Мордовия Республикань Высшай школань шить и Н.П.Огарёвонь лемса МГУ-ть шачема шинц каршеня университетса ульсь эрь кизонь торжественнай ректорскяй приём. Пингстонза почётнай казнет максфтольхть вузонь преподавательхненди и сотрудникненди, ванфтольхть мелянь работань результаттне и арьсефтольхть платт сай пингонди.
Вузть коллективонц ила мархта поздравляндазе МР-нь промышленностень, наукань и од технологиянь министрсь Игорь Губайдуллин: «Мордовиянь Оцюнять, Правительствать лемста и эсь эздон поздравляндатядязь Мордовиянь Высшай школань шить и университетть шачема шинц мархта. Азан благодарностень валхт эрь шинь трудонтень, сатфксонтень, касы поколениять, кона сашенды ширезонт, тейнек министерствав, экономикать реальнай секторозонза, воспитандаманц инкса».
Игорь Губайдуллин макссь почётнай казнет вузонь сотрудникненди и преподавательхненди.
Физическяй культураса и спортса заслугатнень инкса «МР-нь физическяй культурань и спортонь Заслуженнай работник» почётнай лемсь максфоль Ольга Аношкинати.
Образованияса заслугатнень инкса и седикс-ваймокс лама киза трудендаманкса «МР-нь образованиянь Заслуженнай работник» почётнай лемсь максфоль преподавательти Валентина Богатырскаяти.
«Шачема шись—тя нинге фкя киза оцю коллективть летописенц эса, кона максси странати пяк эрявикс результатт, синь няевихть ичкозе Мордовиять и Россиять эзда. Минь мархтонт ламоса ни—инь цебярьхне, и ламоса тейнек аньцек сави тонафнемс и касомс-вииямс»,—китькстазе ректорсь Дмитрий Глушко.
«Поздравляндатядязь университетоньконь 92 кизонц мархта. Содаса, ся вийхне, конат тяни путневихть касомань-вииямань тя этапса, кандыхть результатт: университетсь кармай касома и инголи молема»,—шарфтсь мяль вузть президентоц Николай Макаркин.
Ректорсь и президентсь стане жа казезь сотрудникнень.
Поздравляндазь и вузонь ветераттнень—ломаттнень, конатнень судьбасна сотфт Мордовскяй госуниверситетть мархта.