Галина Алямкина—образованиянь герой!

Аф кунара Саранскяйса Культурань республиканскяй Дворецса ётафтовсь оцю пуромкс, кона лемтьфоль Мордовиянь эряйхненди «Геройхнень пингсна» Народнай омбоце премиять максоманцты. Казьфнень-лауреаттнень ёткса ульсь газетаньконь кунардонь ялгац, Мордовия Республикань Заслуженнай учительсь, Россиянь Президентть Грантонц сатыец, Ковылкинань 3№ средняй общеобразовательнай школань рузонь кялень и литературань учительсь Галина Алямкина.

Галина Викторовна сяськсь «Образованиянь геройхне» номинацияса. Теенза Культурань республиканскяй Дворецть сценанц лангса «Геройхнень пингсна» статуэткать, дипломть, премиять казезень Пермьста начальнай классонь учительсь Наталия Шагулина. Сонцьке Наталия Васильевна—афкуксонь герой. 2018 кизоня 15 январьста вятсь урок нилеце класса тонафнихненди. Тя ёткть классу сувасть оцю класснень эса кафта тонафнихть, конат 17-ксть сялгозь учительницать пеельса. Но сон мусь вийхть лихтемс класста учениконзон. Несколька тонафнись стане жа сялкфоль пеельса, но, павазонди, сембе лядсть шиса. Наталия Васильевна кирдсь стака операция и ков ащесь больницяса. А меле мрдась тонафнихненди, конат сонь пяк учезь.
И вов тядде сон тертьфоль Саранскяи «Образованиянь геройхть» номинацияса сяськить казема. Галина Алямкина оцю мяльса примазе кядьстонза сатф казнеть!
Пуромксонь вятись пачфтезе, што Галина Викторовна 35 кизода ламос сотф образованиять мархта. Сон—педагогическяй пяк оцю династиянь, конань марстонь стажец 1000-да (!) лама киза, представитель!
Шачемас коре Галина Викторовна Ковылкинскяй райононь Новые Дубровки велеста. Тонафнесь Вечкенинскяй школаса и фалу примсесь участия общественнай эряфса: кайгиста и сёрматфти апак ватт лувондсь стихт, мазыста морась, лисендсь сяськикс олимпиадатнень и конкурснень эса.
Школать шумордазе зрнянь медаль мархта. Сяда тов поступась тонафнема Н.П.Огарёвонь лемса Мордовскяй государственнай университетть филологическяй факультетозонза.
Университетса тонафнемстовок Галина Викторовна васенцесель культурно-массовай сембе пуромкснень эса. Студенческяй советонь членоль. Ульсь стройотряттнень эса.
Филологическяй факультетса тонафнемста васьфтезе сай пингонь мирденц Анатолий Алямкинонь. И вов ни несколька кемотть киза синь марсот.
Мордовскяй государственнай университетть шумордамдонза меле кафцьке кучфтольхть работама Ковылкинскяй райононь Васильевскяй школав.
Тоса Галина Викторовна ушедсь работама рузонь кялень и литературань учителькс. 1988 кизоня семьясь ётафтфоль тяка райононь Гумны велень школав, коса учительсь поладозе эсь тевонц.
2009 кизоста сявомок Алямкиттне эряйхть Ковылкинаса.
Эняльдень Галина Викторовнанди пачфтемс педагогическяй династиять колга, конанди сувси сонць.
—Ламонцне раднянень ёткста лемдезь эряфснон учителень тевти. Монга сонь кочкайне аф стак. Тядязе, мокшавась Прасковья Родькина, пцтай 40 киза работась рузонь кялень и литературань, мокшень кялень и мокшэрзянь литературань учителькс Ковылкинскяй райононь Вечкенинскяй средняй школаса. Учителель алязевок, Виктор Родькин. Меле сон Мордовское Вечкенино велеса колхозонь парторголь. Тядязе содазень тяфтама писательхнень и поэттнень кода Илья Девинонь, Евдокия Терёшкинать, Анатолий Ежовонь, Валентина Мишанинать, лиятнень. Эрь уроконц ламос арьсекшнезе и тиендезе семботь, штоба ёталь мялень салайста, мяляфтовиста. Шачфтыезе ульсь школань завучекс, а меле—рузонь кялень и литературань, родной кялень и литературань учительхнень районнай методическяй объединенияснон заведующайкс»,—мярьгсь Галина Алямкина.
Сон оцю спасиба азсь маластонь и ичкоздень раднянзонды—учительхненди-словесникненди, конатнень лангс ванозь Галина Викторовна нинге шабакс ушедсь кельгомост валть и корхтамать.
«Кельгсайне эсь тевозень, учениконень, предметозень. Полафнян работань опытса работас коре ялганень мархта: ётафнян панжада урокт, рузонь кяльть и литературать коряс аф класснай пуромкст. Иттнень мархта примсетяма участия творческяй конкурснень, предметнай олимпиадатнень эса. И сатфксоньке кеняртьфтихть»,—поладозе Галина Викторовна.
Совестьс коре лама киза трудендаманкса сон казьф Российскяй Федерациянь Образованиянь и наукань министерствать, Мордовия Республикань Образованиянь министерствать Почётнай грамотаснон мархта, асу иттнень мархта работаманкса Почётнай грамотаса. Сатозе Россиянь Президентть, Ковылкинскяй муниципальнай райононь оцюнять Грантснон.
«Павазуван, мес кочкайне учителень тевть. Тянкса оцю спасиба тядязти. Арьсян, што рузонь кялень и литературань учительть профессияц ульсь, ули и кармай улема инь эрявиксокс. И хуш пингсь аф ащи фкя вастса и путни минь—валть и кяльть мархта работай педагокнень инголе од вешфкст, сембе сяка ульсть и лядыхть апак полафтт мазыста корхтамась, валть мазышиц, и, конешна, иттненди кельгомась»,—тяфтама валса шумордазе корхнеманьконь Галина Алямкина.
Премиять получаманц и Учителень малаткшни шить мархта тонь, Галина Викторовна!
Татьяна АЛЬШИНА.

Последние новости

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть...

«Варяг» крейсерть подвигоц

9 февральсь—Россиять военнай историясонза мяляфтови дата. Тя шиня 1904...

Мазыхть мокшень стиреньке

Кельгома морафтыеньке! 2025 кизоня «Мокшень правда» газетась сяда тов...

Рославльскяй Краснознамённай 326-це стрелковай дивизиясь пуроптфоль Саранскяйса

Тядде васьфтьсаськ оцюдонга оцю илать—Великай Сяськомать 80 кизонь топодеманц....

Эрявикс кизефксненди—башка мяль

Ётай недялять Саранскяйса, Республикань Кудса, ётафтовсь Мордовия Республикань сисемце...

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя Администрации Главы Республики Мордовия и Правительства Республики Мордовия – руководителя Пресс-службы Главы Республики Мордовия Елены...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть эзга 4№ полициянь отделу пшкядсь ошень 65 кизоса авась, кона пачфтсь вете тёжяньда лама цалковаенц...