Атерь велень 1№ средняй общеобразовательнай школась тядде отмечасы 90 кизонь юбилеенц. 1935 кизоня земской школаста сон тифоль средняйкс. Васенце директоркс ульсь Василий Григорьевич Козяев. Средняй школать панжемда меле Атери састь покодема Н.В.Зилов, И.Я.Яркин, М.Д.Дёмкина, К.С.Михайлова, И.М.Понищев, В.И.Ерюшев и лиятне.
Сисем кизода меле ушедсь Великай Отечественнай войнась. Школань ламоц учительхне и выпускникне тусть немецко-фашистскяй захватчикнень каршес тюрема. Ламотне ашесть мрда войнаста. А кит мрдасть, пцтай 40-50 киза макссть тя школати. Нят Мордовскяй АССР-нь Заслуженнай учительхне Н.Н.Боронин, М.П.Кшнякин, М.В.Кондрашкин, учительхне Н.Т.Андин, М.П.Кабаев, И.Д.Шишканов, техническяй работникне Н.М.Царёв, С.И.Тишкин, Г.Н.Царёв и лиятне. Войнань и войнада мельдень инь стака кизотнень школаса трудендась Мордовскяй АССР-нь Заслуженнай учительсь П.Д.Горькина.
Войнада меле школась лувондовсь инь оцюкс Атюрьевскяй районца. Тяса покодсь лама содаф ломань. Нят: Ф.Н.Стяпин, П.А.Чикина, Е.П.Волкова, Н.В.Сивова, И.Е.Лукина, Е.М.Стяпина, М.Я.Зеленов и лиятне. Улихть ётксост МР-нь Заслуженнай учительхть, образованиянь Заслуженнай работникт, РФ-нь общай образованиянь Почётнай работникт. Ламотне казьфт РФ-нь образованиянь министерствать Почётнай грамотанц мархта. Школаса тянемс прянь шнафтозь, гордостень марязь корхнихть РСФСР-нь Заслуженнай учительть П.Ф.Ведяковать, И.И.Кшнякинонь, М.С.Тишкинать, М.Ф.Буинать, Г.Е.Бельскаять, А.И.Тагинать, А.Г.Ерёмкинать и лиятнень колга, конат тя школати макссть 35-40 киза.
Тячи школань коллективса покоди 40 педагог. Тяза учительда башка сувсихть воспитательхне, старшай вожатайсь, психологсь, библиотекарсь. Школаса трудендай кемнилие техническяй работник. Эрь шиня Атерь велень 1№ средняй общеобразовательнай школаса содамошит пуропни 335 ученик. Атерень шабада башка тяза тонафнема школьнай автобусса усксевихть итть Кяшалста, Перевесьяста, Рузонь Велязьмаста, Ташта веленяста.
«Образование» национальнай проектть коряс школаса панчфт «Точка роста» кабинетт. Инксост отвечай В.В.Асессоров. Сон тевонь содай, козя опыт мархта специалист. Лама киза трудендакшнесь физикань учителькс Стрельниковань, Торбеевань 2№ средняй общеобразовательнай школатнень эса. Мекольдень кизотнень покоди райцентрань 1№ средняй общеобразовательнай школаса. «Точка роста» кабинеттне панчфт химиянь, биологиянь, физикань, экологиянь направлениятнень коряс. Кода дополнительнай образования тяса тевс сувафтф «Художественная обработка дерева» проектсь. Тя ширеть инкса отвечай О.В.Волков. Учениконза примсихть участия пялькстоматнень эса и занцихть призовой вастт.
Школаса информатикань кафта кабинетт, конатнень вятьсазь козя опыт мархта учительхне Е.П.Артюшкина, О.И.Сяткина. Ули географиянь кабинет, конань инкса отвечай Е.В.Балашова. Екатерина Васильевна фкя кизоня примась участия «Кизонь инь цебярь учительсь» пялькстомаса. Районца лиссь сяськикс. Стирнятненди панчф трудонь кабинет, коса шабатне тонафнихть стама, кудонь тефненди. Иттнень мархта работай Т.М.Пронькина. Спортть инкса школаса отвечай А.И.Надин. Сонь воспитанниконза занцесазь васенце васттнень республиканскяй и районнай пялькстоматнень эса.
