Светлана Надейкина вов ни 3 кизот вяти рузонь кялень и литературань, мокшень и эрзянь кялень урокт Саранск ошень 37№ школаса. Шачемас коре мокшень стирсь Зубово-Полянскяй райононь Жуку велеста. М.Е.Евсевьевонь лемса Мордовскяй государственнай педагогическяй университетонь филологическяй факультетса васенда шумордазе бакалавриатть, а сяльде—магистратурать. Вузса тонафнемста оцю мяль шарфнесь кяльть и литературать лангс: сборникнень эса лисендсть научнай статьянза, примсесь участия эрь-кодама конференцияса и олимпиадаса, конатнень эса сидеста лисендсь сяськикс. Тянь колга газетаса пачфнеме ни.
Тянивок, учителькс работамста и сонць, и тонафнихне варчсесазь вийснон ламоц конкурснень эса. Кепотьксонди, тядде «Копилка успеха» школьнай методическяй службань фестивальсь» ошень конкурсса Светлана Валерьевна арась призёркс. Меля лиссь призёркс рузонь кяльть коряс Всероссийскяй олимпиадать региональнай этапсонза.
Тяддень тонафнема кизось од учительти ульсь стакакс. 37№ школаса мольфтеви капитальнай ремонт, сяс ученикне явфтольхть кафта сменава и тонафнесть кафта школаса. Светлана Валерьевна вятсь урокт васенце и омбоце сменатнень пингста, сяс сашендовсь якамс кафта школава. Май ковста 11 классонь тонафнихне макссть рузонь кяльть коряс Единай государственнай экзамен. Пичедсь и таколдсь учениконзон инкса.
Минь корреспондентоньке корхнесь Светлана Надейкинать мархта учителень тевонц колга.
—Светлана Валерьевна, мес кочкайть учителень профессиять?
—Фалу ёрань сотомс эряфозень тяфтама профессия мархта, кона лездоль ломаттненди. Идькс пингста сявомок мялезель улемс врачекс. Мзярда тунь васенце классу, шарьхкодине, кодама пара учителень профессиясь. Кяльти кельгомать тейне панжезь рузонь кялень учителезе Татьяна Гудожникова и мокшень кялень тонафтыезе Нина Кинякина. Школаса примсень участия олимпиадатнень эса, яксень выставкас. 11 класста меле тядязень мархта кандоськ документонень М.Е.Евсевьевонь лемса МГПУ-в.
—Кода ётнесь университетса тонафнема пингце?
—Университетса тонафнема пингсь—инь цебярсь эряфса. Сидеста примсень участия конкурснень, конференциятнень эса, конат ётафневсть Россиянь тя или тона регионца. Аф весть лисендень сяськикс. Омбоце курсста сявомок ушедонь работама родной кялень и литературань кафедраса. Ветеце курсса арань филологическяй факультетонь секретарькс. 2020 кизоста сявомок работан школаса.
Мрдафтолине университетса тонафнемань пингозень, якалень занятияс. Пара мяльса васетькшнян фкя группаса тонафни ялганень мархта: ламотне работайхть ошень школатнень эса учителькс. Сидеста улендян родной факультетса, кирдян соткст преподавательхнень мархта. Синь пачфнихть ётафневи конкурснень колга, конатнень эса примсетяма участия. Тонафнихнень мархта якатама педагогическяй университету, азонкшнян тонафнемазень колга. Тя пяк тушенды мялезост.
—Азонтт «Ярмарка учебно-методических инноваций» ошень конкурсть колга, коса тон арать призёркс.
—Тя конкурсса учительхне няфнесазь эсь инновационнай технологияснон—мезть урокса ётафнесазь эсь лацоннекс. Проектозе сотфоль мокшень кяльть мархта. Азондонь ся приёмтнень колга, конат лездыхть касфтомс познавательнай компетенциятнень, мзярда шабатне работайхть валкс мархта. Конкурсть пингста жюрити ётафтонь аф оцю урок-налхксема. Кизефтине: «Любите ли вы пачат так, как люблю их я?» Синь ушедсть вешендемонза тя валть валксста. Сяльде нинге максонь тя валть мархта сотф заданият, коса эрявсь работамс разнай валкс мархта. Работась марнек аудиториясь. Няфтень «Ярхцамбяль» темать коряс уроконь пакш.
—Мезсь работасот сембода стакась?
—Васень пингть сембе од учительхненди стака. Сяс мес университетса тонафнемста няеськ учителень профессиять аньцек методическяй работатнень коряс. Магистратурать шумордамдонза меле, хуш и мялезоноль работамс факультетса, шарьхкодине, эряви варжамс прязень школаса.
Тядде 11 классонь учениконе макссть рузонь кяльть коряс ЕГЭ. Тя опытсь эряфсон од. Пяк пичедень инксост. Тя оцю ответственность—анокламс шабатнень экзаменти, конань эзда ащи синь сяда товолдонь эряфсна.
Павазуван, мес эряфозе сотф учителень тевть мархта. Васенцесь минь профессиясонк—кельгомс шабатнень и эсь предметцень. Уленди, мзярда мяльце колаф, но аньцек суват классу, няйсак, кода иттне ваныхть лангозот, эстокиге арси лад седиезт. А кда синь нинге сембось лисенди! Старандан, штоба шабатне урокозон сашендольхть оцю мяль вельде.
Сембода цебярсь школаса—иттне.
Оксана Белкина.