Ректоркс кочкаф Дмитрий Глушко

Н.П.Огарёвонь лемса Национальнай исследовательскяй Мордовскяй государственнай университетса 21 июньцта ётафтовсь ректоронь кочкамать коряс конференция. Работасонза примась участия Мордовия Республикань Оцюнясь Артём Здунов.
Панжезе конференциять университетонь васенце проректорсь, ректорть кочкаманц коряс комиссиять председателец Пётр Сенин.
РФ-нь Аттестационнай комиссиять решениянц коряс, кочкаматненди аттестация ётасть кафта кандидаттне: Дмитрий Евгеньевич Глушко—ректорть тевонзон тиендисна и Александр Михайлович Давыдкин—научнай работать коряс проректорсь.
Кафцьке кандидаттне азозь вузть сяда тов виияфнеманц коряс мяльснон-арьсемаснон. Конференциянь участникне и Мордовиянь Оцюнясь кирдезь Дмитрий Глушконь ширенц.
Артём Здунов отмечазе образованиянь сфераса сонь оцюдонга оцю опытонц, тяконь лувксса федеральнай уровеньцовок. «Дмитрий Евгеньевич—ломань, кона кемоста ащи модать лангса. Сон машты работама: путнема задачат и пяшкотькшнемост синь. ВУЗ-са работамста тонафнезе университетть структуранц, шарьхкодезень сембе хозяйственнай тефнень и содасы, кода аськолямс сяда тов»,—китькстазе региононь руководительсь.
Вайгяльхнень ламошкаснон мархта университетонь ректоркс кочкафоль Дмитрий Глушко.