Мордовиянь Оцюнясь Артём Здунов 30 июньцта примась участия торжественнай мероприятияса, кона лемтьфоль М.Е.Евсевьевонь лемса Мордовскяй государственнай педагогическяй университетть 60 кизонь топодеманцты.
Вузсь тиевсь 1962 кизоня. Тячи педуниверситетть структурас сувсихть 9 факультетт, 22 кафедра и 2 диссертационнай советт, эряфс ётафневи 93 основной и 162 дополнительнай образовательнай программа. Штатса покоди 387 сотрудник, конат макссихть содамошит пцтай 7 тёжятть студентонди, 441-сь конатнень ёткста—омба мастороннет.
Республикань руководительсь башка лоткась сянь лангс, што педуниверситетсь ащи педагогическяй кадрань анокламати нежекс. Ламонц выпускникне лядондыхть Саранскяень и Мордовиянь образованиянь системаса, покодихть профессияс коре странань региоттнень эса. Виде, мзярс региононь тонафнемань учреждениятнень эса аф сатнихть физикань, английскяй кялень, рузонь кялень и литературань, ёмла классонь тонафтыхне и воспитательхне. Ащи педагокненди социальнай гарантиянь тиемань кизефкссь.
«Россиянь Президентть решениянц коряс, сай кизось азф Педагогонь и наставниконь кизокс—тя минь тинь мархтонт кизоньке, кельгома ялгат!—азозе Артём Здунов, вузонь коллективть и студенттнень поздравляндамста.—Республикань стирнятненди и цёранятненди эрявихть цебярь тонафтыхть, сембонди тейнек эрявихть валда ёнь мархта ломатть, конатнень воспитандасасть аньцек тинь. Мяляфтость, што педагогонь и медиконь профессиятне—тя, васендакиге, ломаттненди и странати служама!»
Региононь руководительсь кошардозень студенттнень университетть аделамда меле макссемс сембе вийснон и асушиснон тонафнемань процессти—школати и республикань тонафнемань лия учреждениятненди. Сон стане жа азсь благодарностень валхт вузонь ветераттненди, конат макссихть козя опыт од поколенияти.
Оцю квалификациянь педагогическяй кадрань анокламати путксонкса М.Е.Евсевьевонь лемса МГПУ-нь коллективсь казьф Мордовия Республикань Оцюнять Почётнай дипломонц мархта. Региононь руководительсь стане жа макссь казнет вузонь сотрудникненди: «Мордовия Республикань наукань Заслуженнай деятель» почётнай лемсь максф педагогическяй и художественнай образованиянь факультетонь художественнай и музыкальнай образованиянь кафедрань профессорти Инна Кобозевати, «Мордовия Республикань высшай школань Заслуженнай работник» почётнай лемсь—естественно-технологическяй факультетонь биологиянь, географиянь и тонафнемань методикань кафедрань доцентти Евгений Потапкинонди.
Россиянь Просвещениянь министерствань педагогическяй работникнень анокламань, профессиональнай виияфнемань и социальнай обеспечениянь Департаментть директоронц заместителец Сергей Антонов азозе, што вузсь коль вииякшни-кемоксни: студентонь васенце наборсь ульсь аньцек 250 ломань, тячи—тя пцтай 7 тёжятть тонафни.
«Родинать национальнай безопасностец ащи лама ширеста, конатнень эзда фкясь—образованиясь. Самай ня ширетне виияфнесазь странать и тиендьсазь содафокс международнай уровеньца»,—мярьгсь Сергей Антонов, арьсесь университетти сатфкст и панчфокс панжема. Сон макссь казнет—«РФ-нь образованиянь сферань Почётнай работник» лемть—отечественнай и омба масторонь историянь и тонафнемань методикань кафедрань профессорти, ректоратть видеса советникти Александр Мартыненконди, «РФ-нь иттнень и од ломаттнень воспитандамань сферань Почётнай работник» лемть—дошкольнай и начальнай образованиянь кафедрань доцентти, Кувалгофтф шинь центрать директоронцты Наталья Винокуровати.