Мокшень цёрась Владимир Ермаков шачсь-кассь Ковылкинскяй райононь Малав велеса. Тястонь школать шумордамдонза меле поступась М.Е.Евсевьевонь лемса Мордовскяй государственнай педагогическяй институтонь физико-математическяй факультету. Владимир Викторович кочказе физикань и информатикань учителень тевть, сяс мес школаса тонафнемста кельгозень ня предметтнень.
Бакалавриатть аделамдонза и дипломть получамдонза меле служась армияса Хабаровскяйса. Фалу гайфнесь алянцты—Малав велень школань технологиянь учительти Виктор Ермаковонди. Виктор Николаевич цёранцты азонкшнезе, што педагогическяй коллективти эряви учитель. Физикань и математикань ингольдень учительсь Татьяна Баранова, кона тонафнезе Владимиронь и макссь совет кочкамс учителень тевть, ашезь работа ни.
Владимир Викторович ламос арьсема ашезь карма, а сась тяфтама мяльс: армияда меле мрдамс Малаву и школаса поладомс учителень тевть, конань коряс практическяй содамошит пуроптсь педагогическяй институтса. Тяфта и тись.
«Аляй, азк школаса, што службать шумордамдонза меле эстокиге мрдан Малаву и ушедан работама учителькс. Тянкса и тонафнень вузса»,—тяфта мярьгсь Владимир алянцты.
2020 кизонь 1 сентябрьста Ковылкинскяй райононь школатненди работама састь кота од педагокт, тяконь лувксса Владимир Викторович. Сон вяти физикань и информатикань урокт 7-це, 8-це, 9-це, 11-це класснень эса. Тяда башка, ётась ОБЖ-нь учителень, математикань учителень курст, сяс ня предметтненьге вятьсыне оцю мяльса.
Од учительсь—афкуксонь патриот. Пяк кельгсы ёмла родинанц—Малавть, арьси сонь вандыенц колга. Надияй, што ломаттне аф кармайхть тушендома шири. А кда велеса ули лама эряйда, кармайхть и одс шачихть. Касомок, синь аськолдасазь школать порогонц.
Малавса шачфсь-касфсь Владимир Ермаков ёмла родиназонза мрдаманц мархта няфтсь цебярь кепотькс лиятненди.
Тяниень пингть Малавонь средняй общеобразовательнай школась—Краснопресненскяй СОШ-ть филиалоц.
Владимир Викторович мзярдовок аф лоткси сатфть лангс.
«Васенце тевсь эряфсон—фалу работамс «эсь лангсон». Кда аф молемс сяда тов и фалу ащекшнемс фкя вастса, эста лама аф тият и арьсефть аф пяшкодьсак. Тяфтама мяль мархта тонафнень педагогическяй институтса, аралайне дипломть, служань армияса»,—мярьгсь сон.
Од учительть тонафниенза примсихть участия ламоц олимпиадатнень, пялькстоматнень эса. Владимир Ермаков тевонь содазь аноклакшнесыне синь, ётафни мархтост дополнительнай занятият. Сон теест аф аньцек педагог, но и наставник.
Татьяна АЛЬШИНА.