Рузонь культурань и кялень центра—Индияса

16 сентябрьста Ченнаи индийскяй ошса, SRM-нь наукань и технологиянь институтса, панжевсь Н.П.Огарёвонь лемса МГУ-нь Рузонь кялень и Культурань центра. Сонь видесонза кармайхть ётафневома рузонь кяльть коряс курст студенттненди, эрь-кодама культурнай мероприятият, тяконь лувксса рузонь литературать, историять и искусствать коряс мастер-класст и панжада лекцият.
Центрать панжемаса примасть участия почётнай инжихть: Ченнаи ошса Россиянь Генеральнай консулсь Валерий Ходжаев, Россотрудничествать руководителенц заместителец Павел Шевцов, Ченнаи ошса Рузонь кудть руководителец Александр Додонов.
«Лувондсаськ, што тя оцю события кода Российскяй Федерацияти, стане и Индияти. Индиянь пяк лама од ломанць тушендыхть тонафнема Российскяй Федерацияв. Стане жа минь няйсаськ, што Россияса коль сяда оцю мяль шарфневи хинди и Индиянь лия кяльхнень тонафнемаснонды. Минь содасаськ, што кяльхнень тонафнемасна—тя цебярь ки торгово-экономическяй, политическяй, гуманитарнай соткснень виияфнемаснонды и странаньконь ёткса фкя-фкянь шарьхкодемати. Тяни мирсь полафни, и Россиясь активнайста ваны Юго-Восточнай Азиять шири. Арьсян, што тя Центрать панжемац лезды сядонга кемокстамс ётксонк соткснень»,—мярьгсь Россотрудничествать руководителенц заместителец Павел Шевцов.
Арьсекшневи, што Рузонь кялень и Культурань центрась кармай занцема башка оцю васта Россиять и Индиять ёткса культурнай и образовательнай соткснень кемокснемаса. Центрать фкя инь васенце задачанзон ёткста фкясь—российскяй вузонь магистратураса и аспирантураса тонафнемати индийскяй студенттнень анокламасна.
Центрась арай важнай вастокс Индиянь академическяй средаса рузонь культурать и кяльть келептеманкса, мезсь лезды кемокстамс странатнень ёткса ялгафты соткснень.
Панжемань шиня видео- связть коряс Индияста и Россияста слушательхненди няфтьфтольхть образовательнай программатне. Кафцьке странатнень эзда студенттне анокласть творческяй выступленият.
«Вейхкса ковда тяда инголе минь васедеме и эстокиге саме мяльс ушедомс работать. Нюрьхкяня пингста тонадоме фкя-фкянь кулема и курокста сатнемс результатт. Кеман, што Рузонь кялень и Культурань центрась лезды тейнек шарьхкотькшнемс фкя-фкянь нинге сядонга лац. Университетстонк васенце студенттне ётасть ни тяса стажировка. И тяни минь ученттама, мзярда SRM-нь институтонь командась марса студенттнень мархта сай Россияв и минь университетозонк»,—мярьгсь Н.П.Огарёвонь лемса МГУ-нь ректорсь Дмитрий Глушко.