20 июньцта ушедозе работанц Н.П.Огарёвонь лемса Мордовскяй государственнай Национальнай исследовательскяй университетонь приёмнай комиссиясь. Тяка шиня госуниверситетонь Национальнай культурань институтса, коса вятьсы работанц приёмнай комиссиясь, республикань телевидениянь и печатнай изданиянь журналисттнень мархта васетькшнесь Н.П.Огарёвонь лемса Мордовскяй государственнай Национальнай исследовательскяй университетонь ректорть тевонзон тиендисна Д.Е.Глушко.
Массовай информациянь средстватнень вельде Д.Е.Глушко васенцекс пшкядсь абитуриенттненди, конат срхкасть арамс Н.П.Огарёвонь лемса МГУ-нь студентокс. Ректорть тевонзон тиендиснон валонзон коряс, Мордовскяй госуниверситетса од ломаттнень кармайхть тонафнемост оцю опыт мархта учёнайхть. Эсост учсихть лабораториятне, конат пяшкотьфт тяниень пингонь оборудованияса, студенттне кармайхть ётнема стажировкат Россиянь и лия масторонь научно-образовательнай ведущай центратнень эса. И, тяда башка, сай пингонь студенттнень учсесыне мялень салай творческяй эряфсь.
Научнай, тонафнемань и общественнай сфераса сатфксонкса Н.П.Огарёвонь лемса Мордовскяй госуниверситетонь студенттненди макссевихть Российскяй Федерациянь Президентть, Российскяй Федерациянь Правительствать, Мордовия Республикань Оцюнять стипендиясна.
Сяда тов Д.Е.Глушко, отвечамок журналисттнень кизефксснон лангс, пачфтезе, што 2022 кизоня Мордовскяй госуниверситетса студенттненди панжеви 2705 бюджетнай васта. Васенцекс университетть историяса панжевсть бакалавриатонь «Фотоника и оптоинформатика», «Педагогическяй образования», «Омба масторонь кяль», «История и обществознание» направлениянь од профильхть.
Тяда башка, 2022 кизоня Мордовскяй госуниверситетса касфтовихть тонафнемань васттнень лувкссна факультетса, коса макссевихть инженерно-техническяй специальностть. 2022 кизоня, аф ваномок санкциятнень лангс, Мордовскяй госуниверситету сайхть тонафнема од ломатть маластонь и ичкоздень омба масторста.
Васедемать аделавомста Д.Е.Глушко нинге весть пачфтезе пуромфненди: Мордовскяй госуниверситетть кенкшенза келиста панжадот оцю содамоши мархта сембе од ломаттненди!
В.Нестеров.