2023 кизоня Атюрьевскяй райононь Крхтаж велень средняй общеобразовательнай школань историянь и обществознаниянь учительть Н.Н.Сиркинать эряфсонза ламоль мяляфтови событияда. Но фкясь эздост аф юкстави мзярдовок. Мордовия Республикань Оцюнять А.А.Здуновонь Указонц мархта теенза максф «Мордовия Республикань Заслуженнай учитель» почётнай лем. Оцю казнеть мархта сонь поздравляндазь школань дирекциясь, учитель ялганза, тонафнихне и синь тядясна-алясна.
Наталья Николаевна—оцю квалификациянь специалист. 2015 кизоста сявомок и тячемс вятьсы школань историко-краеведческяй музейть, конань ули кода лемдемс Атерь аймаконь духовнай и культурно-историческяй центракс. Наталья Сиркинась лама тись сянкса, штоба сон панжеволь. Кочкась экспонатт Оброчнай, Крхтаж велетнень эзга. Тяни музейса ётафневихть панжада урокт, экскурсият.
Н.Н.Сиркинать тонафниенза сатнихть оцю сатфкст эрь-кодама пялькстоматнень эса. Сембонь лемсна афи лятфтавихть. Кепотьксонди, оцю сатфкст занясть «Эрек культурась: койхне и тяниень пингсь», «Од архивист», «Од исследователь», «Музеень час» Российскяй пялькстоматнень эса. Мекольдень вете кизотнень Наталья Николаевна аноклась историять и обществознаниять коряс олимпиадань комсь сяськи и призёр.
Сиркинась лама киза вяти общественнай оцю работа. Сон райононь историянь учительхнень аттестациянь экспертнай группань член, «Кизонь инь цебярь учительсь» пялькстомань эксперт, правань, обществознаниянь, историянь, предметнай олимпиадаса иттнень работаснон проверямаса жюринь председатель, школань управляющай Советонь оцюня. Велеряйхне кочказь Н.Н.Сиркинать Крхтаж велень Советонь поселениянь депутаткс. И тясовок тевонзон вятьсыне аф кальдявста. Аф стак «Россиянь авань союзсь» казезе Почётнай грамотаса. Наталья Сиркинась—оцю букваста учитель, эсь тевонь кельги ломань. Сон казьф Российскяй Федерациянь Образованиянь и наукань министерствать Почётнай грамотанц мархта. Од поколениять патриотическяй воспитандаманц инкса Мордовия Республикань Образованиясь казезе Благодарностьса. Улихть и лия казненза.
—Наталья Николаевнань эзда тонафнихть и сявондихть пример школань и од, и сире учительхне,—корхтай школань завучсь С.И.Чумарова.—Коса Сиркинась, тосот и сатфксне, и кенярдематне. Трудендай виень аф ужяльдезь. Эрь тевти кярьмотькшни пара мяльса.
Кепотьксокс Крхтаж велень поселенияса ащи и Наталья Николаевнань семьяц. Мирдец, Сергей Михайлович, велень хозяйствань специалист. Сонь высшай образованияц. Лама киза трудендась райононь хозяйстватнень эса главнай зоотехникокс. Тяни вахтань методса якай Москуву добувама. Полатне касфтсть кафта цёрат. Синь высшай образованиясна. Эряйхть Москуса. Хуш Наталья Николаевна и рузава, но венеми минценнети, мокшеннети.
Илья ВЕШКИН.
Снимкаса: Н.Н.Сиркина.