Тяфтама ни сон — Т.Д. Майоровась

Татьяна Дмитриевнань инголе мзярдовок ашезь эвондакшне кизефкс—кодама профессия эстейнза кочкамс. Сон фалу содазе, што лемдьсы эряфонц иттненди. Сяс Ковылкинскяй райононь Парапинань средняй школать аделамда меле поступась Зубово-Полянскяй педагогическяй училищань «Дошкольное воспитание» отделениязонза. Тонафнемс стирняти ульсь теждя, сяс мес школаса ульсь вии ученицакс.
Сембе мяляфтсазь ся пингть, мзярда Парапинаса куватьс—киза и колма кофт, ашезь работа идень садсь. Тиендевсть аф фкя лацонь полафткст. Васенда сон ульсь ведомственнайкс «Партизанский» совхозти, сяльде ётафтозь РОНО-в, а тоса—парапинскяй велень Совету.
1996 кизоня идень садсь савсь эреклафтомс одукс. Зданиясь ашезь ушнев, лама вастова кольгсь вельхтяфксоц. Од заведующайти, Т.Д. Майоровати, савсь путомс лама вийхть, штоба садсь ушедоль работама ингольцекс. А тянкса дошкольнай учреждениясь савсь ётафтомс школав. Эсь вийсост тисть ремонт и тевсь тусь.
Т.Д. Майорова идень садти макссь 22 киза, эздост 16 киза работась оцюнякс. Тя пингста сон няфтезе тевонь вятиень асушинц. Велеса арась кельговикс и шнама ломанькс.
Трудонь кельги авась эрь тевти путнезе ваймонц. Ёмла иднятненди макссезе седиень лямбонц, ульсь теест омбоце тядякс.
Цебярь тонафтыкс и наставникокс ульсь идень садонь од работникненди. Васендакгие тонафтозень синь кельгомс эсь тевснон, кельгомс иднятнень, мушендомс марстонь кяль тядятнень-алятнень мархта. Эсь асушинц инкса Татьяна Дмитриевна канни Российскяй Федерациянь общай образованиянь Почётнай работниконь лем, а тяфта жа сон—«Трудонь ветеран».
Тяни Т.Д.Майоровась ваймоси. Сонь кенярдемац павазу идензон и уноконзон эса. Наталья, оцю стирец, Ковылкинань 4№ СОШ-ть аделамда меле поступась Ковылкинань строительнай техникумонь юридическяй отделениязонза. А сяльде получась высшай юридическяй образования Н.П.Огарёвонь лемса Мордовскяй госуниверситетть Ковылкинань филиалсонза. Сонь киганза тусь и Юля стирец. Татьяна Дмитриевнань унокоц кочказе эстеенза юристонь профессиять.
Майоровать ёмла стирец, Раиса, профессияс коре медик, аделазе Краснослободскяень медучилищать. Лама кизот работай пеень пчкафтомань поликлиникатнень и кабинеттнень эса. Сергей мирденц мархта касфтыхть Артём цёраснон, конац тонафни вейхксоце класса.
Т.Д.Майоровать валда, лямбе, инжиень примай квартирац мзярдонга аф уленди шава. Сонь кенкшенза фалу панжадот эрь сайти. Азоравась сембонь мархта муй мезень колга корхтама, а сяльде озафтсы шра ваксозонза и каванясы «мезе Шкайсь макссь». Тяфтама ни сон—Т.Д.Майоровась.
Василий Илькаев.