Светлана Наркаева:«Оцю мяльса тонафнесайне шабатнень инь питнити—тядянь-алянь кяльти»

Тячи учителень шись!

Мокшавась Светлана Васильевна Наркаева аф фкя киза ни покоди Рузаевскяй райононь Трускляй велень средняй общеобразовательнай школаса, вяти мокшень кялень и мокшэрзянь литературань урокт. Сон высшай категориянь учитель. Марстонь стажец 26 киза. Колганза материалть лувость 8-це страницаста.

Ёмла родинац мокшавать Сузгярьге велесь. Шачсь-кассь Миронофнень трудонь кельги семьясост. Сузгярьгса аделазе средняй школать. Сяда тов поступась тонафнема М.Е.Евсевьевонь лемса Мордовскяй государственнай педагогическяй институтть филологическяй факультетозонза.
Тячемс спасибамань валхт азонкшни преподавательхнень лемс, конат сонь тонафнезь. Ётксост Александра Каторова, Михаил Келин, Тамара Ломакина (сон группати куратороль), Владимир Рогачев, Генрих Горбунов и лиятне.

Студентокс улемань пингсь ётась апак фатяк кода. И вов мокшень стирть Светлана Мироновать кядьса высшай образованиять колга дипломсь.
Тя ёткть тиевсть полафткст и личнай эряфсонза. Светлана Миронова арась Наркаевакс—лиссь рьвакс Трускляи мокшень цёрати Юрий Ивановиченди. Кода корхнихть Рузаевскяй райононь мокшень велетнень эса, «арась Трускляень рьвянякс».
Трудовой кинц филологсь ушедозе Кельме Порань школаса воспитателькс.
Меле Наркаефнень семьясна пяшкодсь идень вайгяльда—шачсь васенце идьсна, цёрасна Евгений.
Светлана Васильевна поладозе тевонц Трускляень школаса, коса ушедсь работама родной (мокшень) кялень и литературань учителькс. Тияк аф ламос ульсь и воспитателькс.
Вов ни лама киза мокшавась Трускляй велень средняй общеобразовательнай школаса тонафнихненди вяти мокшень кялень и литературань урокт. Эрть лац-ряц арьсесы. Анокламста тевс нолясыне «Мокшень правда» газетать, «Мокша», «Якстерь тяштеня» журналхнень, конатнень фалу сёрматфнесыне.
«Тядянь-алянь кяльса лисенди изданиятне макссихть оцю лезкс урокнень ётафтомста. Эздост вешенттяма и мушенттама кепотькст од тематнень коряс, кудонь заданиятнень тиемстовок эрявкснихть»,—мярьгсь Светлана Васильевна.
Урокта башка Светлана Наркаева ётафни мастер-класст, эрь-кодама мероприятият.
Светлана Васильевна аф аньцек тевонь содай учитель, но и наставник. Наставникокс сон ульсь начальнай класснень учительснонды Екатерина Вашлановати. Екатерина Владимировнань мархта арьсесть мокшень кяльть и мокшэрзянь литературать коряс рабочай программат.
Мокшень кялень, мокшэрзянь литературань учительсь фалу примси участия профессиональнай конкурснень эса. Несколька кизода инголе сон сяськсь «Образование» национальнай проектть ётафтомста образовательнай учреждениянь педагокнень ёткса Рузаевскяй муниципальнай райононь оцюнять премиянц инкса конкурсса, «Мордовскяй (мокшень, эрзянь) кялень инь цебярь учительсь» республиканскяй конкурсть муниципальнай этапсонза, «Мордовскяй (мокшень, эрзянь) кялень инь цебярь кабинетсь» республиканскяй конкурсса, ульсь призёркс и сяськикс и лия конкурснень эса.
Мокшавась фалу тиенди выступленият методическяй советтнень, научно-практическяй конференциятнень, педагогическяй морафтоматнень, семинархнень эса.
Светлана Васильевна казьф Мордовия Республикань Оцюнять Благодарностенц, Российскяй Федерациянь Просвещениянь министерствать Почётнай грамотанц, Мордовскяй (мокшень и эрзянь) народть Межрегиональнай общественнай организациянц Благодарностенц, Мордовия Республикань Культурань, национальнай политикань и архивнай тевонь министерствать Благодарностенц мархта. Но инь оцю казнекс учительти арсихть тонафнихнень сатфкссна. Школать шумордаензон эзда кой-кит састь мяльс арамс учителькс и поступасть педагогическяй вузу. Ламоц ученикне арсихть сяськикс и призёркс родной (мокшень, эрзянь) кяльть, родной (мокшэрзянь) литературать и кяльть коряс школаса тонафниень Межрегинальнай и лия олимпиадатнень эса. Тяни Светлана Васильевна класснай руководитель 5-це класса.
Мархтонк васетькшнемста мокшавась—учительсь щафоль-каряфоль мокшекс. Шарня лаца сотфоль прязонза руцясь, вярьгак кели китьксокс таргавсть панчфне, лангсонза—панар и рукава (тяфта Рузаевкаса мярьгихть панарть ланга щашендови щамти). Аш ни кода ладясь сон теенза! Эхянь мокшава-баярава!
Корхни ялганьке пачфтсь, што сон вов ни лама киза морси «Келуня» коллективса, коза сувсихть школаса работай учительхне. Мялезонзот мокшэрзянь кунардонь, тяниень пингонь моротне. Щамоньковок, кле, пяк мазыхть.
Кудса Светлана Наркаева—кельгома тядя и рьвя. Мирденц, Юрий Ивановичень мархта касфтсть кафта шабат. Оцюсь, цёрасна Евгений—агроном. Стирьсна, Алина, тонафни Трускляень школаса 11-це класса, шять, поладсы учителень тевть.
Кода и сембе мокшаватне, Светлана Васильевна кельгсы пидеманц-панеманц. Кодай спицаса, сёрмады сюреса (гладьса). Кельгома тевонзон эзда фкясь—панчфонь касфнемась. Тундаста сявомок пцтай кельмотнень прамс лама пингта максси перень сёротнень касфтомаснонды, мельгаст якамати.
Тячи Учителень шись. Светлана Васильевна кули поздравляндамань лама вал, тяконь лувксса Трускляень школаса тонафнихнень эзда. Миньге седи ваксста поздравляндасаськ сонь и Трускляень школань сембе учительхнень иласнон мархта! Арьсетяма кеме шумбраши и сатфкст аф тёждя, но эрявикс тевсост.
Татьяна Альшина.
Фотось Николай КАРАНОВОНЬ.

