КОСА ШАЧСЬ, ТОСА И КОНДЯСТСЬ

Газетаньконь тячиень номерсонза оцю мяльса пачфттяма Рузаевскяй муниципальнай райононь Левжа мокшень велень средняй общеобразовательнай школань начальнай классонь учительть, Россий-скяй Федерациянь общай образованиянь Почётнай работникть, мокшавать Анна Дивеевать колга.
Шачсь Анна Максимовна Левжаса Канаефнень лама идень семьяса. Тядянза-алянза, Анастасия Дмитриевна и Максим Васильевич, касфтсть сисем шабат: ниле стирьхть и колма цёрат. Анна инь ёмласель.
Мес сон кочказе учителень аф тёждя тевть? Тя кизефксть лангс фкя лацонь ответ Анна Максимовнанди аф максови тячемс. Семьясост идень тонафтыхть ашельхть. Пади, учительхнень лангс ванозь, Левжань стирсь сась мяльс улемс лацост.
Анна Максимовна 1987 кизоня шумордазе Н.П.Огарёвонь лемса Мордовскяй государственнай университетонь филологическяй факультетть «Мордовский язык и литература, русский язык и литература» специальностьс коре. И мрдась ёмла родиназонза—Левжав.
1989 кизоста сявомок мокшавась работай начальнай классонь учителькс тя велень школаса. Аф стака лувомс, педагогическяй работань стажец 35 киза ни!
Анна Максимовна—тевонь содай, асу педагог, оцю букваста Учитель. Шабатнень мархта работамста мокшавась арась цебярь психологокс, кона маштозь мусы эрявикс кинять-яннять эрь идть ваймос. Тя теенза удалси, вдь сон малаткшни тевонцты оцю ответственностень марязь, ётафнесы сонь седиенц пачк. Аньцек тяфта, кле, ули кода ладямс «учитель-тонафни» эрявикс сотксть и сатомс цебярь результатт.
Эрь стирняти и цёраняти сон аф аньцек учитель, но и кизос коре сяда оцю ялга, лезды, конанди фалу ули кода пшкядемс тя или тона прябалать мархта васьфтемста.
«Школав сай шабать эса ули кодамовок асуши, ушеткс, аньцек учительти синь шарьхкодемат, вешемат и маштозь «панжемат», штоба сяда тов стирнясь или цёранясь виияфнелезь тянь семботь»,—мярьгсь Анна Дивеева.

Учительсь сембе ширде крхкаста арьсекшнесы эрь уроконц. Тевс нолясыне проектнай методикатнень, технологиятнень.

Анна Максимовна арьсесь и ётафтсь аф кржа панжада урок мокшень, рузонь кяльхнень коряс региональнай компонентть тевс нолязь. Кой-конат эздост мастер-класс лаца няфтьфтольхть Саранск ошень начальнай школань учительхненди и тонафнихненди.

Анна Дивеева—литературнай морафтомать, рузонь кяльть коряс рабочай программань автор. Научно-практическяй конференциятнень эса тиф выступлениянза сувафтфт сборникненди.

Анна Максимовна—начальнай классонь учительхнень школьнай методическяй объединенияснон руководителец.

Педагогонь тевонц маштозь, виень аф ужяльдезь тиендеманкса мокшавась казендевсь Левжань школать администрациянц, велень поселениять ад-министрациянц оцюнять Грамотаснон и Почётнай грамотаснон, Угро-финскяй народонь культурань Поволжскяй центрать Благодарностенц мархта. Тяда башка, мокшень, эрзянь кяльхнень и мокшэрзятнень национальнай койснон виияфтомаснонды и ванфтомаснонды оцю путксонкса теенза максфоль Мордовскяй (мокшень и эрзянь) народть Межрегиональнай общественнай организациянц эзда Благодарность.
И нинге. Анна Максимовна аф весть сявондсь призовой вастт шашкатнень коряс муниципальнай пялькстоматнень эса, коса примась участия Левжань школань педагокнень мархта.

Тяни Анна Дивеева тонафнесыне Левжань школань 4 классонь тонафнихнень. Синь мокшавась, бта нарвайсь эсь лефксканзон, пуроптозень 1 классу самстост. И вов тядде синь «лийкстайхть» 5 классу, а вастозост сайхть лият. Самай ня «лиятне» тяни ёткшиста пуромкшнихть подготовительнай занятияс, конатнень ётафнесыне Анна Максимовна.

Мокшавась—кельгома тядя и щава. Ужяль, мес ашезь ёта сонь ваксканза удавань «павазсь», но мезе тият? Эряфть сонцень закононза…
Анна Максимовнань стирец, Ирина Петровна, врач-терапевт Рузаевкань больницяса. Семьянц мархта эряй Левжаса. Мокшавать кафта уноктонза. Максим тонафни 6-це, Ульяна—3-це класса.

Цёранц Артём Викторовичень лемоц, арьсян, лац содаф лувиеньконди. Н.П.Огарёвонь лемса Мордовскяй государственнай университетть шумор-дамдонза меле тись тядянц лаца—мрдась Левжав. Тяни сон начальнай классонь учитель и «Точка роста» образованиянь центрать, кона меля панчфоль Левжань школаса, руководителец. Тядяц теенза фалу ульсь и лядонды лездыкс, наставникокс, тонафтыкс. И тянкса Артём Дивеев азонды инь мала ломаненцты оцю спасиба.
Моли Педагогонь и наставниконь кизось. И ули кода азомс, што Анна Максимовна эсь работанц, тевонзон мархта эряфоньберьф няфни педагогокс и наставникокс улемань цебярь кепотькс.

Татьяна АЛЬШИНА.