21 апрельста Саранскяень 11№ школать од корпуссонза тифтольхть итокт «Мордовия Республикань кизонь учительсь—2025» конкурсти. Торжественнай мероприятияса примась участия региононь Оцюнясь Артём Здунов.
«Аф аньцек содамошитнень коряс кочксеви сяськись, мяльс сявондевихть и лия цебярь ширетне, конатнень макссесасть учениконтенди. Минь надияфнесаськ учительхненди сембода питнить—шабаньконь,—китькстазе профессиять важнайшинц республикань руководительсь.—Курок кармай великай илась—Сяськомань шись. Тяни минь боецоньке аралакшнесазь Россиять границанзон специальнай военнай операцияса. Эрь тяфтама ломанть, кона «тиф» стальста, воспитандазь простой учительхне. Школась—тя аф аньцек содамошинь и маштомошинь фабрика, тя оцюдонга оцю воспитательнай процесс! Сюконятама теенть карксэземга!»
Артём Здунов стане жа шарфтсь мяль, што Мордовиять ширенц кирнесазь Россиянь Просвещениянь министерствась, странань Президентсь—сембось тя лезни виияфнемс образовательнай инфраструктурать. Тя работась поладови сяда тов.
Тядде профмастерствань конкурсса примась участия 21 учитель. Синь маштомошиснонды и тонафнемань передовой методснонды оценка макссь жюрись, коза сувасть конкурсонь тяда ингольдень кизонь сяськихне. Аф тёждя испытаниятнень пингста кочкафтольхть вете суперфиналисттне: 2№ Комсомольскяй школань начальнай классонь учительсь Марина Ефимкина, Большеберезниковскяй школань «Школа №2» обособленнай структурнай подразделениянь рузонь кялень и литературань тонафтысь Марина Танаева, Рузаевкань 5№ школань информатикань и математикань учительсь Татьяна Чавкина, Советскяй Союзонь Геройть М.П.Девятаевонь лемса «Высота» 15№ образованиянь центрань химиянь тонафтысь Екатерина Чугунова и Торбеевань 1№ школань начальнай классонь учительсь Олеся Шлаева.
«Мордовия Республикань кизонь учительсь—2025» конкурсонь сяськикс арась «Высота» 15№ образованиянь центрань химиянь тонафтысь Екатерина Александровна Чугунова. Каршек валсонза ширень кирдеманкса, кельгоманкса и мялень шарфтоманкса сон спасибась аф аньцек радня и мала ломанензонды, но и «Высота» образованиянь центрань школьнай семьянцты—покоди ялганзонды, учениконзонды и синь тядяснонды-аляснонды.
—«Кизонь учительсь» конкурсса участвовандамать вельде минь получсетяма оцюдонга оцю опыт, касонттама-вииякшнетяма. Конкурссь нинге весть няфтезе, што учительсь—аф аньцек профессия, тя призвания! Мон павазуван, мес арань Мордовиянь оцю педагогическяй сообществати пяльксокс,—мярьгсь Екатерина Чугунова.
«Мордовия Республикань кизонь учительсь—2025» конкурсонь сяськись няфтьсы Мордовиять всероссийскяй уровеньца.