Последние новости

Саранск встретил март «Весенней ярмаркой подарков» 

1 марта в столице региона, при поддержке Министерства экономики,...

В Региональный сосудистый центр №2 поступает новое современное оборудование

Региональный проект «Борьба с сердечно-сосудистыми заболеваниями» национального проекта «Здравоохранение»...

ПОСЛАНИЕ ПРЕЗИДЕНТА

Инициативы Президента Владимира Путина по итогам послания Федеральному Собранию  29...

Благоустройство Дубенского района Мордовии

Центральная площадь вс. Дубенки, 2 общественные территории в с....

Президентть Посланияста

 Башка мяль Владимир Путин эсь Посланиясонза шарфтсь образованиять качестванцты....

Саранск встретил март «Весенней ярмаркой подарков» 

1 марта в столице региона, при поддержке Министерства экономики, торговли и предпринимательства Республики Мордовия и регионального Центра «Мой бизнес» открылась «Весенняя ярмарка подарков». Традиционно...

В Региональный сосудистый центр №2 поступает новое современное оборудование

Региональный проект «Борьба с сердечно-сосудистыми заболеваниями» национального проекта «Здравоохранение» предусматривает профилактику развития данного диагноза у пациентов с высоким сердечным риском. Для достижения этой цели...

ПОСЛАНИЕ ПРЕЗИДЕНТА

Инициативы Президента Владимира Путина по итогам послания Федеральному Собранию  29 февраля 2024 года Послание Президента – это, по сути, программа развития страны, образ будущего, который выходит...