МИНЬЦОНК ЁТАФТОВСЬ «ШКОЛЬНАЙ ИНЬ ЦЕБЯРЬ СТОЛОВАЙСЬ—2024» ВСЕРОССИЙСКЯЙ КОНКУРС

Аф кунара Мордовияса ульсь «Школьнай инь цебярь столовайсь—2024» Всероссийскяй конкурсть федеральнай туроц. Сон ётафтовсь нилецеда. Конкурссь пуропнесыне эсь тевоньсодай профессионалхнень, конат путнесазь эзонза ваймоснон и кельгомаснон. Республиказонк сашендсть странань 75 регионцта командат и школьнай пидихть-панихть.
Культурань республиканскяй Дворецса эрь субъектть ульсь ярхцамбяль мархта мазы стендоц. Мордовиянь Оцюнясь Артём Здунов ванозень стенттнень, корхнесь делегациянь представительхнень мархта.
Азомок участникненди приветствиянь валхт, республикань лидерсь, кона вов ни ниле кизот вятьсы школьнай ярхцамбялень кизефкснень коряс РФ-нь Госсоветонь комиссиянь рабочай группать, китькстазе: иттнень сбалансированнай и качественнай ярхцамбяльсна—сай пингонь поколениять шумбрашиц.
Россиянь Президентть поручениянц коряс начальнай школань сембе тонафнихненди макссеви питнефтома пси ярхцамбяль. Башка мяль шарфневи СВО-нь участникнень и лама идень семьятнень шабаснонды.
Республикань Оцюнясь азозе, што конкурсса республикась няфти вии конкуренция. Поставщикнень 80 процентсна—минценнеть. Тя темась салсесы и республикань иттнень мяльснон—ламоцне участвовандайхть «Мир возможностей» партийнай проектса, лац содаф «Шумбра ярхцамбяль» акциясь.
«Конкурссь мольфтеви. Минь няеськ, кодама козят и аф фкя лацоннет койхне-обуцятне региоттнень эса. Ня мероприятиятне эрявихть сянкса, штоба содамс фкя-фкянь и сявомс фкя-фкянь эзда инь цебярть. Тиендьсаськ тянь сянкса, штоба пингонь ётазь минь ломаненьке улельхть шумбрат!»—мярьгсь Артём Здунов.
Призёрхнень и сяськихнень казезь Мордовиянь Оцюнясь Артём Здунов и РФ-нь Просвещениянь министерствань тонафнихнень ярхцамбяльснон мониторингонь Федеральнай центрать директороц Валентина Иванова. Сяськикс арасть Тамбовскяй областьста Алевтина Шаповалова и Мордовияста Анна Докучаева.
Школьнай ярхцамбяльть виияфтоманкса и цебярьгофтоманкса Мордовия Республикань Оцюнять благодарственнай сёрмац максфоль Валентина Ивановати.
«Мордовиясь тись оцю путкс странань школьнай ярхцамбяльть виияфтоманкса. Тянкса оцю спасиба тейть, Артём Алексеевич. Тейнек ули мезти тонафнемс эздонт!—азозе Федеральнай центрать директороц.—Минь покоттяма иденьконь, нацияньконь шумбрашиснон, образованиянь системать и странаньконь сай пингонц инкса».