Школась тонафнемань од кизоти анок

Атюрьевскяй райононь Крхтаж велень средняй общеобразовательнай школаса васенце сентябрьста парта ваксс озай колмогемоньда лама шаба. Синь эряйхть Крхтаж, Оброчнай, Вольно-Никольск велетнень эса. Тонафнемань од кизоти сембось анок.
—Школаньке оцю, валда,—корхтай школань директорсь Н.И.Бурнашкин.—Тифт сембе условиятне цебярьста тонафнемс, ваймамс, ётафнемс илат. Школань коллективсь, администрациясь аф кальдявста трудендасть кизонь каникулатнень пингста. Сембось школасонк отвечай тяниень пингть вешфксонзонды.
Но васенце вастсот тонафтыень кадратне. Крхтажень школаса тянь мархта аш кодамовок прябалат. Трудендайхть тевонь содай, педагогическяй оцю опыт мархта тонафтыхть. Корхтамась мольфтеви Мордовия Республикань Заслуженнай учительть Н.Н.Сиркинать колга. Историянь и обществань урокта башка сонь вятьсыне историко-краеведческяй музеень тефнень. Школаса оцю спортзал. Сон стане жа аф кунара петьф. Физвоспитаниянь урокнень вятьсазь Н.И.Бурнашкин, С.И.Маскайкин, Т.М.Сорокина.
Сембе эряфснон школати максозь Н.Я.Алёнина, Т.М.Кабанова, Т.С.Ипполитова, С.И.Чумарова, Н.А.Пиксаева, лиятне. Синь васенце сентябрьста васьфтьсазь эсь ученикснон.
Васенце сентябрьста школань оцю илас тердьсазь и педагогическяй трудонь ветераттнень, конат школати макссть 35-40-нь киза. Нят Р.Г.Сургаева, И.П.Бурнашкина, Т.М.Мелёшкина, Н.И.Сургаева, П.И.Дорожкина, лиятне.
Илья Вешкин.