Тядде Приволжскяй федеральнай округонь «iВолга» од ломанень форумса Н.П.Огарёвонь лемса Мордовскяй госуниверситетонь 4 студенттнень проектсна получасть грантовай лезкс—1 миллион 455 тёжянь цалковай.
Сяськихнень лувксса экономическяй факультетонь студенткась Александра Смолина. «Молодёжь Мордовии» коворкингонь тиемань проектонцты максовсь 600 тёжянь цалковай. Вельденза тиеви тяниень пингонь лама функциональнай пространства, коса ули кода тяштемс од проектт, арьсемс пуромксонь ётафтомать колга. Лиякс мярьгомс, тя васта творчестванди. Грантонь средстватнень лангс Мордовскяй республиканскяй од ломанень центраса тиеви ремонт, рамави мебель, оборудования. Нльне кармай ярхцамань аф оцю васта, штоба пингсь ётнель сяда мялень салайста. Анокламань тефне ушедовсть сентябрьста, а декабрьста коворкинг-зонась кармай ни работама.
«Уленди стане, што проектонь анокламста инициативнай группати аш коса кочкавомс. 14 кизосотнень эзда сявомок 35 кизосотненди молемс студенттненди ули кода самс тяза и работамс цебярь условияса. Оцю мяльса лезттама теест. Макстама аф аньцек помещения, но и тонафтсаськ синь касфтомс soft skills-ть коряс маштомошиснон. Спикеркс карматама тернемост Мордовиянь вузонь преподавательхнень или федеральнай эксперттнень. Надиян, «Мордовиянь од ломаттне» коворкинг-зонась арай активнай, вешенди од ломаттненди марс пуромомань вастокс»,—мярьгсь проектть автороц Александра Смолина.
Александра—активисттнень ёткста. Аф весть примсесь участия од ломанень форупнень эса, сёрмадсь проектт. Тя грантсь—сонь васенце сяськомац. Тя нинге весть корхтай сянь колга, што эряви старандамс, работамс эсь лангсот, эста сембось лиси.
«Мялезе, штоба Мордовиянь од ломаттне сяда лама тиендельхть республиканьконь виияфтомаса. Няелезь, кода ули касомс эсь родной регионцот, аф тушендомс шири. Проектнай тевонь вятемать вельде ули кода арьсеф тевцень ётафтомс эряфс. Тяни государствась шарфни оцю мяль од ломаттнень лангс, социальнай оцю проекттне получсихть финансирования»,—азозе Александра.
О.плотникова.