ШКОЛАСА ЁТАСЬ РАЙОННАЙ СЕМИНАР

Сире Шайгавонь средняй общеобразовательнай школаса ётафтовсь математикань и физикань учительхнень районнай семинарсна. Эсонза примасть участия райононь образованиянь управлениянь оцюнясь Н.В.Чалдышкина, методистонь центрать директороц Н.М.Курзина.
Семинарс сашендсть Сире Теризморгань, Богдановкань, Новотроицкяень, Мельцанонь, Од Акшинань школань математикань и физикань тонафтыхне.
Райцентрань школась кочкафоль аф стак. «Образование» национальнай проектть коряс зданиясь петьфоль и ланга, и потмова. Школась полафтсь сяшкава, што ламотне ингольдень кабинеттнень ашезь сода. Школать потмоц одкстомсь, валдомсь. Кабинеттнень эса — питни оборудования, мебель. Аф стак районнай семинарть арьсесть ушедомс экскурсияста.
—Кодамкс школась ульсь и кодамкс арась, тя эряви няемс, валса сембось аф азови,—корхтай школань директорсь Г.Г.Венчакова.—Кой-кона учительхне школаньконь петемда меле ширесонк ашельхть. Сяс семботь няфтеськ, семботь азондоськ.
А тоса синь мольсть панжада урокс. Районнай семинарське тя школаса ётафтовсь аф стак. 2024 кизоня школась примась участия федеральнай проектса «Беспилотная авиационная система». Лиссть сяськихнень ёткс. Макссть 10 миллиотт цалковай оборудованиянь рамамс. Тя оборудованиясь пачфтьфоль МР-нь образованиянь министерствать вельде. Панчфтольхть кафта класст. Фкять эса тонафнесазь теориять, омбоцесь тиф практическяй занятиянь ётафнемс. Эзост оцю мяльса якайхть 5-11 классонь тонафнихне. Шабатнень мархта работай Н.П.Дёмкин. Сон и семинару сафненди няфтезень классонзон, азондозе, кода покоди иттнень мархта урокса, урокта меле. Ламоль кизефкста. Фкявок эздост ответфтома ашезь ляда.
В.Н.Пивкина макссь панжада урок математикаса кафксоце класса, Н.П.Дёмкин — физикаса кемонце класса. М.С.Лизунков няфтсь тонафтыхненди «Математическое кафе» мастер-класс.
Семинарсь ётась пяк интереснайста, цебярьста аноклафста. Лия школань учительхненди ульсь мезе ваномс, мезьти тонафнемс Сире Шайгавонь средняй общеобразовательнай школаса. Тякоть отмечазь образованиянь управлениянь, методическяй центрань специалисттне итогонь тиемста.
Илья ВЕШКИН.