«Мокшень правдать» пара ялганц, учительть Марина Мироновать лемоц лац содаф образованиять мархта сотф тевса заняфненди. Марина Николаевнань педагогическяй стажец—25-да лама киза. И сембе тя пингть мокшавась работай учителень тевти ваймонц путозь, оцю ответственностень марязь. Ламотне колганза корхнихть тяфта: кда ломанць эсь вастсонза.
Шачсь Марина Мироновась Рузаевскяй райононь Сузгярьге мокшень велеса. 1996 кизоня шумордазе Н.П.Огарёвонь лемса Мордовскяй государственнай университетонь филологическяй факультетть «Мордовский язык и литература. Русский язык и литература» специальностьс коре, а 2016 кизоня—М.Е.Евсевьевонь лемса Мордовскяй государственнай педагогическяй институтть аспирантуранц, мезьда меле теенза максфоль «Исследователь. Преподаватель-исследователь» квалификация.
Аф фкя киза Марина Николаевна работась Саранск ошень 24№ средняй общеобразовательнай школаса мокшень кялень учителькс. Кельгома работасонза оцю сатфксонкса мокшавати 2019 кизоня максфоль «Мордовия Республикань Заслуженнай учитель» лем. А мзяра лия казнедонза! Ётксост Мордовия Республикань Государственнай Собраниять Почётнай грамотац, Мордовия Республикань Образованиянь министерствать Почётнай грамотац, Российскяй Федерациянь Образованиянь и наукань министрть А.А.Фурсенконь Благодарственнай сёрмац (2007 кизось) и лиятне.
Марина Мироновась фалу примси участия родной кялень учительхнень пуромкссост, педагогическяй и методическяй конкурснень эса сяськи и призёр, Мордовскяй (мокшень и эрзянь) народть VI съездонц участникоц и VII съездонц делегатоц.
Тяни работай мокшень кялень, рузонь кялень и литературань учителькс Советскяй Союзонь Геройть М.П.Девятаевонь лемса «Высота» образованиянь 15№ центраса, а нинге—класснай руководитель 5А класса.
Тяддень апрельста высшай квалификационнай категориянь учительсь Марина Миронова сяськсь «Лучший учитель родного языка и родной литературы в Республике Мордовия-2024» Всероссийскяй конкурсть республиканскяй этапсонза. Лиякс азомс, арась Мордовия Республикаса родной кялень и родной литературань инь цебярь учителькс! Седи ваксста поздравляндасаськ Марина Николаевнань тя оцю сатфксонц мархта! Тяни учительть учсы Всероссийскяй конкурсть заключительнай этапоц, кона ётафтови Казаньца.
Аф кунара корреспондентоньке корхнесь Марина Мироновать мархта. Удалась содамс, што сатфть лангс мокшавась ашезь лотка.
—Ёрань варжамс прязень нинге фкя конкурсса. Сон республиканскяй, а лемоц «Лучший кабинет родного (мокшанского, эрзянского) языка». Пяшкодине сембе вешфкснень, тяни учан результаттнень эса. Тяда инголе сяськонь муниципальнай этапсонза.
—Марина Николаевна, содасаськ, што тон кярьмодеть нинге фкя эрявикс тевс—социальнай сетьтнень эзда фкаса ушедоть вятема «Учитель мокшанского языка» блог-страница. Нюрьхкяня пингста сон кенерсь ни кочкамс аф кржа подписчик-морафты. Азонтт, пожалуйста, тянь колга.
—Тяниень пингонь иттне аф арьсесазь эсь эряфснон телефонфтома, планшетфтома, интернетфтома, социальнай сетьфтома. Гаджеттне коль сяда кемоста сувсихть эрь шизонк. И кда инголи васенце вастсотольхть книгатне, то тячи шабатне нюрьхкяня статьять, ёмла кулять сяда оцю мяльса морафтсазь интернетста. Кельгсазь видеороликнень и аудиокнигатнень. Няйсаськ, што эряфсь полафни, а тонафтомань тонатф метоттне работайхть аф сяшкава лац, кода тя ульсь инголи. Сяс учительть инголе ащи тяфтама вешфкс—нолямс тевс од технологиятнень, тонафтомань спосопнень. Учителькс-блогеркс арамать колга арьсень кунара, но коль ашень кярьмотькшне тянди. А меле ушедыне тя тевть. Ванонь эрявикс видеороликт и мастер-класст, конатнень няфнезь лия блогерхне онлайн-семинархнень пингста, корхнень работас коре ялганень мархта, тяни тонафнян эрявикс программат, конат саласазь аф аньцек тонафнить, но и сонь тядянц и алянц мяльснон.
