Вов и максфт школьнай экзаметтне. Исяконь школьникне, а тяни ни эзрай цёратне и стирьхне получасазь аттестатснон, ЕГЭ-нь сертификатснон и аськолдайхть оцювонь эряфти. Тяка жа кизефкссь—коза молемс сяда тов, стякшни тя пингть колледжень и техникумонь шумордайхнень инголивок. Молемс сяда тов тонафнема или ушедомс покодема? Таколдыхть тя пингть сембе: и синць выпускникне и, улема, нинге сядонга пяк тядясна-алясна. Коза сяда тов молихть тонафнема, мес кочказь тя или тона специальностть и мезе учендыхть студентонь кизоснон эзда, од ломаттне азондозь корреспондентоньконь мархта корхнемста.
Атюрьевскяй райононь Кяшал велеста Лилия Байчурина:
—Колма кизода инголе шумордайне 9 класснень, арьсень, коза молемс сяда тов—поладомс тонафнемазень шабра велень школаса или тумс техникуму, колледжу. Кочкайне омбоцеть. Сань Саранскяи и поступань Н.П.Огарёвонь лемса госуниверситетонь довузовскяй подготовкань и средняй профессиональнай образованиянь факультету. Колма кизот тонафнень бухгалтеркс. Тядде курснень шумордайне. Инголен тага стясь кизефкс: кода улемс сяда тов? Сань мяльс получамс высшай образования тязк университетса. Ёран поступамс филологиянь факультету. Арьсян тоса тонафнемась кармай мялень салайкс. Хуш ошсан ни сатомшка кунара, тячемс пяк лажаткшнян эсь шачема велезти, тядязти и щавазти. Мезевок аф тият, сашенды пинге и иттне нармоння лаца лийкснихть шачема-касома кудста-пизоста. Но тядязень ваймонь лямбоняц эжди эсон, аф ваномок вайгяльбетнень лангс, конат таргавсть ётксонк. Сидеста тя лямбонясь максси тейне вийхть сяськомс стакатнень-сталмотнень, конат эвондакшнихть эряфонь кизень лангса.
Инсарскяй райононь Иса велеста Илья Первойкин:
—Афи фатянь, кода школань кизотне лядсть фталу. Тяни эряви кочкамс од ки. Монь мялезе арамс юристокс. Тонафнема вастонди арьсян кочкамс Юстициянь Всероссийскяй государственнай университетть (Россиянь Минюстть Российскяй правовой академиянц) Средне-Волжскяй институтонц (филиалонц), кона ащи Саранскяйса. Кагодонень нинге макссайне Н.П.Огарёвонь лемса МГУ-нь юридическяй факультету. А тоса ни няеви, коза ётаван ЕГЭ-нь баллхнень коряс. Тя профессиять кочкайне аф стак. Сембось, мезсь сотф юридическяй сферать мархта, салсесы мялезень.
Тонафнемань кизотне, арьсян, кармайхть интереснайхть, тейне удалай козякофтомс содамошинень и тонадомс лама од тевс. Кудста тумс, азса видеста, аф ламода пелькс, но мон анокан од эряфти!
Зубово-Полянскяй райононь Булдыга велеста Любовь Ляшина:
—Школада меле мялезе молемс тонафнема Саранскяи, Н.П.Огарёвонь лемса госуниверситетонь Медицинскяй институту. Ломанень пчкафтыень профессиясь пяк мялезон. Мон сонь кочкайне кунара ни. Путсайне сембе вийнень, штоба арамс афкуксонь врачекс и макссемс лезкс ломаттненди стака пингста. Нинге тя профессиять кочкайне сяс, мес минь семьясонк сон лувондови пяк почётнайкс. Арьсян, вузса тонафнема кизотне кармайхть мялень салайхть. Тя ёткть мон ламоти тонадан, васьфтян цебярь ялгат. Виденц азомс, ули седисон аф оцю таколдомавок, пелькс аськолдамс аф содафти. Но надиян, сембось кармай лац.