Тяфтама школаса тонафнемацевок сай

Рузаевскяй муниципальнай райононь Трускляй мокшень велеса кафта этажса средняй общеобразовательнай школась ащи велеть пцтай «седикуцюнясонза»—кучкасонза. Нинге ичкозде «содамошинь кудсь» няевсь инголивок. Сядовок сельмос повикс сон арась тяни—капитальнай ремонтта меле, кона тифоль «Образованиянь школьнай систематнень модернизациясна» федеральнай программать коряс тяддень январьста сявомок 1 сентябрть самс.

Капитальнай ремонтть пингста полафтфтольхть проводкась, канализационнай и противопожарнай систематне, одкстоптфтольхть тонафнемань заведениять «шамаликоц»—рузкс азомс—фасадоц, классне и лама мезсь лиясь. Тяни Трускляень школась отвечай тяниень пингонь сембе вешфксненди.
Содамошиня школась панжезень кенкшензон 87 тонафнити.
Аф кунара улеме Трускляйса. Васетькшнеме тостонь эряйхнень мархта. Сувсеме школав, коса цебярь азоравакс васьфтемазь сонь директороц, мокшавась Любовь Иляева.
Шачемас коре Любовь Петровна Красноярскяй краень, коза Рузаевскяй райононь Од Усад велеста тушендсть эряма тядяц и аляц. Мзярошка пингонь ётазь састь меки мокшэрзянь мастору, Трускляй вели.

Школать шумордамдонза меле Любовь Петровна поступась М.Е.Евсевьевонь лемса Мордовскяй государственнай педагогическяй институту, коса тонафнесь начальнай классонь учителькс. Высшай образованиять колга дипломть получамдонза меле мрдась Трускляи. Аф ламос работась шабрань Кельме Пора велеса идень садса воспитателькс, а сяльде мокшавать ётафтозь Трускляень школав. 2006 кизоста сявомок сон—директор.

Любовь Иляева—Российскяй Федерациянь общай образованиянь Почётнай работник, казьф Мордовия Республикань, Мордовия Республикань Оцюнять, Мордовия Республикань Правительствать Почётнай грамотаснон мархта, а стане жа Мордовия Республикань Оцюнять Благодарностьса.
Аф кунара Трускляень средняй общеобразовательнай школав сашендсть Российскяй Федерациянь сенаторсь Пётр Тултаев, Рузаевскяй муниципальнай райононь оцюнясь Александр Юткин и лия оцю инжихть. Одкстоптф школаса ётафтфоль «Кельк и содак эсь крайцень» семинар-практикум.
Сенаторсь Пётр Тултаев шарфтсь мяль, што Трускляень школась капитальнай ремонтта меле арась аф содавиксокс: фасаттне, класснень и общественнай пространстватнень индивидуальнай дизайнцна, тяниень пингонь мебельсь и тонафнемань оборудованиясь—сембось салси мяль.

Тя шиня Пётр Николаевич максозе директорти, Любовь Иляевати, Федерациянь Советть Председателенц Валентина Матвиенконь Благодарностенц.
Любовь Петровна мархтонк корхнемста шарфтсь мяль, што тя оцю казнесь—школань марнек коллективть сатфксоц.
87 тонафнить эзда 16-сь усксевихть Трускляень школав Сире Усад и Инсар-Акшино велетнень эзда, конат сувсихть Трускляень велень поселенияти. Школьнай партатнень ваксс тядде васенцеда озасть 5 шабат, сай кизоть учендови сяда лама.