Аш кода ётамс химиянь и биологиянь кабинетть вакска, конань инкса отвечай Е.М.Ведякова.
Тя школаса тонафнихть эрь-кодама национальностень шабат. Но сембодонга лама ученикта мокшень семьяста. Башка мяль шарфневи мокшень кяльть и мокшэрзянь литературать тонафнемаснонды. Ня урокнень вятьсазь М.Е.Равочкина, С.И.Татарова. Синь сидеста ётафнихть панжада урокт, аф класснай мероприятият. Лама тиендихть мокшень койхнень-обуцятнень ванфтоманкса.
2022 кизоста сявомок школаса панжезень эсь кенкшензон музейсь, кона азонды велеть историянц, пара тевонзон и трудонь кельги ломанензон колга.
Кемзисемге киза Атерь велень 1№ средняй общеобразовательнай школаса директоркс покоди С.Ф.Мозгунов. Сонь кафта завученза—О.И.Сяткина и Т.С.Царёва, советникоц—Г.С.Костькина. Коллективсь школаса оцю, трудонь кельги. Аньцек шнамань валса корхнихть А.М.Сенькинать, А.И.Игнатовать, Н.Е.Вергасовать, Т.А.Ивашкинать, Т.А.Сиркинать, Е.П.Артюшкинать и лиятнень колга.
Школаса ётафневихть районнай семинархне, оцю илатне. Кепотьксонди, аф кунара тяса ётафтовсь «Райононь инь цебярь учительсь» пялькстомась. Эсонза примасть участия райцентрань 1№, 2№, Каргоньжяень школань учительхне С.Ф.Мозгунов, Н.Д.Волгапкина, Л.Н.Трегулова. Сяськикс лиссь С.Ф.Мозгунов. Сон историянь учитель.
Вейхксогемонь кизоста тя школать аделазе лама содаф ломань. Синь ётксост Советскяй Союзонь Геройсь А.Г.Махров, медицинскяй наукань докторсь, профессорсь И.Н.Пиксин, Россиянь Заслуженнай юристсь, МР-нь ингольдень прокурорсь П.Е.Сенькин, политиксь и общественнай деятельсь И.М.Кшнякин и ламотне лиятне. Од поколениянь кой-кона выпускникне примайхть участия СВО-са. Синь инксост школаса маряйхть оцю гордость. Сембоса кепотьксокс райононь лия школатнень ученикснонды ащихть и тячиень тонафнихне. Синь предметнай олимпиадань призёрхт и сяськихть, лама пялькстомань участникт. Примсихть участия районца, республикаса ётафневи сембе мероприятиятнень эса. Школань директорсь С.Ф.Мозгунов лама шнама вал азсь кефкиеце класса тонафнихнень Дмитрий Михалёвонь, Дарья Сивовать, Мария Тулинать, Денис Поршинонь, Юлия Тремаскинать, Александр Ташкаевонь, Денис Алямкинонь колга.
Кемоньце класса тонафнихне Николай Резков, Лера Андреева, Анастасия Чевтайкина, Олеся Адышкина, Маша Полькина, Лиза Зинина, Роман Полькин мезьсовок аф лядондыхть эсь оцю ялгаснон эзда. Лисендихть сяськикс олимпиадатнень эса. Синь—школать вандыец и сембоса надияма вастоц.
Школаса эрь шиня лаказь-лакайхть тефне, ётафневихть пуромкст, васедемат. Тяни Атерь велень 2№ средняй общеобразовательнай школаса моли оцю ремонт. Иттне, а синь эздост 164 ломань, тонафнихть тя школаса. Ответственностсь кассь кафтонь-крда. Но, кода азозе С.Ф.Мозгунов, сембе занятиятне, мероприятиятне ётнихть графикс коре. Тяни кафцьке школань коллектифнень сембе вийсна водендафт сянди, штоба васьфтемс Великай Сяськомать 80 кизонь топодеманц. Ётафневихть экскурсият, Мужествань урокт, СВО-нь участникнень мархта васедемат, рисункань выставкат. Тевда инголе лама.
Илья Вешкин.