Инь оцю казнесь теенза—учениконзон сатфкссна

Атерь велень 2№ средняй общеобразовательнай школаса покоди смузю, козя опыт мархта лама ломань. Фкясь ёткстост мокшавась, рузонь, мокшень кялень и литературань учительсь О.А.Цымдянкина. Тонафтыень тевти макссь комозьда лама киза.
Ольга Андреевна шачсь и кассь Атерь велеса трудонь кельги семьяса. Тядянза-алянза простой ломаттельхть. Трудендакшнесть «Ремстройжилбыт» участкаса, «Память Ильича» колхозса. Синцень ашель высшай образованиясна, а стирьснонды мезевок ашесть ужяльде. Сембе аделасть вуст, покодихть цебярь вастса.
Ольга Андреевна аф кальдявста шумордазе Атерь велень 2№ средняй общеобразовательнай школать. Поступась тонафнема Мордовскяй госуниверситетонь филологическяй факультетонь мокшэрзянь отделенияв. 1994 кизоня аделазе сонь. Лиссь рьвакс Кяшалонь цёрати Виктор Цымдянкинонди. Виктор Васильевич эста тонафнесь Рязанень Правань и экономикань академияса. Свадьбань налхкомда меле од рьвяц арьсесь тумс Рязани мирденц мархта. Колма кизода меле Виктор Васильевич аделазе тонафнеманц, васенда покодсь Краснослободскяень, сяльде Атерень внутренняй тевонь отделса следователькс. А Ольга Андреевнань сявозь работама эсь родной школазонза. Вятьсь мокшень кялень и мокшэрзянь литературань урокт. Оцю кельгомаса шачфтозь и касфтозь эсь кафта идьснон. Оцюсь, Елизавета Викторовна, тусь тядянц киге, сон аделазе тяка жа школать, тяка жа вузонь отделениять. Тяни покоди рузонь кялень и литературань учителькс Подольскяйса. Елизавета Викторовна класснай руководитель ветеце класса. Аф кунара лиссь рьвакс. Мирдец, кода и аляц, трудендай полициянь отделса. Цымдянкиттнень цёрасна, Максим, аделазе Мордовскяй госниверситетонь велень хозяйствань механизациянь и электрофикациянь факультетть. Тяни служай армияса Хабаровскяйса.
О.А.Цымдянкинать эрь шиц пяшксе тевда. Урокта башка сон нинге класснай руководитель. Тядде нолдазе 11 классть. Тяфтак классоц оцюволь, но вейхксоце класста меле лядондсть кафкса ученикт. Синь аф кальдявста максозь единай государственнай экзаменцнон. Кототне эздост поступасть вузу, кафттне—колледжу. Полина Суйкова тонафни правовой академияса, Виктория Шумкина тусь Нижняй Новгороду, тонафни экономистокс. Николай Канайкин поступась тонафнема Мордовскяй госуниверситетонь строительнай факультету. Класснай руководительсна шнафты мархтост пря. Синь аф кальдявста тонафнесть школаса, ульсть сембоса кепотьксокс.
Тонафнемань тя кизоня О.А.Цымдянкинать од классоц. Тяни сон класснай руководитель ветеце класса. Тяса сембоц кемонь шабат. Мархтост покодемась аф тёждя. Иттнень школьнай автобусса усксесазь тонафнема Каменкаста, Усть-Рахмановкаста, Дмитриево-Усадста. Работа мархтост вятеви оцю.
О.А.Цымдянкинась ся ломаттнень эзда, конат аф кельгсазь фкя вастса ащемаснон. Сон примси активнай участия школаса, районца ётафневи илатнень эса. Аф кальдяв результат няфтьсь «Кизонь инь цебярь тонафтысь» пялькстомаса. Ученицац Елена Сунгаева занязе васенце вастть сочинениянь конкурсса.
Ня шитнень примась участия «Нациянь кросс» пялькстомаса. Лиссь сяськикс, нолдамок инголенза аньцек школань директорть О.С.Козяйкинать.
Кода корхнихть, тевс коре казнетневок. Цебярьста покодеманкса Российскяй Федерациянь Просвещениянь министерствась казезе Ольга Андреевнань Почётнай грамотаса. Улихть казненза Национальнай политикань, Образованиянь министерстватнень, Атерень райононь администрациять, школань дирекциять эзда. А инь оцю казнесь теенза—учениконзон сатфкссна.
Илья Вешкин.