Кода ётась 2024 кизонь ЕГЭ-сь

1 июньцта Мордовиянь Оцюнясь Артём Здунов васенце вице-премьерть Галина Лотвановать и республикань образованиянь министрть Елена Солдатовать мархта корхтафтозь средняй общай образованиянь образовательнай программатнень коряс государственнай итоговай аттестациянь предварительнай итокнень.
Единай государственнай экзамен республикасонк макссть 2902 ломань, эздост 2763-сь—тя кизонь выпускникт. Кода китькстазе Елена Солдатова, ЕГЭ-нь максомань пункттнень эса шабатнень аф пелезь улемаснон обеспечендаманц коряс работась ладяфоль лац. Экзаметтнень ётафтомаснонды водендафтольхть общественнай наблюдательхть, работась онлайн-видеонаблюдениянь мольфтеманкса Республиканскяй ситуационно-информационнай центра («Педагог13» центрать видеса). Лангс лихтьфтольхть ГИА-нь ётафтомань порядкань вешфкснень коламань 8 случайхть, ня выпускникнень результатсна аннулировандафт, теест апак макст права одукс максомс экзаметтнень тядде.
Кассь математикать и естественно-научнай профилень предметтнень коряс средняй баллсь. 16 ломанць получась ЕГЭ-са 100 балл (меля тяфтама результатта ульсь сисем).
Тонафнемань инь цебярь качества сембе экзаметтнень коряс, кода азозе Галина Лотванова, няфтсь Асу шабатненди республиканскяй лицейсь.
Тядде выпускникнень эвондась правасна одукс максомс единай государственнай экзаменть предметтнень ёткста фкять коряс. Кода пачфтезе Елена Солдатова, тиемс тянь ули кода 4 и 5 июльста.
Лятфтасаськ, ЕГЭ-ть одукс максоманц колга инициатива мархта выступандась Россиянь Президентсь Владимир Путин Федеральнай Собранияти Посланиянц пингста.