—Мезьста, кодама материалста ащи «Учитель мокшанского языка» блог-страницаце?
—Аф фкя кемотть киза работан образованиянь системаса, и тя пабликса ёран няфтемс образовательнай ся материалхнень, конатнень нолясайне тевс занятиятнень пингста. Ётксост мокшень кяльть коряс рабочай листт, учебнай карточкат, мялень салай заданият урокненди и стак тов. Тияк монцьке тонафнян, тиендян эстейне контент-план.
—Лама пингта эряви тянь сатоманкса?
—Афолень мярьге, што пяк лама. Лиякс азомс, тя работать мархта ашине «сала» эсь пингозень. Пара арси мялезон, мзярда кулендян подписчиконень эзда спасибамань валхт.
—Кодама разделста ащи блогце?
—Эсонза улихть «В помощь коллегам», «Мои достижения», «Про этнолагерь», «Говорим по-мокшански» и лия разделхт-лопанят. Блогозень пяшкотькшнеса видеороликса, сканвордса, кроссвордса (материалть путнеса программатнень лангс ссылкатнень мархта, штоба подписчикне семботь варжалезь синць). Тяни пцтай колма сятт подписчикозе, блогозень лангса работан колма кофт.
—Марина Николаевна, кит синь—подписчикне?
—Ётксост улихть школаса тонафнихть, оцю ломатть; сят, кит содасазь мокшень кяльть и сят, кит аф корхтайхть мокшекс; учительхть, воспитательхть, тядят-алят. Географияське кели. Сяс блогозень вятьса культуратнень диалогснон мяльса кирдезь. Страницасон тевс нолясайне и рузонь, и мокшень кяльхнень. Тиендьса семботь, штоба сявондемс мяльс подписчиконень вешфксснон.
—Кода ащи тевсь комментарийхнень и лайкнень-меснень мархта?
—Подписчикнень комментарийсна кепсесазь мялезень, сяс мес няйса: тевозень тиендьса аф шавос! Ломаттне азондсазь эсь мяльснон монь—учительть-блогерть работанц колга. Сяда тов арьсян келептемс и козякофтомс блогозень контентонц. А нинге—школаса тонафнихнень мархта аф уроконь пингть ётафтомс эряфс «Репетитор мокшень кяльса» проектть. Вельденза ёран ётафтомс мокшень кяльть коряс занятият, башка мяль шарфтомок синтаксисти, морфологияти, фонетикати. Монь аш учитель-блогер официальнай статусозе, но сяда тов ёран макссемс мокшень кялень урокт аф аньцек учениконенди, но и синь тядяснонды-аляснонды, ялгаснонды, сембонди сятненди, кинь мялец тонафнемс мокшень кяльть, мокшетнень культураснон, койснон.
—Азондомстот лятфнеть этнолагерть колга, сяс тя кизефксть аш кода аф максомс. Марина Мироновась ламотненди содаф и кода «Живи, родной язык!» Межрегиональнай этнокультурнай образовательно-оздоровительнай эрь кизонь сменать руководителец. Тядде этнолагерсь панчсыне кенкшензон?
—Конешна, панчсыне.
—Оцю спасиба, Марина Николаевна, мялень салай корхнеманкса. Надиятама, блог-страницацень подписчиконзон лувкссна кармай касома шиста шис, сяс мес ушедоть и вятят пяк эрявикс тев. Сембе цебярть тейть!
Татьяна АЛЬШИНА.
Фототне Николай КАРАНОВОНЬ.