Тонафниензон сатфкссна кеняртьфтихть

Мезть мяльс сявозь путови оценка педагогонь асушити и квалификацияти? Фкя тяфтама показателькс ащи республиканскяй, межрегиональнай и федеральнай серень олимпиадатнень, конкурснень эса тонафнихнень участиянь примамасна.
Атюрьевскяй райононь Крхтажень средняй общеобразовательнай школаса мокшень кялень и мокшэрзянь литературань урокнень вятьсыне высшай квалификационнай категориянь учительсь Нина Яковлевна Алёнина. Сонь педагогическяй работань стажец 33 киза. Ученицац, Виктория Мелешкина, 2019 кизоня сяськсь мокшень кяльть и литературать коряс творческяй секцияса. 2020 кизоня арась Россиянь нароттнень литератураснон коряс тонафнихнень и студенттнень Международнай фестивальснон региональнай турса и «Семьязень родной кялец» МР-нь студенттнень и тонафнихнень творческяй работань республиканскяй конкурсса призёркс.
Алина Алёшкина сяськсь родной кяльть и литературать коряс школьникнень Межрегиональнай олимпиадасост мокшень кялень секцияса, а 2021, 2022, 2023 кизотнень—МР-нь государственнай кяльть коряс. Нинге сон—«Мордовиянь од вайгяльхть» литературнай конкурсть лауреатоц. «Проза» номинацияса сатозе 2 вастть.
Нина Алёнинать тонафниензон творческяй работасна сидеста печатлакшневихть «Сельские вести» районнай газетаса, «Якстерь тяштеня» идень журналса, «Мокшень правда» газетаса.
Нина Яковлевна фалу работай профессиональнай маштомошинзон виияфтомаснон лангса тя или тона курснень вельде, примси участия педагогонь Всероссийскяй конференциятнень, профессиональнай конкурснень, «Тотальный диктант» акциять эса, ётафни панжада урокт, мастер-класст Мордовиянь и лия региононь учительхненди.
Тонафтомань и воспитандамань тевса оцю сатфксонкса Нина Алёнина казьф МР-нь Оцюнять, Мордовскяй (мокшень и эрзянь) народть Межрегиональнай общественнай организациянц, Финно-угорскяй народонь культурань Поволжскяй центрать Благодарностьснон мархта. Нинге сон—«Лучший учитель мордовского языка» республиканскяй конкурсть дипломантоц (2018 кизось).
Россиянь нароттнень литератураснон коряс Международнай фестивалень призёрть анокламанц инкса 2019 кизоня казьф Казанскяй университетть эзда Благодарностьса, Евсевьевскяй олимпиадати мокшень кяльть коряс сяськить анокламанц инкса М.Е.Евсевьевонь лемса Мордовскяй государственнай педагогическяй институтть Благодарностьса, «Семьязень родной кялец» конкурсти призёронь анокламать инкса Н.П.Огарёвонь лемса Мордовскяй госуниверситетть Благодарственнай сёрманц мархта.
Владимир Ермишев.