Сире Шайгавонь райононь Сире Теризморга велеса сембонди содаф З.В.Шеяновать кудоц. Сон ащи велень церькавть ваксса. Ваяф сад потмос. Сняра марлюдонза, што эрьгодят ёткозост.
—Аньцек марьхне киндивок аф эрявихть,—корхтай Зинаида Владимировна.—Тяддевок эздост сняроль, што ашельхть ков тиемс. Пяк лама садозон наксадсь.
Касфтсь перень сёронь оцю урожай: шурьхкат, пурьхкат, куярхт, помидорат. А тиемс тожа ашет ков. Иденза сявихть кржа. А эстеенза пяк лама аф эряви. Пидек лям, ськамот недляньберьф аф сивови.
Зинаида Владимировна Сире Теризморгань рьвяня. Но тя велесь арась теенза пяк роднойкс. Эряй тяса пяк кунара. Тястоннель мирдец. Тяса шачсть и кассть кафта цёранза. Тяса трудендакшнесь, покотькшнесь школаса.
Эсь шачема вастоц Зинаида Владимировнань Атерь велесь. А шачсь сон 1957 кизоня мокшень оцю семьяса. Родителенза, Мария Никифоровна и Владимир Филиппович Кулягиттне, трудонь кельги ломаттельхть. Касфтсть цебярь итть, конат сембе музь эсь вастснон эряфса, арасть кельгома тядякс-алякс, рьвакс-мирдекс. Касфтсть аф кальдяв итть. Кепотьксонди, сазороц, Татьяна Владимировна Паркина, тусь киганза. Сон тожа кочказе тонафтыень тевть. Трудендась учителькс Атюрьевскяй райононь Перевесье велеса. Иван Владимирович аф тонафтыель, но шнама ломанель Атерь велеса. Стирец, Юлия Ивановна Волгапкина, тусь аканзон киге. Сон покоди Атерь велень 2№ средняй общеобразовательнай школаса.
Сонць З.В.Шеянова эсь пингстонза аделазе Атерь велень 2№ средняй школать. Тонафнесь аф кальдявста. Мзярдовок аф юкстасыне эстонь пингонь учителензон А.Д. Аверинать, А.Е. Шляпниковать, А.Д. Федоровонь, И.М. Ларькинонь,
П.П. Шишкановать. Класснай руководителькс ульсь А.В. Стяпинась. Ня тонафтыхне Шкайть эздотольхть. Лемсна оцю букваса сёрматфтольхть районть историяс. Тяфтама ломаттнень видеса кальдявста тонафнемс ашель кода. И Зинаида Владимировна старандась, тонафнесь. Школань аделамда меле тусь тонафнема Ардатовонь культпросветучилищав. Пяк мялецоль улемс культурань работникокс. Нинге стирнякс пяк мазыель вайгялец. Морсесь стирня ялганзон мархта школань концерттнень, райононь илатнень эса. И шабань ёньцонза эста арьсесь, што тя сонь призванияц. Училищань аделамда меле сась Сире Теризморгав. Но тястонь клубса теенза ашезь мув покодема васта. Эстонь школань директорсь В.П.Начкин тердезе покодема пионервожатайкс. Теенза эрявсть цебярь специалистт, конат тонафтолезь шабатнень морама, водендалезь лия пара тевонь тиема. Зинаида Владимировна аделазе М.Е. Евсевьевонь лемса МГПИ-нь филологическяй факультетса мокшэрзянь отделениять. Трудендакшнесь Сире Теризморгань школаса пениянь, рисованиянь, мокшень, рузонь кялень и литературань учителькс 1979 кизоста сявомок 2017 кизоти самс. Сембоц макссь школати 38 киза. Да и тянемс сон мяльса кирдьсыне школать тевонзон, учитель ялганзон, конатнень мархта тисть фкя и пяк эрявикс тев—макссть цебярь содамошит велень иднятненди. Нят Т.В.Гераськина, Е.П.Чевтайкина, М.Я.Чудаева, И.В.Пивкин, лиятне. И эсь, и ученикснон лемсна кайгсть районца, республикаса. Синь лисендсть сяськикс райононь, республикань предметнай олимпиадатнень, пялькстоматнень эса. Да и оцювонь эряфсовок инксост мзярдовок аф сави якстерьгодомс. Синь Сире Теризморгаса, Сире Шайгавонь районца, да и сембе республикаса шнама ломатть. Школаса маряйхть инксост оцю гордость. Лятфтасаськ, кепотьксонди, С.А.Видясовать. Сон тожа тусь Зинаида Владимировнань киге, кочказе тонафтыень тевть. Покодсь школаса учителькс, директоркс. Тяни сон вятьсы Сире Теризморгань Национальнай культурань центрать. Сонь лемоц лац содаф республикаса. Мокшэрзянь народть межрегиональнай общественнай организациясонза исполкомонь член. Тя ломанть мархта аш кода аф шнафтомс пря. Фалу Зинаида Владимировна лятфнесыне протоиерейть Евгениень, Ирина Ивановна Шеяновать, Татьяна Николаевна Кадеровать, Елена Владимировна Ямашкинать и лиятнень. Синьфтемост ашезь ётне школаса фкявок ила. И тянивок сембе вийснон, эрьгаснон и содамошиснон макссесазь кельгома тевснонды.
Сембоса кепотьксокс Сире Теризморгаса ащи и Зинаида Владимировнань семьяц. Мирдец, Николай Иванович, покотькшнесь Сире Шайгавонь СХТ-са водителькс. Ужяленди, сон ёфси одста тусь лия эряфс. Оцю кельгомаса шачфтозь и эсь колма идьснон. Владимир и Руслан эряй-ащи ломатть. Синцень эряма, покодема вастсна, семьясна. Казьсть Зинаида Владимировнанди ниле унокт, конат кельгсазь бабаснон, сидеста сашендыхть варжамонза. Ульсь мокшавать и стирняц, конац ашезь ванфтов.
Ульсь Тройцянь ши. Сонць мокшавась срхкась Атери калмолангс. А вейхкса кизоса Светась срхкась ялганзон мархта Сивини эшеляма. И ваясь. Тя ульсь лама кизода инголе. Но Зинаида Владимировнань тянемс аф лиси седистонза тя трагедиясь, кельгома стирняц. Ляди мялезонза, аф кирдевихть сельмоведенза. Но мезевок аф тият, Шкаень воля. Меки аф мрдафтсак.
Мекольдень кизотнень З.В.Шеяновась сидеста сяряди. Но кядензон аф нолясыне. Старандай сембоса кенеремс. И фалу пара мяльса лятфнесыне одонь кизонзон. А синь пяк козятольхть интереснай событияса. Трудонь кельги мокшавась, педагогическяй трудонь ветеранць сонць сёрмадсь мокшень кяльса стихт, морот. Вятьсь иттнень мархта морамань кружокт. Сонць якась морама. Но тянемс седиец аф кирди, ктмолды, пчкясь мрдаль ся павазу пингти, одксшити. Тянемс мазы вайгялец. Таргай мокшень мора и аф эряви кодамовок заслуженнай артист.
—А Атери лажаткшнят?—кизефтине Зинаида Владимировнань.
—Лажаткшнян, конешна. Ну вов тяни монь Атерезе—Сире Теризморгась. Да и кода корхтай легендась, Сире Теризморгась Атерьть эзда и лиссь. Якамати эряви цебярь шумбраши. А мон якайсь тонць няйсамак кодаман. Кудса шарован-тарован, пичефтеви эсь прязе и пара.
Илья Вешкин.