Кафта сазорхт

Атюрьевскяй райононь Мокшень Козловкань средняй общеобразовательнай школаса покодихть кафта сазорхне, рузонь, мокшень кялень и литературань тонафтыхне, высшай категориянь специалисттне Н.Н.Гераськина и Л.Н.Трегулова. Синь шачсть и кассть Сурайкиттнень семьяса. Родительсна, Николай Фролович и Татьяна Тимофеевна, сембонь тиезь сянкса, штоба идьсна получальхть высшай образования, аральхть цебярь ломанькс. И тя теест удалась.
Нина Николаевнань и Людмила Николаевнань лемсна лац содафт Атерень районца. Эсь тонафты ялгаснонды макссть аф фкя панжада урок, мероприятия. Тонафнисна фалу сявондихть васенце вастт мокшень, рузонь кялень и литературань олимпиадатнень, творческяй секциятнень и лия пялькстоматнень эса.
Оцю авторитетсна школань коллективса. Кеняртьфти ся, што школаса панчсть краеведческяй уженя, кона аф пелезь можна лемдемс ёмла музейкс. Тяса ули сембось. Тянкса аф кржа вий макссть и учительхне-сазорхне. Тяни тяса ётафневихть панжада урокт, кодама повсь илат. Сувсихть ваномонза велеряйхне. И тя кеподи мяль.
Илья ВЕШКИН.
Снимкаса: Н.Н.Гераськина и Л.Н.Трегулова.