Тячи Мордовиянь 74,5 тёжянь школьниксь озай парта ваксс

МР-нь Оцюнясь Артём Здунов 26 августста ётафтсь тонафнемань од кизоти республикань образовательнай организациятнень анокшиснон коряс совещания. Совещанияса примасть участия Правительствань члеттне, МР-ть эзга Россиянь МЧС-ть Главнай управлениянц и МР-ть эзга МВД-ть, регионть эзга Роспотребнадзорть Управлениянц руководствасна.
Республикань Образованиянь министерствать информациянц коряс, Мордовиянь образовательнай сембе организациятне азфт анококс тонафнемань од кизоти. Нят идень сатт, школат, дополнительнай и средняй профессиональнай образованиянь учрежденият.
74,5 тёжянь школьниксь озай парта ваксс тонафнемань од кизоня—тя тёжяньда лама ломань ётай кизоть коряс. А вов васенце классу молида кармай сяда кржа мелять коряс—7,5 тёжянь.
Образованиянь министерствать контроленц ала—учебникнень и учебнай пособиятнень доступнайшисна. «Федеральнай спискаса азф сембе учебнай комплектса иттне обеспечендафт»,—мярьгсь республикань образованиянь министрсь Елена Солдатова. Ня цельхненди средстватне, Мордовиянь Оцюнять мярьгоманц коряс, инголенди ванфтольхть республиканскяй бюджетса.
Тядде школьнай маршруттнень эзга кармай якама 246 техникань единица. Тяда башка, сёксенда республикав сай 27 школьнай од автобус.
Мордовиянь Оцюнясь башка мяль шарфтсь аралафшинь ванфтомань кизефкснень лангс. Республикаса образованиянь сембе объекттне обеспечендафт охранаса, стационарнай металлоискательса и автоматическяй пожарнай сигнализациянь системаса, и пцтай сембе—видеонаблюдениянь системаса.
Фалу кирдеви мяльса и эпидемиологическяй аралафшись: тонафнемань од кизоть ушедомда инголе ётафтовсь и тянивок ётафневи школьнай персоналть коронавирусть и гриппть каршес ПЦР-тестированиянц и вакцинациянц коряс оцю работа.