НИЛЬГЕМОНЬ КИЗА МАКССЬ УЧИТЕЛЕНЬ ТЕВТИ

Улема, эрсь мяляфтсы васенце учителенц, кона панжезень теенза содамошитненди кенкшнень. Тейнек, Порапа велень шабатненди, тяфтама ломанькс арась Анна Николаевна Купряшкинась. Смузю, внимательнай, заботендай, но строгай и справедливай, фалу анок лездомс и кирдемс ширенц эрь ученикть—тяфтамокс содасазь и мяляфтсазь Анна Николаевнань покоди ялганза и велеряенза.
Анна Николаевна шачсь Порапа мокшень велеса. Тоса ётась идькс пингоц. Сон ульсь фкя и тяка стирнякс кота брадонзон-дуганонзон ёткса. 1962 кизоня шумордазе велень школать.
Профессиянь кочкамать колга кизефкссь инголенза ашезь аще. Кепотьксокс теенза ульсть педагогическяй трудонь ветераттне Иван Семенович Воробьев, Римма Ивановна Курносова и класснай руководителец Андрей Захарович Сурдяев. Национальнай школатнень эса эста кода аш мзярдовок ашесть сатне кадратне. Аф стак 1962 кизоня Ковылкинань 1№ средняй школаса панчфтольхть Зубово-Полянскяй педучилищать эзда начальнай классонь учителень анокламать коряс кизонь кувалмоса курст. Апак арьсек максозень тяза кагодонзон и Анна Ивашкинась (тя сонь стирень фамилияц). Группасост ульсь колмогемоньшка ломань. Тонафнемась макссевсь теенза тёждяста. Сон оцю мяльса сотцезень сай пингонь профессиянц секретонзон. Курснень шумордамда меле сонь прважазь Од Пшень велень кафкса кизонь школав начальнай классонь учителькс. Эста теенза ульсь аньцек кемзисемге киза. Тердезь поступама Н.П.Огарёвонь лемса МГУ-нь филологическяй факультету. Пара мяльса согласиндась. Кафта кизода меле ётась Порапа шачема велезонза. Од учительти максозь нилеце классть. Колмоце курста меле Анна Николаевнань ётафтозь старшай классонь шабатнень тонафтома. Ся пингть Порапань школаса лувондовсь 700-та лама ученик. Эста мокшавась афи арьсекшнесь, што тяса мусы кельгома тевонц, конанди лемди 40 киза.
1970 кизоня Порапа велень школаста учительхнень ламошкасна ульсть ширде сафт. Тястоконнетольхть аньцек Анна Николаевна Купряшкинась и Роза Егоровна Чекашкинась (тяни сон аш ни шиса). Лама трудта и вийда савсь путомс теест, штоба кошардомс школань выпускникнень поступамс педагогическяй заведениятненди. Эряви азомс, старандамасна шавос ашесть ляда. Пяк курок педколлективсь няевиста одкстомсь. Фкя-фкянь мельге мртцесть родной школазост педучилищань выпускникне. Ётксост Матрёна Андреевна Чекашкина, Ольга Андреевна Овчинникова, Анна Фёдоровна Ломакина, Ксения Герасимова Дурнова, Полина Александровна Мелешкина, Антонина Максимовна Купряшкина, Валентина Семёновна Канайкина, Зинаида Васильевна Палаева, Наталья Ивановна Ломакина, Вера Васильевна Дурнова, Татьяна Фёдоровна Чекашкина, Татьяна Николаевна Макеева и лиятне. Ламотне эздост покодсть школаса пенсияс лисемозост.
А.Н.Купряшкина школаса работамста тонафтсь морафтома, сёрмадома и лувома Порапань кафта сятта лама шаба. Сонь учениконза оцю кельгома мархта лятфнесазь васенце учительснон, а ламотне сидеста сашендыхть ширезонза, азонкшнесазь теенза эсь секретснон и таколдомаснон. Анна Николаевна фалу максы смузю советт.
Шабатнень мархта А.Н.Купряшкинась фалу мушендсь марстонь кяль. Сонь уроконза най ётнесть мялень салайста. А нинге сон пяк лац шарьхкотькшнезень иттнень, приметнезень аф эстокиге няеви маштомошиснон, эсь лацонь ширеснон.
Ломанть колга корхтайхть сонь тевонза. А.Н.Купряшкинать трудоц отмечаф лама почётнай грамотаса и благодарственнай сёрмаса. Сон—«Народнай просвещениянь отличник», «Трудонь ветеран». Но сембода оцю казнец—учениконзон кельгомасна, конатнень седиса сон занясь няевикс васта.
Ужяленди, школаса ученикнень лувксснон киремац вятсь и педагогическяй коллективть киреманцты. И 2003 кизоня Анна Николаевнанди савсь кадомс кельгома работанц, кона ульсь эряфсонза оцю и пяк эрявикс пяльксокс. Покоди ялганза аф юкснесазь педагогическяй трудонь ветеранть, тернесазь почётнай инжикс школаса ётафневи сембе мероприятиятненди и илатненди. И минге лятфнесаськ васенце учителеньконь кельгозь и спасибазь. Вдь Анна Николаевна ульсь учителькс аф аньцек профессияс, но и призванияс коре.
Тяни Анна Николаевна пенсияса, и учителень асушинц макссесы кельгома идензонды и уноконзонды. Тяфта, рьвяняц, Татьяна Петровна, учитель Ковылкинань 4№ средняй школаса, унокоц Оля—преподаватель Ковылкинскяй строительнай колледжса.
Анна Николаевна мяляфтсыне сембе учениконзон, эрть инкса сяряди седиец.
Пенсияс лисемда меле Анна Николаевна тевфтома ашезь ащекшне. Сон 20 киза ульсь певчайкс Порапа велеса святой Богородицать Покровонц храмса. Ламотне тячемс спасибайхть теенза тя работанкса.
12 июльста А.Н.Купряшкинать эряфса ульсь оцю и кеняртьфти события—сон отмечазе кафксогемонь кизонь юбилеенц. Радня ломаньдонза башка ширезонза инжикс сашендсть и ламоц учениконза.
Седи ваксста арьсетяма Анна Николаевнанди оцю паваз, кеме шумбраши, цебярь и кувака эряф!
Василий ИЛЬКАЕВ.