди и тонафнесыне тячи. Ингольдень учениконзон ёткста аф кржась кочказь эстеест учителень профессиять. Колмотне эздост работайхть Мария Фёдоровнань мархта фкя школаса: Александр Иванович Степанов вяти физкультурань урокт, Нина Фёдоровна Якушкина тонафтсыне шабатненди мокшень кяльть и литературать, Яков Иванович Ерёмкин вятьсы химиять. Кода няйсаськ, Мария Фёдоровна арась аф аньцек учителькс, но и наставникокс. И сонь трудоц аф лядонды апак приметак. Мокшавать арзяса лама казнеда, тяконь лувксса РФ-нь Образованиянь министерствать Почётнай грамотац.
Николай Кузьмич и Мария Фёдоровна Кудашофне тонафтсть-воспитандасть сядот шаба, конат тячемс кирдихть кеме соткст учительснон мархта, гайфнихть, сашендыхть инжикс. Синцень мирттнень-рьвятнень колма шабасна, кафта цёрат и стирь. Колмоцьконди макссть высшай образования. Тячи Кудашофне кеняртькшнихть уноконяснонды, конат сидеста сашендыхть ширезост.
Николай Кузьмич и Мария Фёдоровна арасть кельговиксокс аф аньцек ученикснонды, но и сембе велеряйхненди. И тянкса синь пяк павазуфт. Арьсетяма теест кеме шумбраши и сатфкст эряфса!
Ольга ЕВДОКИМОВА.