Школьнай учительть лангса фалу ащи оцю ответственность, вдь сон отвечай касы поколениять сяда товолдонь эряфонц, мярьголень, судьбанц инкса. Тянь пяк лац содасазь Темникавста мирттне-рьвятне Лариса и Юрий Шукшиттне. Лариса Фёдоровна и Юрий Серафимович—Советскяй Союзонь Геройть А.И.Семиковонь лемса Темниковскяй средняй общеобразовательнай школань учительхть. Мокшень ня ломаттнень трудовой марстонь стажсна 56 киза—тняра макссть кельгома тевснонды и мольфтьсазь сонь сяда тов.
Лариса Фёдоровна 1996 кизоня шумордазе Н.П.Огарёвонь лемса Мордовскяй государственнай университетонь филологическяй факультетть «Филология» специальностьс коре. Тяни сон—квалификационнай васенце категориянь учитель.
Вузть шумордамдонза меле работась мокшень кялень и мокшэрзянь литературань учителькс Темниковскяй райононь Подгорно-Канаковскяй средняй школаса. Сяда тов ётафтфоль рузонь кялень и литературань учителькс Лесно-Цибаевскяй общеобразовательнай школав. 2010 кизоста сявомок мокшавась вяти рузонь кялень и литературань урокт Советскяй Союзонь Геройть А.И.Семиковонь лемса Темниковскяй средняй общеобразовательнай школаса. Трудовой стажец—27 киза. Кода класснай руководитель, нолдась школаса тонафниень кафта поколеният. Тяниень пингть Лариса Фёдоровна—класснай руководитель юнай инспекторонь движениянь (ЮИД) класса.
«Рузонь кялень и литературань учителян и содаса, конашка ответственность ащи лангсон. Вдь рузонь кяльсь—экзаметтнень максомста, аттестатть получамста основной предметсь. Сяс вешфксневок тя предметти аш ни кода оцюфт»,—мярьгсь Лариса Шукшина корреспондентоньконь мархта корхнемста.
Тевонц тиемста Лариса Фёдоровна тевс нолясыне методическяй рекомендациятнень, практическяй материалхнень, тонафнемань пособиятнень, а нинге—цифровой предметно-техническяй материалхнень.
Урокста тонафнихне тиендихть тестовай заданият самоконтроленди, тонафнеф материалть лятфтаманц инкса, зачётнай итоговай контрольнай работатнень ётафтомста.
Тага макстама вал Лариса Шукшинати, кона пара мяльса азонды эсь работанц колга: «Тесттнень мархта покодемста тевс нолясайне работань колма форматнень: коллективнайть, групповойть, индивидуальнайть. Контролень урокнень пингста улендихть аф фкя лацонь уровенень тестовай заданият. Тя сембось вятни практическяй, теоретическяй и содамошинь касфты результаттненди. И работань тяфтама формась тушенды тонафнихнень мяльс. Теест сяда тов ули кода анокламс итоговай аттестацияти предметть коряс и синь содасазь, коста сяда тов ули кода получамс эрявикс информациять, ламотнень эвондакшни мяльсна сяда тов тонафнемс темать».
Эсь инновационнай педагогическяй опытонц колга мокшавась анок азондомс пяк и пяк ламос, сяс мес учителень тевонцты путнесы марнек ваймонц. И результаттневок корхтайхть эсь колгаст. Лариса Фёдоровнань учениконза аф весть лисендсть и лисендихть сяськикс и призёркс олимпиадатнень, конкурснень эса. Сонць учительсь сидеста тиенди доклатт рузонь кялень и литературань учительхнень школьнай методическяй объединенияснон эса. Темат кочкси стамот, конат отвечайхть тячиень шить вешфксонзонды, мялень салайхть. Ётафни панжада урокт и аф класснай мероприятият школань учительхненди.
Школаса работай учительсь эрь учениконцты уленди аф аньцек тонафтыкс, но и лездыкс, кизос коре сяда оцю, пара ялгакс. Лиякс азомс, наставникокс. Тяфта ащи тевсь и Лариса Шукшинать мархта.
Тевонь содай, оцю стаж мархта учитель Лариса Фёдоровнань полац—Юрий Серафимович.
Мокшалясь М.Е.Евсевьевонь лемса Мордовскяй государственнай педагогическяй институтть шумордамдонза меле получась «Физика с дополнительной специальностью математика» специальностьс коре диплом. Работась Лесно-Ардашевскяй общеобразовательнай школаса. 2018 кизоста сявомок Юрий Шукшин специальностьс коре работай Советскяй Союзонь Геройть А.И.Семиковонь лемса Темниковскяй средняй общеобразовательнай школаса. Трудовой стажец—29 киза. Сон, кода и кельгома рьвац, аф аньцек учитель, но и тонафнихненди эрь тевса лезды.
Шукшиттнень кафта идьсна. Мокшень стирьхне пяк кельгсазь родной кяльть, башка мяль шарфнихть шачема ширеть историянцты.
Анна шумордазе Саровскяй Физико-математическяй институтть. Лядсь эряма Саров ошу, коса работай специальностьс коре. Ксения тядде шумордазе 11 классть. Школаса тонафнемста стирьхне тяшнесть исследовательскяй работат, конат аф весть занцесть призовой вастт научно-практическяй ламоц конференциятнень эса. Школаса этнографическяй музейть эвондамдонза меле Ксения Шукшина ушедсь ётафнема тоса экскурсият. Инжихненди пачфнесь мокшетнень эряфснон-ащефснон колга. Весть тяфтама экскурсияса ульсь и Мордовия Республикань Оцюнясь Артём Здунов.
Ксения пяк кельгсы спортть. Сон—мини-лаптать коряс Мордовиянь сборнайть команданц капитаноц. Аф весть аралакшнезе Мордовия Республикать честенц Анапа ошса ётафтф пялькстоматнень пингста. Сяськондсь шра лангонь теннисть коряс районнай пялькстоматнень эса.
Учителень тя семьясь тяни эряй Темников ошса. Лариса Фёдоровна и Юрий Серафимович строясть куд, озафтсть сад. Кельгсазь модать мархта покодемаснон. Касфнихть перень сёрот, озафнихть виноград, пирьфсна тундаста сявомок сёксень кельмотнень самс вайси мазы панчфнень потмос.
Юрий Серафимовичень инь кельгома тевонзон ёткс сувси калонь кунцемась.
Педагогонь и наставниконь кизоня Лариса и Юрий Шукшиттнень пяк лама пландост, конат сотфт учителень тевснон мархта. Инь оцю кенярдемась теест—тонафнихнень сатфкссна!
Татьяна Альшина.