1 апрельста сявомок 30 июнти молемс Российскяй Федерациянь народонь родной кялень Федеральнай институтсь Россиянь Просвещениянь министерствать лезксонц вельде васенцеда ётафтсь конкурс, коса ванондовсть рузонь и родной кялень преподавательхнень методическяй разработкасна. Эсонза примасть участия 311 конкурсант Россиянь 56 регионцта. Сяськихнень лемснон азозь 30 июньца Москуса. Работатне вановсть 4 номинациява.
Школань учительхне, дополнительнай образованиянь и дошкольнай организациянь педагокне няфтезь, кода синь работасна лездыхть ванфтомс Россиянь нароттнень кяльснон и культураснон. И кода синь работайхть национальнай писательхнень произведенияснон коряс налхкоматнень-постановкатнень, идень проекттнень, народнай искусствати лемтьф урокнень вельде. Культурать, региононь эсь лацонь шитнень, этнографиять лангс ванозь учительхне тонафтсазь иттнень родной кяльть тонафнемонза, кельгомонза.
Всероссийскяй конкурста инголе миньцонк ётафтовсь региональнай конкурсонь этап, коса инь цебярькс лувфтольхть Саранскяень 24№ школань мокшень кялень учительть Марина Николаевна Мироновать работанза. Республикань сембе участникнень эзда, критерийхнень коряс, кочкавсть 10 учительхть, конатнень работасна кучфтольхть Москуву. Сяльде жюрись явозень работатнень 4 номинациява, эрь номинацияса фкя сяськи и кафта призёрхт. Марина Николаевна Миронова арась призёркс васенце номинациять эса, коза кучфоль 110 работа.
Эряви азомс, Мордовияста мокшень и эрзянь кялень сембе учительхне пяк лац няфтезь пряснон тя конкурсть эса. Сяськида башка, эрь номинацияса кочкафтольхть нинге 10 учительхть, конатнень работаснон лангс жюрись шарфтсь башка мяль. Башка питне максфоль Дагестанцта, Ингушетияста, Кавказста и Мордовияста учительхнень работаснонды.
—Конкурсть пингста васьфтине ламонц учительхнень, конатнень мархта примаме участия Родной кяльхнень коряс Всероссийскяй мастер-класса. Сон ушедсь ётафневома 2007 кизоня, мон васенце участникнень эзда фкяселень, сяськонь «Учитель-исследователь» номинацияса. Российскяй Федерациянь нароттнень рузонь и родной кялень преподавательснонды методическяй разработкань Всероссийскяй конкурссь ётафтови васенцеда. Арьсян, сяда тов сон кармай вииякшнема, касыхть региоттнень-участникнень лувкссна. Тя пяк пара, мес тяфтама конкурс ётафтови, и Москуса кайгихть мокшень, эрзянь, татаронь и лия кяльхне»,—мярьгсь М.Н.Миронова.
Марина Николаевна Миронова работай учителькс 22 киза, оцю мяль шарфни мокшень кяльть тонафтоманцты аф аньцек школаса. Лама киза сон вятезе «Эряк, шачема кяль!» межрегиональнай образовательнай лагернай сменать. Тяддевок «Сивинь» шумбрашинь пети идень лагерьса кочкавсь 40-да лама шаба.
О.Белкина.