Колмогемоньда лама киза тонафты мокшень кяльть кельгома

Нина Яковлевна Алёнинать содаса нильгемоньда лама киза. Нинге Крхтаж велень средняй общеобразовательнай школаса тонафнемста, а тя ульсь ётай веконь кафксогемонце кизотнень кучкаста, сон аф весть аралакшнезе школать честенц, мокшень кялень и мокшэрзянь литературань олимпиадатнень эса лисендсь сяськикс. Велень стирняти кепотьксокс фалу ащесть мокшень, рузонь кялень и литературань тонафтыенза А.Н.Фролова, Т.М.Мелёшкина, И.П.Бурнашкина. Синь лангозост ванозь и кочказе учителень тевть.
Шачсь Нина Яковлевна Атюрьевскяй райононь Крхтаж велеса Полькиттнень семьяса. Пяк рана лядсь аляфтома. Тядянцты савсь ськамонза касфтомс ёмла шабатнень. Трудонь кельги мокшавась макссь идензонды цебярь образования, воспитания. Нинаське аньцек «ветес» тонафнесь школаса. Лама лувондсь рузонь, мокшень кяльса книгада. Фалу венемсь минценнети, мокшеннети. Пяк кельгозень А.Малькинонь, И.Кудашкинонь, С.Кинякинонь, С.Самошкинонь и мокшень лия поэттнень стихснон. Морсесь фольклорнай ансамбльса.
Школать аделамда меле содамошинь пуропнема поступась Н.П.Огарёвонь лемса Мордовскяй госуниверситетонь филологическяй факультетонь мокшэрзянь отделенияв. Тонафнезь тяфтама содаф учёнайхне, кода К.И.Ананьина, В.М.Имярекова, С.И.Липатов, Н.С.Алямкин, М.Г.Имяреков и лиятне. Нина Полькинась примсесь активнай участия эрь кизонь Огарёвскяй лувоматнень эса, тиендсь мялень салай доклатт. Аньцек цебярь ширде няфтезе прянц фольклорнай и лия практикатнень эса. Вузть аделамдонза меле преподавательхне кошярязь лядомс аспирантурав, но мокшень стирсь кочказе эсь родной школанц. И вестевок ашезь каенда. Тяса сон музе эсь вастонц. Васенце аськолксонь тиемста теенза лезнесть кельгома учителенза Н.И.Бурнашкин, Н.И.Сургаева, Т.М.Мелёшкина, Р.Г.Ионова, А.Н.Фролова и ламотне лиятне.
И вов ни 35 киза Н.Я.Алёнина покоди тя школаса мокшень, рузонь кялень и литературань учителькс. Сонь высшай квалификационнай категорияц. Школаса покодемста эсь прянц няфтезе грамотнай методистокс, творческяй работникокс, ответственнай специалистокс. Лац содасы эсь предметонц, уроксонза нолясыне тевс тонафнемань од технологиятнень. Учениконза эрь кизоня лисендихть сяськикс, призёркс предметнай олимпиадатнень эса, примсихть участия республиканскяй, межрегиональнай и федеральнай уровенень пялькстоматнень эса, тяшнихть научно-исследовательскяй работат. Кепотьксонди, «Малькинонь лямбе кинзон-янонзон эзга» научно-исследовательскяй работать мархта ученицац Виктория Мелёшкина лисендсь призёркс Международнай фестивалень региональнай турса. И тяфтама кепотькста можна лятфтамс лама.
Тяни Нина Яковлевна класснай руководитель вейхксоце класса. Классонза кемонь ученикт. Шабатне сембе активнайхть. Аш стама ила, коса синь афольхть прима участия. И сидеста лисендихть сяськикс. Классонза кеме дисциплинась. Башка мяль Алёнинась шарфни сянди, штоба иттне мульхть фкя-фкянь мархта марстонь кяль, улельхть примеркс ёмлатненди. Сонць тонафтысь кизоста кизос касфнесы эсь профессиональнай маштомошинзон, примси участия разнай уровенень педагогическяй конференциятнень, профессиональнай пялькстоматнень эса, ётафни семинархт, мастер-класст, панжада урокт.
Крхтажень школань коллективса Нина Яковлевнань оцю авторитетоц. Од тонафтыхненди сон ащи кепотьксокс. Мокшавась цебярь ялга. Сонь лангозонза ули кода надиямс. Аф фкя киза трудендай С.И.Чумаровать, М.Н.Алёшкинать, Т.А.Маскайкинать, Н.А.Пиксаевать, Т.И.Анисимовать и лиятнень мархта. И сембе синь колганза корхнихть аньцек шнамань валса.
Тяфта ни лиссь эряфса, што Н.Я.Алёнинать мирдец тусь эряфста пяк рана, ёфси одняста кадозе удавакс. Но эсь сатфксонзон мархта касфнесы мокшавать мяленц цёрац Игнат. Сон семьянц мархта эряй Москуса. Тядянц варжама, шачема-касома кудозонза сашенды сидеста.
Нина Яковлевнань трудоц апак приметак ашезь ляда. Сон казьф лама оцю казнеса: Мордовия Республикань Оцюнять Благодарностенц, МР-нь Образованиянь министерствать Почётнай грамотанц мархта и лияса.
Ня шитнень мокшавась отмечазе 55 кизонь юбилеенц. Илацень мархта, Нина Яковлевна! Кеме шумбраши тейть и оцю паваз!
Илья Вешкин.