Любовь Иляева азсь оцюдонга оцю спасиба Россиянь Президентти Владимир Путинонди, кона башка мяль шарфни эряфть сембе ширензонды, тяконь лувксса и образованияти. Райоттнень, велетнень эса одкстопневихть школатне, теест тиендеви капитальнай ремонт.
Башка мяль шарфни тянь мархта сотф кизефксненди и Мордовия Республикань Оцюнясь Артём Здунов.
«Школать эса капитальнай ремонтта меле полафтсь сембось»,—китькстазе Любовь Петровна.
И тя афкукс тяфта. Тоса улемстонк бта экскурсияс повоме. Коридорса ащесь пианино, конанди нильгемоньда лама киза. Машты кядь ломанць, Алятнень школьнай советснон председателец Александр Кукушкин петезе-тиезе сонь, и тяни музыкальнай тя инструментсь ащи акша баяравакс ся стенать маласа, конань лангса содаф композитороньконь Пётр Чайковскяень шамаликоц. лиссь музыкальнай эсь лацонь уженя. Сяда тов повоме уженяс, конань лемделине Пушкинскяйкс—стенаса классиконьконь шамаликоц, кияксть лангса ащихть мазы скомнят—самай стапт, кодапт ульсть поэтть эряфонц пингста. Озат скомнять лангс и эстокиге лятфтасак Болдинань сёксеть… И тематическяй тяфтама уженяда школаса аф кржа.
Ремонтта меле уликснень ваксса эвондась од кабинет—идень инициативань центра.
Любовь Петровна лама лямбе вал азсь школань педагогическяй коллективть колга, коса сембоц работай 19 ломань. Учительхнень ламошкасна— Трускляеннет, кафта ломатть сашендыхть Рузаевкаста, кафта—шабрань велеста.
2020 кизоня Трускляень школаса панчфтольхть «Точка роста» кафта кабинетт. Фкясь эздост гуманитарнай, омбоцесь—цифровой технологиянь профилень. Ули тяниень пингонь эрявикс сембе оборудованиясь, конань тонафнихне маштозь нолясазь тевс.
Ламотне эздонк мяляфтсазь ся пингть, мзярда школаса ульсть «продлёнкат». Трускляень школаса ули «пяшксе шинь школа». Иттненди урокта меле ули кода лядомс кружокненди и ащемс школаса кемзисемге частти.
Ваноськ и столовайть. Пидихне-панихне тевснон тиендьсазь маштозь и эрь шиня танцтиста аннесазь школаса тонафнихнень.
Ули школаса и музей (сонь колганза минь азонттама газетаньконь сяда товолдонь номеронзон эса). Тяса ванфтови кафта тёжяньда лама экспонат, конат пачфнихть историяньконь колга.
Велень школать аф юкснесазь сят, кит мзярда-бди шумордазь сонь. Трускляйса улемстост сувсихть, мезьса вийсна—лезнихть. И тянкса школьнай администрациясь азонды теест оцю спасиба.
Татьяна АЛЬШИНА.
Фототне Николай КАРАНОВОНЬ.

Последние новости

Саранск встретил март «Весенней ярмаркой подарков» 

1 марта в столице региона, при поддержке Министерства экономики,...

В Региональный сосудистый центр №2 поступает новое современное оборудование

Региональный проект «Борьба с сердечно-сосудистыми заболеваниями» национального проекта «Здравоохранение»...

ПОСЛАНИЕ ПРЕЗИДЕНТА

Инициативы Президента Владимира Путина по итогам послания Федеральному Собранию  29...

Благоустройство Дубенского района Мордовии

Центральная площадь вс. Дубенки, 2 общественные территории в с....

Президентть Посланияста

 Башка мяль Владимир Путин эсь Посланиясонза шарфтсь образованиять качестванцты....

Саранск встретил март «Весенней ярмаркой подарков» 

1 марта в столице региона, при поддержке Министерства экономики, торговли и предпринимательства Республики Мордовия и регионального Центра «Мой бизнес» открылась «Весенняя ярмарка подарков». Традиционно...

В Региональный сосудистый центр №2 поступает новое современное оборудование

Региональный проект «Борьба с сердечно-сосудистыми заболеваниями» национального проекта «Здравоохранение» предусматривает профилактику развития данного диагноза у пациентов с высоким сердечным риском. Для достижения этой цели...

ПОСЛАНИЕ ПРЕЗИДЕНТА

Инициативы Президента Владимира Путина по итогам послания Федеральному Собранию  29 февраля 2024 года Послание Президента – это, по сути, программа развития страны, образ будущего, который выходит...