Миньцонк ётафтовсь Международнай астрономическяй олимпиада

Мордовиянь Оцюнясь 29 сентябрьста васетькшнесь OWAO-2022 Международнай I панжада астрономическяй олимпиадань участникнень мархта. Олимпиадась ня шитнень ётафтовсь Саранскяйса. Пялькстомаса примасть участия школьникт 8 странатнень эзда—Россияста, Бангладешста, Болгарияста, Белоруссияста, Китайста, Сингапурста, Киргизияста и Казахстанцта.
Лятфтасаськ, Мордовиять столицаса интеллектуальнай турнирть ётафтоманц колга решениясь примафоль Россиянь Просвещениянь министерствать мархта, сявомок мяльс астрономиять и астрофизикать коряс странань сборнай командать руководителенц Борис Эскинонь предложениянц. Тя мяльть сембе ширде кирдезе Мордовиянь Оцюнясь Артём Здунов. Астрономиять коряс школьниконь Всероссийскяй олимпиадань 120 сяськить и призёрть ёткста кочкафт кота ломатть, конат няфтсть инь цебярь результатт—тя Москувонь и Мордовиянь школьникне, конат сувасть странань национальнай сборнайти.
«Республикати международнай астрономическяй олимпиадать ётафтомац—историческяй события. Пцтай киза минь анокламе теенза. Странань сборнайть лувксса Мордовиянь Асу шабанди Республиканскяй лицеень выпускникне—тя сядонга касфнесы мяленьконь!»—мярьгсь региононь Оцюнясь.
Россиянь сборнай командать руководителец Борис Эскин шарфтсь мяль мероприятиять лац анокламанц и сонь важнайшинц лангс.
«Тинь тиеде пяк цебярь условият участникненди. Технологиятнень, конат нолдафт тевс олимпиаднай пялькстомаса Саранскяйса, минь карматама нолямост тевс сай пинкненге. Кеман, што сай кизоня олимпиадань участникнень лувкссна ламода касы. Сюкпря Тейть, Артём Алексеевич, ширень кирдеманкса»,—мярьгсь сон.
Санкт-Петербургскяй государственнай университетонь астрофизикань кафедрань доцентсь Валерий Нагнибеда азозень эсь мялензон-арьсеманзон Саранскяйса международнай турнирть ётафтоманц коряс: «Астрономиять коряс российскяй командатне фалу лац няфнезь пряснон мировой уровеньца. Астрономиять коряс международнай олимпиадань участникнень лувксста минь сборнаеньконь лихтемац—тя уровенть кирьфтаманц тяряфнемац. OWAO-2022 олимпиадась арась цебярь полафтомакс мировой лия пялькстоматненди. Кеман, што тя олимпиадась кармай вииякшнема и арай сядонга содафокс».
Васедемать шумордамста Артём Здунов азозе: «Тяфтама оцю мероприятиятне пяк эрявкснихть стирьхненди-цёратненди, конат заняфт наукаса. Карматама учендомонза Саранскяйса сай астрономическяй олимпиадать!»
Пялькстоматнень итогснон коряс васенце вастть занязе Россиянь сборнайсь. Странань командати сембе сувсихне сатсть зрнянь медальхть.