Торбеевскяй райононь Салазгорь велесь содаф трудонь кельги ломанензон мархта. Тяса шачсь-кассь мокшэрзянь литературать ушедыензон эзда фкясь, поэтсь, учительсь, просветительсь, Великай Отечественнай войнань участниксь З.Ф.Дорофеев. Районца лац содафт И.Л.Житаевонь, В.В.Колядинать, О.Я.Потягаевать, Т.П.Панкратовать, П.М.Рогожинонь, Е.Ф.Никишовать и педагогическяй трудонь лия ветераттнень лемсна. Прянь шнафтома вастокс велеса и районца ащи педагогическяй трудонь ветеранць, Мордовия Республикань Заслуженнай учительсь Г.В.Сетяев, кона учителень тевти макссь 47 киза.
Ниле кизот ётасть ся пингста, кода Григорий Васильевич аф работай Салазгорень средняй общеобразовательнай школаса. Но сединек-ваймонек мокшалясь «тонафтома» кудть, учениконзон мархта. Кенкшец панжада сембонди. Сидеста сувсихть учитель ялганза, ингольдень учениконза.
Писательхнень, журналисттнень, литературань кельгихнень оцю мяльсна содамс З.Ф.Дорофеевонь колга. Григорий Васильевичта лац кивок аф содасы народнай учительть, просветительть биографиянц, велеть историянц, трудонь кельги ломанензон. Сон ульсь аф аньцек историянь и обществознаниянь учителькс, но и оцю букваста Краеведкс. Кочкась козя материал Захар Фёдоровичень колга. Васьфнесь брадонц и брадонь рьванц мархта.
Г.В.Сетяев аф кржа вий путсь сянкса, штоба школать видеса панжемс историко-краеведческяй музей. Трудта путф пяк лама. И велеряйхне, и школав сашенды инжихне, и школань коллективсь тянемс аньцек шнамань валса лятфнесазь педагогическяй трудонь ветеранть.
47 кизоста Григорий Сетяевонь кодама аньцек сатфксонза ашельхть. «Поиск» вешендемань отрядсь лувондовсь инь цебярькс республикаса. А мзяра сяськи аноклась историянь, обществознаниянь, правань олимпиадатнень эса! Ламоц учениконза, олимпиадаса сяськихне арасть шнама ломанькс, прянь шнафтомакс велеса, районца.
Григорий Васильевичень эряфоц сотф Салазгорть мархта. Шачсь трудонь кельги оцю семьяса. Тядянза-алянза трудендакшнесть колхозса. Шнама ломанькс касфтозь и эсь идьснон. Григорий Васильевич васенда аделазе Зубова Полянань педагогическяй училищать, меле—Н.П.Огарёвонь лемса МГУ-ть. Панжадотольхть сембе китне, но сон кочказе Салазгорть, родной школанц, конанди лемдезе сембе эсь эряфонц. Тяса васьфтезе кельгома рьванц, Людмила Ивановнань. Сон географиянь учитель. Школати макссь 40-да лама киза. Сетяефнень вете идьсна. Оцю стирьсна, Ирина Григорьевна, эряй Зубова Полянаса. Покоди регистрационнай палатаса. Владимир Григорьевич аделазе Н.П.Огарёвонь лемса Мордовскяй госуниверситетонь историческяй факультетть, тяни Москуса полициянь офицер. Вячеслав Григорьевич шумордазе Зубова Полянань педагогическяй училищать, тяни специальнай военнай операциянь ётафтома вастса. Андрей Григорьевич аделазе М.Е.Евсевьевонь лемса педуниверситетонь историянь и правань факультетть, трудендай Москуса. Инь ёмлась, Ольга Григорьевна, васенда тонафнесь Темникавонь медицинскяй колледжса, тяни—Н.П.Огарёвонь лемса Мордовскяй госуниверситетонь Медицинскяй институтонь 4-це курсонь студентка. Сетяефнень кемгафтува уноксна. Оцюфне тонафнихть вузса, сяда ёмлатне якайхть школав, идень саду.
Тяни Г.В.Сетяев пенсияса, но кода сонць корхтай, ваймосемс аш мзярда. Кирди жуватат, касфты перень сёрот.
Касы поколенияти азонкшнесы, кода тонафнесь училищаса, вузса, трудендакшнесь школаса. Но васенце вастса фалу велеть историяц. Иттненди эрявихть содамс эсь юрсна, китольхть атясна-бабасна, щятясна-щавасна, кода трясть пря, кодама щамса-карямса якасть и стак тов. А мзяра казнедонза! Сембе синь афи лятфтавихть. Лама киза седикс-ваймокс покодеманкса казьф Мордовия Республикань, Правительствань, Государственнай Собраниянь, Образованиянь министерствань, Торбеевскяй муниципальнай райононь администрациянь Почётнай грамотаснон мархта. А мзяра дипломдонза, Благодарносттенза, лия казнедонза. Инь оцюсь эздост—Мордовия Республикань Заслуженнай учитель почётнай лемсь.
Илья Вешкин.
Снимкаса: Г.В.Сетяев.