Газетаньконь тячиень номерсонза азонттама Ковылкинскяй райононь Рыбкина велень Почётнай гражданинть, педагогическяй трудонь ветеранть, оцю букваста Учительть Валентина Николаевна Учкинать колга.
Шачсь-кассь Валентина Николаевна 1944 кизоня Краснослободскяй райононь Сире Сендру велеса. Идькс пингстокиге ульсь весяла стирнякс. Кельгозе ялганзон мархта налхксеманц, велень и школань илатнень эса участвовандаманц. Сонь мазы вайгялец. Школать аделамдонза меле Валентина тонафнесь Н.П.Огарёвонь лемса Мордовскяй государственнай университетонь биологическяй факультетса. Сяльде кода од специалистонди, теенза максфоль направления Рыбкина велень школав. Тоса эряй тянемс.
Кода азозе Валентина Николаевна, сембе эряфонц максозе тя велети, иттненди, конатнень эса тонафнесь пяле векта ламос. Рузавась курокста тонадозе мокшень кяльть, ушедсь тонафнемонза народнай фольклорть, кельгомост мокшень моротнень. Мзярда Валентина Учкинась сась школав, шабада ульсь пцтай тёжянь, тонафнесть кафта сменаса. Уроконзон пингста ульсь фкя-фкянь шарьхкодема. Но тяка пингть учительсь пяк вешфксуволь.
Пингонь ётазь Валентина Николаевнань путозь школань директорти аф классонь работать коряс заместителькс, сяльде—завучекс, а меле и директоркс.
Сонь пингстонза ушедовсь школать строямац. Од директорти эрявсь семботь мельге ваномс, пцтай эрь шиня арнемс райцентрав. Но сон ашезень ноля кядензон, мяленц кепсезе ся, што иттне курок сайхть тонафнема од школав. И вов сон панжезень кенкшензон! Классне валтт, оцюфт.
Валентина Николаевнань пингста Рыбкинань школась участвовандакшнесь сембе конкурснень эса. Нилексть занцезе васенце васттнень «Школа года» конкурсса, получась «Школа века» диплом, а сонць директорсь нилексть лисендсь сяськикс «Учитель года» конкурсса.
Валентина Николаевна вятсь оцю общественнай работа. Сонь вельденза кочкафоль «Ляйне» фольклорнай ансамбльсь, кона 2000 кизоня сон получась «Народный коллектив любительского художественного творчества» лем. «Ляйне» ансамбльсь кирдсь кеме соткст композиторть и фольклористть, Мордовиянь культурань Заслуженнай работникть Георгий Иванович Сураевонь-Королёвонь мархта.
Коллективсь выступандакшнесь аф аньцек Рыбкина мокшень велеса, но и Оренбургскяй областьса, Москуса и Саранск ошса.
Тяни Валентина Николаевна аньцек кеняртькшни одкстоптф «Ляйне» ансамбльть сатфксонзонды. «Шумбрат, Мордовия!» Народнай творчествань Республиканскяй фестивальста и лия конкурсста синь мртцихть лауреатонь диплом и грамота мархта.
Валентина Учкинась панчсь школаса национальнай культурань музей, коса кочкафт сире пингонь кровать, сёвонень кядьгот, орхт, карьхть, эсь кядьса кодаф нардамат, нюрям и кунардонь пингонь лия паршихть. Музеи сашендсть инжихть мянь Эстонияста.
Валентина Николаевна аф каендай, мес кочказе учителень профессиять. Сон РФ-нь Просвещениянь отличник, Мордовия Республикань образованиянь Заслуженнай работник. Валентина Учкинась казьф лама Почётнай грамотаса и дипломса.
Арьсетяма Валентина Николаевнанди шумбраши, лама кизонь эряф!
Антонина ИВАНОВА.