ТОНАФНЕМА ВАСТОНДИ КОЧКАЗЕ САРАНСКЯЙТЬ

Н.П.Огарёвонь лемса Мордовскяй государственнай университетть лангс коль сяда оцю мяль шарфнихть омба масторонь студенттне, конат кочксесазь сонь образованиянь получамань вастокс. Тя корхтай университетть содафокс улеманц и студенттненди цебярь содамошинь максоманц колга. Миньцонк тонафни омба масторонь студенттнень эзда фксь—Фарангиз Ирискулова, кона сась Ташкентста, Узбекистанть столицаста. Кочказе Н.П.Огарёвонь лемса МГУ-ть, коса ули кода получамс цебярь образования.
Фарангиз тонафни экономическяй факультетса. Кенерсь мумс лама ялга кода омба масторонь, стане и рузонь студенттнень ёткста. Мекольцетне пяк дивандасть стирть акцентфтома корхтаманцты.
«Мзярда васенцеда повонь университету, тястонь студенттне васьфтемазь пяк лац, ушедсть мархтон корхтама английскяй кяльса. Мзярда ушедонь отвечсема рузкс, дивандасть. Тяда башка, шарфтсть мяль, што рузкс корхтань аруста, ёфси ашель акцентозе»,—мярьгсь стирсь.
Рузонь менталитетсь, коса оцюдонга оцю мяль шарфневи семьянь питнишитненди, ялгаксшити, пяк тусь Фарангизть мяльс. Сонь валонзон коряс, тястонь эряйхне пяк кельгсазь искусствать и литературать, конат макссихть творческяй вийхть, пара арьсемат.
Тонафнемок ниле кизот, Фарангиз арась пяк цебярь студенткакс, кона сидеста примси участия олимпиадатнень и конкурснень эса. Тяда башка, няфтезе эсь прянц творческяй ломанькс. Сон сувси Студентонь ассоциацияти и пуропни лама мероприятия, мезсь лезни теенза козякофтомс эсь содамошинзон.
Лия масторса тонафнемада меле Фарангиз ёрай нолдамс тевс экономикать мархта сотф содамошинзон международнай компаниятнень и организациятнень эса. Стирсь арьси поладомс тонафнеманц магистратураса, штоба сядовок касомс профессиональнай ширде.
София ШАРАШИДЗЕ.