Пуромкшнесть мокшень, эрзянь, татаронь кялень кельгихне

17 январьста Саранскяйса, Н.П.Огарёвонь лемса Мордовскяй государственнай университетса, ётафтовсь школаса тонафнихнень Мордовия Республикань государственнай мордовскяй (мокшень, эрзянь) кяльхнень коряс Межрегиональнай олимпиадаснон республиканскяй этапоц (2022-2023 тонафнемань кизось).
Тяда башка, тя шиня ульсь татаронь кяльть и литературать коряс республиканскяй олимпиадась, конань эса примасть участия 9-11 класснень эса тонафнихне.
Мокшень и эрзянь кяльхнень коряс содамошиснон няфтезь 3-7 класснень эса тонафнихне ся школатнень эзда, коса тонафневи государственнай мордовскяй (мокшень, эрзянь) кяльсь—Межрегиональнай олимпиадать муниципальнай этапонц сяськиенза.
Олимпиадать ушедомдонза инголе МГУ-ть ректороц Дмитрий Глушко содафтсь колма аудиториява озсеф участникнень мархта, арьсесь теест сатфкст олимпиадань заданиятнень тиемста.
Массовай информациянь средствань представительхненди ректорсь пачфтезе, што Мордовскяй госуниверситетсь оцю мяльса кирнесыне образовательнай тяфтама проекттнень ширеснон.
—Родной кяльхне ломанть эряфса занцихть башка васта, тяконь лувксса культураса, койхнень ванфтомаса. Сяс эряви, штоба университетсь улель аф аньцек олимпиадань ётафтома вастокс, а араль коень ванфтомань площадкакс. Национальнай кяльхне пяк эрявихть. Преподавателеньке аноклайхть мордовскяй кяльхнень коряс специалистт. Олимпиадань участникне няйсазь кода миньцонк ладяфт тефне, кода мольфтьсаськ работаньконь. Надиян, шабатнень ламошкасна сайхть мяльс поступамс Мордовскяй госуниверситету,—мярьгсь сон.
28 февральста и 1 мартста содамошиснон няфтема пуромихть 9, 10, 11 класснень эса тонафнихне—родной (мокшень, эрзянь) кяльть и мокшэрзянь литературать коряс Межрегиональнай олимпиадать муниципальнай этапсонза сяськихне.
Т.Альшина.