Коза вяти койхнень кисна?

Финно-угорскяй народонь культурань Поволжскяй центрась Мордовия Республикань Культурань, национальнай политикань и архивнай тевонь министерствать ширень кирдеманц вельде эряфс ётафтсы дошкольнай кизоса иттненди «Тропою традиций» Интерактивнай этнотуристическяй проектть.

Тя проектть васенце тевоц—содафтомс ся иттнень, конат нинге аф якайхть школав, родной крайть национальнай культуранц мархта и тиемс сяда содафокс Мордовиянь этнобренттнень. Ули кода, республикань райоттненди апак якак, ётамс мокшэрзянь народть национальнай козяшинц и коензон-обуцянзон эзга туристическяй кить вельде няемс сянь, мезсь ётась поколенияста поколенияс народно-художественнай промыслатнень вельде.


Интерактивнай этнотуристическяй проектсь январьста ушедозе эсь работанц Саранск ошень округонь дошкольнай образовательнай учреждениятнень эса. 23 январьста поладозе сонь «Центр развития ребёнка—детский сад №3» МАДОУ-са.
Старшай подготовительнай кафта группатненди якай стирнятненди и цёранятненди ульсь кода содафтомс мокшэрзянь народть коензон-обуцянзон, афкуксонь мастерхнень мархта и примамс участия мялень салай мастер-класснень эса, конатнень ётафтозь народно-художественнай промыслань афкуксонь мастерхне. Шабатне марязь эсь пряснон Мордовиянь культурнай наследиянь пяльксокс.


3№ идень садса Финно-угорскяй народонь культурань Поволжскяй центрать исполнительнай директороц, «Мерема» этно-фолк группать художественнай руководителец Екатерина Модина азондсь проектть и центрать колга, содафтозень иднятнень ширезост инжикс сафнень мархта. Меле стирнятне и цёранятне отвечасть Мордовия Республикать мархта сотф кизефкснень лангс: коса синь эряйхть?, кодама ошса?, кодама райотт улихть Мордовияса? Сяльде идень саду якайхнень учсезень республиканьконь оцю картац. Шабатненди эрявсь вешемс лангстонза тя или тона районть и путомс сонь лемонц мархта картань пялькскять. Тяфта, пазлатнень эзда, кочкавсь мокшэрзянь крайть марнек картац.
Тя шиня ёмланятненди аноклафтольхть колма мастер-класст. Иттне явфтольхть колма группава. Эрь мастер-класста меле полафнесть фкя-фкянь, сяс эрь шабанясь примась участия эсост.
Поволжскяй центрать исполнительнай директороц Екатерина Модина васенда ётафтсь карьса налхкома, а меле мастер-классть пингста содафтозень стирнятнень и цёранятнень мокшетнень, эрзятнень и шокшетнень национальнай мокшэрзянь щамснон мархта.
колма «педи» доскатнень лангс петфтафтольхть ломанень кагодонь ронгонят, конатнень иттне наряжазь национальнай костюмса.
Омбоце мастер-классь лемтьфоль ванфты някать (оберегть) анокламанцты, а ётафтозе сонь Поволжскяй центрань этнокультурнай образованиять коряс специалистсь Анна Шулугина. Анна Сергеевна азондсь, мезе стамсь ванфты няканясь, кодама пяльксста сон ащи. Мастер-классть шумордамдонза меле стирнятне и цёранятне сявозь эсь кядьса тиф оберегснон эстеест.
4№ Идень художественнай школань «Шуфтть ланга керсема» отделениянь преподавательсь Александр Рябов ётафтсь шуфтонь тавлинскяй налхкшть анокламанц коряс мастер-класс. Кепотьксонди сявфоль сембонди содаф алашанясь. Инструменттне Александр Владимировичень кядьса вяшкозь вяшксть. Шуфтонь алашаняти тифоль грива, пулоня.
Картать-пазлать кочкамста, мастер-класснень пингста иттнень «палсть» сельмосна! Няевсь, што 3№ идень саду саф инжихнень ашезь када озадонь седихть ащема.
Екатерина Модинать валонзон коряс, тя проектть ётафтоманц колга мяльть васенцекс азозе Поволжскяй центрать сотрудницац Валентина Дыдыкина, кона инголи работась идень садса.
«Тропою традиций» проектсь мольфтеви сяда тов!
Татьяна Альшина.
Фототне Николай КАРАНОВОНЬ.

Последние новости

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть...

«Варяг» крейсерть подвигоц

9 февральсь—Россиять военнай историясонза мяляфтови дата. Тя шиня 1904...

Мазыхть мокшень стиреньке

Кельгома морафтыеньке! 2025 кизоня «Мокшень правда» газетась сяда тов...

Рославльскяй Краснознамённай 326-це стрелковай дивизиясь пуроптфоль Саранскяйса

Тядде васьфтьсаськ оцюдонга оцю илать—Великай Сяськомать 80 кизонь топодеманц....

Эрявикс кизефксненди—башка мяль

Ётай недялять Саранскяйса, Республикань Кудса, ётафтовсь Мордовия Республикань сисемце...

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя Администрации Главы Республики Мордовия и Правительства Республики Мордовия – руководителя Пресс-службы Главы Республики Мордовия Елены...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть эзга 4№ полициянь отделу пшкядсь ошень 65 кизоса авась, кона пачфтсь вете тёжяньда лама цалковаенц...