Кирдемок мяльса Мокшень и эрзянь кяльхнень Всероссийскяй шиснон, кона эрь кизоня уленди 16 апрельста, Финно-угорскяй народонь культурань Поволжскяй центрась Мордовия Республикань Культурань, национальнай политикань и архивнай тевонь министерствать ширень кирдеманц вельде 15 апрельста ётафтозе «Мордовскяй (мокшень, эрзянь) кяльса диктант» международнай участия мархта Всероссийскяй образовательнай акциять.
Тядде эсонза примасть участия Россиянь кефкие региононь—Мордовиянь, Башкортостанонь, Чувашиянь, Татарстанонь, Нижегородскяй, Пензенскяй, Ульяновскяй, Самарскяй, Челябинскяй областень, Москувонь и Санкт-Петербургонь эряйхть. Тяда башка, мокшень и эрзянь кяльса диктант тяштьфоль Казахстан Республикань Павлодар ошень Финно-угорскяй этнокультурнай центраса.
Мордовияса акциясь ётафтфоль муниципальнай сембе райоттнень эса. Саранскяйса диктантонь тяштема вастокс ульсь Н.П.Огарёвонь лемса Мордовскяй государственнай университетсь.
Тядде диктантсь лемтьфоль Великай Отечественнай войнаса Сяськомать 80 кизонь топодеманцты и Отечествань аралаень кизоти. Мордовскяй госуниверситету тяштемонза пуромкшнесть вузонь преподавательхне, идень садонь воспитательхне, студенттне, библиотекань сотрудникне, учительхне, массовай информациянь средствань представительхне и стак тов.
Мокшень кяльса текстсь ульсь содаф писательть Михаил Сайгинонь «Давол» романцтонза, эрзянь кяльсось—Пётр Прохоровонь «Максим Алексеевич Пуркаев генералось» книгастонза.
Мокшень кяльса диктантть лувозе Мордовскяй госуниверситетонь филологическяй факультетонь мокшэрзянь кялень и литературань кафедрань профессорсь Галина Иванова, эрзянь кяльса—тя кафедрань доцентсь Нина Агафонова.
Татьяна Альшина.