Саранскяйса панчф православнай гимназия

Мордовия Республикань православнай сообществать кунардонь арьсемац ётафтовсь эряфс. Васенце сентябрьста Саранскяйса панжевсь Феодор Ушаковонь, святой праведнай воинть, лемса православнай гимназиясь. Од гимназиянь васенце линейкаса ульсь Мордовия Республикань Оцюнясь Артём Здунов.
—Минь нинге мзярдовок ашеме панчсе республикасонк православнай гимназия,—азозе А.А.Здунов—Тя минь ширденк аф оцю, но пяк эрявикс аськолкс. Тянь тисаськ седиеньконь кулхцондозь, Патриархть Кириллонь бславаманц коряс, Митрополитть Зиновиень оцю путксонц вельде. Тя ушеткс оцю кити. Тя мяльти сась минь обществаньке. И ся фактсь, што гимназиясь каннесы минь православнай флотоводецоньконь лемонц—стане жа оцю честь тейнек. Сай кизоть отмечасаськ менелень аралаеньконь канонизацияста 25 кизоть. Арьсян, што гимназиясь цебярьста аноклай тя событияти. Шабатненди арьсян цебярьста тонафнемс, кулхцондомс тонафтыснон, мумс од ялгат и од содамошит, конат пяк эрявихть тяниень пингть.
Линейкаса шабада башка ульсть родительхть, СВО-нь ветератт. Теест пшкядсь Саранскяй и Мордовскяй митрополитсь Зиновий:
—Минь гимназияньке—тя аф аньцек тонафнема васта, но и верондама, пара тефт. Гимназиянь панжема бславамазь Московскяй и сембе Русень Патриархсь Кирилл.
Владыкась Зиновий седиста моли лямбе валхт азсь гимназиять панжемста лезксонь максоманкса республикань Оцюнять А.А.Здуновонь, Саранск ошень округонь оцюнять Владимир Быковонь, образованиянь министрть Елена Солдатовать лемс. Владыкась башка отмечазе бизнес-сообществать инвентарень, тяниень пингонь партань и тонафнема книгань рамаманкса. Шнамань валхт азфтольхть и тонафтыхнень лемс, конат ашесть пеле кярьмодемс од тевти. Покодема гимназияв састь ошень инь цебярь тонафтыхне, конат аф пелихть стакада-сталмода, конат содасазь эсь тевснон. Владыкась Зиновий бславазень синь оцю и пяк эрявикс тевонь тиендема.
Фкявок ила аф ётни казнефтома. Государственнай Флагонь кеподемда, Государственнай гимнать морамдонза и васенце пайгонять шавомдонза меле, Республикань Оцюнясь А.А.Здунов макссь васенце классу сайхненди казнет—тонафнемань наборхт.
Тонафнемань планць гимназияса тиф начальнай общай образованиянь Федеральнай государственнай образовательнай стандартть коряс. Шабатнень учсазь рузонь кяльсь, математикась, литературнай лувомась, физкультурась и лия предметтне. Православнай образованиять пингста кармайхть тонафнемост церковно-славянскяй кяльть, церковнай морамать. Кармайхть тонафнема и православнай верать основанзон. Тя сембось кармай тиендевома урокта меле, «кувалготф шинь группаса».
Сембоц гимназияса кармай тонафнема 25 шаба. Эздост тиф ниле класст. Но тя аньцек ушеткс. Иттнень лувкссна кармай касома.
Илья Вешкин.