Тяддесь Россияса азф Педагогонь и наставниконь кизокс. Учителень тевсь фалу ульсь аф тёждякс и ответственнайкс. Вдь учительсь анокласыне иттнень и подросткатнень оцю эряфти, лезды теест сай пингонь профессиять кочкамста.
Ламотне школать шумордамдонза меле молихть тонафнема учителькс, сяс мес ули оцю мяльсна максомс школаса тонафнихненди содамошит. Тяфтапнень ёткс сувси и од педагогсь Маргарита Морозкина.
Аф кунара корреспондентоньке васетькшнесь мархтонза. Маргарита Олеговна работай Зубово-Полянскяй райононь Лесной велень основной общеобразовательнай школаса, вяти мокшень и немецкяй кялень урокт. Сон мокшава.
—Работан учителькс Лесной средняй общеобразовательнай школаса, коса монць аделань 9 класст. Сяда тов шумордайне Зубово-Полянскяй педагогическяй колледжть. Тяни тонафнян М.Е.Евсевьевонь лемса МГПУ-са психологиянь и дефектологиянь факультетса заочнай отделенияса логопедкс,—мярьгсь Маргарита. —Вятян урокт 2-9 класснень эса, а нинге класснай руководителян 6-це класса.
—Мес кочкайть учителень профессиять? Мезьса сон салазе мяльцень?
—Шабакс ульсть някане и мархтост сидеста налхксекшнень школаняса. Озафнине фкя-фкянь ваксс, макссень каготкат, конатнень лангс синь сёрмадсть диктантт, сочиненият. Меле кочксине, путнень оценкат. А нинге кельгсайне иттнень и мархтост работамать.
—Мезе учеть профессияцень эзда и мезть мархта васьфтеть, мзярда ушедоть покодема?
—Содайне, што тёждя аф ули, сяс мес учительть лангса фалу оцю ответственность. Но, мзярда шарьхкодят тевса и кельгсак сонь, стака аф ули и тевсь туй мялезот.
—Азк, пожалуйста, а кодамкс ульсь работамань васенце кизоце?
—Сембось салсезе мялезень. Курокста тонадонь сянди, што учителян. Тяда башка, ётась лама пуромкс, конатнень эса улень вятикс или кочксефолень жюринь членкс.
—Урокта башка, улема, школаса ётафнят и кой-кодама мероприятият?
—Воспитательнай работать коряс советникан. Иттнень мархта ётафнян мероприятият, конат лемтьфт Авань международнай шити, Од кизоти и стак тов. Нинге вятян школаса тонафнихненди «Разговоры о важном» урокт.
—Тевдот, шарьхкотьф, аф кржа. Кенерькшнят семботь тиемс?
—Кенерькшнян, сяс мес тевозе мялезон. Сембось тиема эсь пингстонза, эста стакат-сталмот аф улихть. Сяс пингозень мархта прябалат аш.
—Учительти вешема киня эрь тонафнить седис, эста ули фкя-фкянь шарьхкодема. А тон, Маргарита Олеговна, мушендат марстонь кяль ученикнень мархта?
—Тонафнихне и мон шарьхкоттяма фкя-фкянь. А тянь эзда ащи ламось. Тяконь лувксса и тонафнемаса сатфксне. Кой-коста сатомшка корхтамс стирнять или цёранять мархта, штоба сон шарьхкоделезе, што учительсь теенза аф аньцек тя или тона предметти тонафты, но и ялга, лезды.
—Лятфтак, кодама тонафникс улеть тонць.
—Школаса тонафнень лац, сяс мес тя ульсь мялезон. Сембе учительхне тевонь содайхтельхть. Тиендезь семботь, штоба кочкалеме сяда лама содамоши.
—Кодамот платтне эряенди? Ёрат покодемс тяка вастса, или, пади, арьсят ошу тумать колга?
—Аф пяк кельгсайне оцю ошнень. Тейне сяда мала велесь. Конешна, улихть кой-кодама планне, но инголенди азондомост аф карман.
—Кодамкс няйсак эсь пряцень 10 кизода меле?
—Арьсян, аф кадса кочкаф профессиять, стаки карман покодема учителькс. Улема, ся пингти кармай семьязе. Учан сетьме, павазу эряф.
—Мезе азолеть сятненди, кит ёрайхть сотомс эряфснон учителень тевть мархта?
—Учительти эряви профессионализма, содама эсь тевцень, покодема тяфта, штоба улельхть цебярь результатт. Учительти маштома работама шабатнень мархта, а тя макссеви аф сембонди.
—Мяльце мезевок азомс од учительхненди?
—Од учительти работама аф аньцек шабатнень мархта, но и эсь «лангсонза». Фалу козякофнемат содамошитне. Тонафтыень тевсь—тя аф фкя вастса ащема, фалу ётнемат курст. Аф эряви пелемс, што мезське аф лиси. Главнайсь, кельгость эсь профессиянтень, эста сембось ули лац.
—Сюкпря, Маргарита Олеговна! Арьсетяма тейть сатфкст тевсот.
Илья ПЕРВОЙКИН.