Н.П.Огарёвонь лемса МГУ-сь панчсь представительства Индияса

13 апрельста вузсь васенцеда панжезе эсь представительстванц омба масторса, Индияса Рао Пахлада Сингхонь лемса образовательнай учреждениянь Группать базанц видеса. Группась—мордовскяй университетть стратегическяй партнёроц. Эсонза работай 6500-ть малава преподаватель и сотрудник, тонафни 50000 студент. Офиссь ащи Махендергарх ошса, Индиять столицанц—Нью-Делить эзда аф ичкозе.
Тянь вельде кафцьке ширетненди ули кода ётафтомс эряфс образовательнай, научнай и культурнай марстонь ламоц проекттнень, конат водендафт российско-индийскяй соткснень виияфтомаснонды и кемокстамаснонды. Образовательнай и научнай технологиятнень мархта полафтомада башка представительствать вельде Н.П.Огарёвонь лемса МГУ-нь коллективти ули кода прважамс индийскяй студенттнень шачема ширезост практикаснон ётаманкса. Стаки мольфтеви рузонь кялень центрать тиеманц коряс работась. Маластонь пингть сонь видесонза ушедыхть курст сембонди сятненди, кинь мялец поступамс и получамс высшай образования Россияса.
«Группать исполнительнай директоронц Маниш Раонь и минь мархтонк кемокстаф соглашениять мяльса кирдезь, марстонь работати основной направлениякс кармайхть улема мокшэрзянь учёнайхнень ся разработкаснон эряфс сувафтомасна и тевс нолдамасна, конатнень ули прикладной значениясна Индиять экономиканцты, марстонь академическяй мероприятиятнень анокламасна и ламось лиясь. Тяфтама сотрудничендамать ули вандыень шиц, сяс минь и сяда товга карматама виияфнемост соткснень дружественнай странатнень мархта»,—шарфтсь мяль ректорсь Дмитрий Глушко.
Тяниень пингть университетса тонафни Индиянь 890 ломань. Пцтай сембе—«Лечебное дело» программать коряс, кона мольфтеви английскяй кяльса. 250-да ламось эздост састь Мордовияв Украинаста специальнай военнай операциять ушедомдонза меле и поладозь тонафнемаснон Н.П.Огарёвонь лемса МГУ-са.